ქართველი "ტოპ გოგონები" ერთმანეთს სიმღერაში შეეჯიბრებიან

"რუსთავი 2"-ის რეალური შოუ "ტოპ გოგოს" ყოფილი მონაწილეები ერთმანეთს კიდევ ერთხელ დაუპირისპირდებიან. პროექტის ორივე სეზონის მონაწილეები ამჯერად სიმღერით შეეჯიბრებიან ერთმანეთს. ქართველი და უცხოელი მოდელები პროექტის პირველი სეზონის ყველაზე სკანდალურმა მონაწილემ გურანდა ცერცვაძემ შეკრიბა.

- გურანდა, რატომ გადაწყვიტეთ შეკრება "ტოპ გოგოებმა"?

- გოგოები ერთად აქამდე არ შევკრებილვართ, ყოველთვის მქონდა ამის იდეა, მაგრამ ვერასდროს მოხერხდა. მხოლოდ იმ გოგოებს ვნახულობდი, ვისთანაც ვმეგობრობ. "ასა ჰოლის" ხელმძღვანელმა გია გუმბერიძემ შემომთავაზა დახმარება ამ იდეის განხორციელებაში და თითქმის ყველა გოგო დაგვთანხმდა. სალომე ღვინიაშვილს და ნინო ცქიტიშვილსაც ველოდებით ჩვენს ღონისძიებაზე და თუ მოახერხებენ, ისინიც მოვლენ.

- ამბობენ, რომ პირველი და მეორე სეზონის გოგონებს ცუდი ურთიერთობა გაქვთ ერთმანეთთან, მართალია?

- ცუდი ურთიერთობა ნამდვილად არ გვაქვს ეს იყო ჭორი, აუცილებლად დავამტკიცებთ, რომ ასე არ არის. ჩვენ ყველას კარგი ურთიერთობა გვაქვს ერთმანეთთან. განსაკუთრებული პასუხისმგებლობით ვემზადებით ამ საღამოსთვის. ერთმანეთს სიმღერაში შევეჯიბრებით. მართალია, დიდი ვოკალური მონაცემები არ გვაქვს, მაგრამ ყველა ამზადებს ერთ სპეციალურ ნომერს ამ საღამოსთვის. კარაოკეს მოვაწყობთ, არ გვინდა შევრცხვეთ და ისე გამოვიდეს, რომ ლამაზი ქალისთვის ყველაფერი დასაშვებია. მე სკანდალური იმიჯი შემიქმნეს პროექტში, ანტიპიარი გამიკეთდა, მაგრამ ყველა მიხვდა, რომ ასეთი ნამდვილად არ ვარ. ყველაზე მეტად იმ შავი პიარით გავპიარდი, თავიდან ხალხი ვერ მიტანდა, ვეზიზღებოდი, მაგრამ გამიცნეს და მიხვდნენ, როგორი ადამიანი ვარ.

- კიდევ რა მოგიტანა "ტოპ გოგომ"?

- რეკლამებში გადამიღეს, ხალხი მცნობს და ეს სასიამოვნოა. ამჯერად ერთ-ერთ სამშენებლო კომპანიაში ვმუშაობ, დირექტორის მოადგილე ვარ. ასევე ინტერიერის დიზაინერი ვარ და ამ კუთხითაც ვმუშაობ, ზოგჯერ ჩვენებებზეც გამოვდივარ.

- მაკა ზამბახიძემ და დიჯეი გიგა პაპასკირმა თავად გამოთქვეს პროექტში ჩართვის სურვილი?

- ეს გია გუმბერიძის იდეა იყო, მაკა ზამბახიძეს ყველა იცნობს და პატივს სცემს. ისიც მოგვეხმარება სიმღერაში. დუეტი "ჯორჯიას" დაშლის შემდეგ მაკა დამოუკიდებლად განაგრძობს კარიერას და ბევრად უფრო მეტი თაყვანისმცემელი შეიძინა. გიგა პაპასკირს რაც შეეხება, ის ყველაზე მოთხოვნადი ქართველი დიჯეია და გაალამაზებს საღამოს. სტუმრებსაც ექნებათ კარაოკეში ჩართვის საშუალება, თითოეული ჯგუფი აირჩევს თავის ფავორიტს, ვისაც უგულშემატკივრებს კარაოკეში და ასე აირჩევა გამარჯვებული, რომელსაც დავაჯილდოვებთ, ცნობილი დიზაინერის სამკაულით.

- რამე სიმბოლური დატვირთვა ხომ არ აქვს ამ საღამოს ორგანიზატორი ყველაზე სკანდალური მონაწილე, რომ არის?

- ყველგან მე ვარ ყველაფრის ინიციატორი და ამჯერადაც ჩემი ორგანიზებით ტარდება საღამო.

- პროექტის შემქმნელები დაესწრებიან საღამოს?

- კიკალა არ იქნება. რადგან მან გააკეთა პროექტი ეს არაფერს ნიშნავს, პროექტის დასრულების შემდეგ, ვაგრძელებთ ცხოვრებას და ერთად შევიკრიბეთ.

თამარ ბოჭორიშვილი