"ქამრების შემოჭერის" პოლიტიკა და ლარის დევალვაციის კონკრეტული მიზეზები - კვირიკაშვილის განმარტებები და პასუხები ივანიშვილ-ალასანიას

მთავრობა ადმინისტრაციული ხარჯების 12 პროცენტით შემცირებას აპირებს, - ამის შესახებ ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა ტელეკომპანია "იმედის" გადაცემა "იმედის კვირაში" განაცხადა.

როგორც მინისტრმა განმარტა, ადმინისტრაციული ხარჯების შემცირება სწორედ "ქამრების შემოჭერის" ფარგლებში გასატარებელი ღონისძიებაა. "ქამრების შემოჭერა პირველი ადეკვატური ნაბიჯია, როდესაც ხედავ, რომ შენი მოსახლეობა საკმაოდ დაზარალდა კურსის ცვლილების გამო. რა თქმა უნდა, მთავრობა ვალდებულია, რომ ადმინისტრაციული ხარჯების შემცირების კუთხით გადადგას ნაბიჯები. ჩვენ ამ კვირაში დეტალიზებულ შემცირების გეგმას წარმოვადგენთ. საუბარია დაახლოებით იმავე პროცენტით შემცირებაზე, რაც მოხდა დევალვაციის პირობებში. დაახლოებით 12-პროცენტიანი დევალვაციაა და ამავე რაოდენობის ხარჯების შემცირებას მოვახდენთ", - განაცხადა გიორგი კვირიკაშვილმა.

მისივე თქმით, ის ღონისძიებები, რომელსაც მთავრობა და ეკონომიკური გუნდი გეგმავს, ხელშესახებ შედეგს მოიტანს. "ჩვენ ძალიან კონკრეტულ ნაბიჯებზე გათვლილი გეგმა გვაქვს, რაც მოიტანს ხელშესახებ შედეგს. არ უნდა ვიყოთ პესიმისტურად განწყობილი. პირველ რიგში ეს არის პრივატიზაციის გააქტიურება, რაც ყველაზე მოკლევადიანი შედეგია. ჩამონათვალია იმ ობიეტების, რომელთა პრივატიზაციაც უახლოეს დღეებში მოხდება. მაგალითად, რამდენიმე ობიექტი, რომელიც საპარტნიორო ფონდმა დაასრულა, ეს არის თბოელექტროსადგური გარდაბანში, საპარტნიორო ფონდი გამოვა ამ პროექტიდან და იმ წუთასვე დაიწყებს ახალ პროექტებს ამ თანხით და ეს იქნება სავალუტო შემოდინება. მარტო ორი ობიექტიდან შემოსავალი - 250-დან 300 მილიონ დოლარზეა საუბარი", - განაცხადა გიორგი კვირიკაშვილმა.

გიორგი კვირიკაშვილმა ლარის სამომავლოდ გაუფასურების შესაძლებლობასთან დაკავშირებითაც ისაუბრა. მისი თქმით, მთავრობა ყველაფერს აკეთებს, რათა ლარის კურსზე "დაწოლა" შემცირდეს.

"ლარის გაუფასურებას ველოდები თუ არა, ამაზე პასუხის გაცემისგან თავს შევიკავებდი. ამ პროგნოზის გაკეთება ძალიან რთულია. ექსპორტის დაკორექტირება უკვე მოხდა, მე არ ველოდები, რომ სერიოზული კლება მოყვეს ამის შემდეგ ექსპორტს და ტურიზმს. ის დროითი შუალედი გასულია, როდესაც უკვე იმპორტის კორექტირებაც უნდა მოხდეს და ეს კიდევ უფრო შეამცირებს დაწოლას ეროვნულ ვალუტაზე. ასე რომ, სერიოზულ ცვლილებებს არ ველოდები, მაგრამ კიდევ ერთხელ ვამბობ, რომ დიდი მნიშვნელობა აქვს ემოციურ განწყობას და არ უნდა შეიქმნას ისეთი მდგომარეობა, რომ სიტუაცია არ არის გამოსწორებადი", - განაცხადა გიორგი კვირიკაშვილმა.

კვრიკაშვილმა ეკონომიკური ვარდნის რამდენიმე კონკრეტული მიზეზი დაასახელა.

"გაზის მოწოდება იყო შეფერხებული იანვარიში და აზოტის ქარხანა იყო 10 დღით შეჩერებული, ფეროშენადნობზე მსოფლიო ფასების ვარნდა, ღვინისა და ალკოჰოლური სასმელების ექსპორტის კლება უკრაინასა და რუსეთში, 50-70%-მდე იყო მინერალურის და ღვინის ექსპორტის კლება. ამას გარდა, იყო ფულადი გზავნილების კლება დაახლოები 98 მილიონი დოლარი, იყო ტურიზმიდან შემოსავლის კლება. დაგეგმილია პრივატიზაცია, ასევე ტურიზმის კამპანია და ადმინისტრაციული ხარჯების შემცირება - ეს ყველაფერი დაგეგმილია იმისთვის, რომ მოხდეს სიტუაციის დასტაბილურება", - განაცხადა კვირკაშვილმა.

მინისტრის თქმით, მოხდება სავალუტო ფონდთან დეფიციტის შეთანხმება და სხვა ფინანსური ინსტიტუტებიდან დამატებითი რესურსის აღება.

"ინფრასტრუქტურულ პროექტებზე ჩემი სიტყვები არასწორად იქნა ინტერპრეტირებული, რომ ჩვენ სავალუტო ფონდიდან ავიღებთ ფულს. ჩვენ სავალუტო ფონდს დაველაპარაკებით, რადგან გვაქვს ამის ვალდებულება, რომ დეფიციტის დონე შევუთანხმოთ, რომ სხვა ფინანსური ინსტიტუტებიდან ავიღოთ უცხოურ ვალუტაში დამატებითი რესურსი და დავხარჯოთ დამატებით ინფრასტრუქტურულ პროექტზე, ეს არის ის, რაც აუცილებლად დაგვისტაბილურებს ეროვნულ ვალუტას", - განცხადა კვირკაშვილმა.

რაც შეეხება ბიძინა ივანიშვილის ფრაზას, რომ ლარი კარგ მდგომარებაშია, მინისტრმა აღნიშნა, რომ ის არ არის ვალდებული ამ საკითხზე კომენტარი გააკეთოს. კვირიკაშვილის განმარტებით, მთავრობის ვალდებულებაა მაქსიმლურად შეეცადოს მდგომარეობის გამოსწორებას.

"მე არ ვარ ვალდებული ამაზე კომენტარი გავაკეთო, ჩვენი მოლოდინები იყო ადექვატური, არავინ არ ელოდა, რომ ასე გამძაფრდებოდა ქვეყნის გარშემო სიტუაცია, მე პირადად ვიღებ პასუხისმგებლობას იმ სუბიექტური დონით, რაც ჩემზეა დამოკიდებული. არის მოვლენები, რომელიც ჩვენს გარეშე ვითარდება და არავინ არ ელოდა, რომ მინსკის შეთანხმება დაირღვეოდა, თუმცა ეს დეჟავუსავით გვახსენდება, როგორიც იყო პასტუხოვის შეთანხმება...", - განაცხადა მინისტრმა.

გიორგი კვირკაშვილი აცხადებს, რომ მთავრობა 2-3 თვეში ელოდება სიტუაციის დასტაბილურებას.

"არ ვარ იმ წარმოდგენის, რომ ქვეყანაში ყველაფერი ვარდისფრად არის, ეს არის ტიპიური საგარეო ეკონომიკური შოკი, და ჩვენ ერთიანი ნაბიჯებით ვალდებული ვართ ქვეყანა აქედან გამოვიყვანოთ. ყველა ნაბიჯი გათვლილი გვაქვს და ის შედეგის მომტანია, 2-3 თვეა კრიტიკულად მნიშვნელოვანი და ჩვენ არცერთი წუთი არ უნდა დავკარგოთ, რომ მივიღოთ შედეგი, მაგრამ საგარეო ეკონომიკური ეფექტი ფაქტიურად მომხდარია და ჩვენ არ უნდა ველოდოთ განსაკუთრებულად დიდ ცვლილებებს, ჩვენი მოლოდინები 5 წლის წინ არ იყო ასეთი და არავინ არ ელოდა მსოფლიოში ამას, ჩვენ დღეს ვუყურებთ მეორე მსოფლიო ომის დროინდელ კადრებს ტელევიზიით. ჩვენ ვმუშაობთ, რომ 2-3 თვის თავზე იყოს ხელშესახები შედეგი", - განაცხადა კვირკაშვილმა.

ეკონომიკის მინისტრმა თავდაცვის ყოფილი მინისტრის ირაკლი ალასანიას კომპლიმენტსაც უპასუხა. ალასანიამ პატივისცემა დაადასტურა გიორგი კვირიკაშვილის მიმართ, როგორც ერთ-ერთი გამორჩეული პიროვნებისა მთავრობის წევრებს შორის და მოუწოდა, რომ ჩაეხსნას სოლოლაკის შუშის სასახლეს და დამოუკიდებლად მიიღოს გადაწყვეტილებები.

ეკონომიკის მინისტრმა დაადასტურა, რომ არსებობს ადამიანური ურთიერთობები ივანიშვილთან და არავინაა ვალდებული ამის შესახებ გაზვიადებული წარმოდგენები შექმნას.

"ამ ხელისუფლებაში არის ბევრი ღირსეული ადამიანი, რომელიც არ ზოგავს ენერგიას, რომ სიტუაცია გამოსწორდეს. შუშის სასახლის კონტროლი, ეს არ არის სერიოზული, თუ საუბარია ბიძინასთან კონტაქტზე, ყველა დამშიდდეს - ეს არის ადამიანური ურთიერთობები და არ ვართ ვალდებული, რომ ამ ურთიერთობებზე გაზვიადებული წარმოდგენები შევქმნათ", - განაცხადა გიორგი კვირკაშვილმა.

იხილეთ ვიდეო: მოსალოდნელია თუ არა ლარის კიდევ უფრო მეტად გაუფასურება?

სიახლე!

თუ დაინტერესებული ხართ მხოლოდ პოლიტიკური თემებით და არ გსურთ, მიიღოთ სხვა, თქვენთვის უინტერესო ინფორმაცია, მოიწონეთ გვერდი, რომელზეც მხოლოდ უმნიშვნელოვანესი პოლიტიკური სიახეები თავსდება.