რა თანხა გადაუხადეს ალენ დელონს საქართველოში ვიზიტის სანაცვლოდ და რა საჩუქარი მიიღო მსახიობმა After party-ზე
პაატა ბურჭულაძის იუბილესადმი მიძღვნილ ღონისძიებაზე საგანგებოდ ამ დღისთვის მსოფლიო კინოს ლეგენდა, ალენ დელონი ჩამოვიდა. მსახიობის თბილისში ვიზიტს მისი გულშემატკივრები განსაკუთრებული ინტერესით ელოდნენ, საზოგადოების გარკვეულ ნაწილს კი გაუჩნდა კითხვა, თუ რატომ გადაწყდა სწორედ ალენ დელონის ვიზიტი საქართველოში, მიუხედავად იმისა, რომ მისი, როგორც მსოფლიო დონის ვარსკვლავობაზე, წლების შემდეგაც არავინ დავობს. ღონისძიებას ორგანიზება სახელოვნებო ინდუსტრია "არტპალასმა" გაუწია და ალენ დელონიც სწორედ მათი მოწვევით ესტუმრა თბილისს.
"არტპალასის" საზოგადოებასთან ურთიერთობის მენეჯერი, სოფო ალექსიძე მსახიობის ვიზიტთან დაკავშირებულ აქამდე უცნობ დეტალებზე Ambebi.ge-ს ესაუბრა.
- ალენ დელონი რომ მსოფლიო დონის კინო-ვარსკვლავია, ამაზე ყველა ვთანხმდებით. თუმცა მაინც საინტერესოა, რატომ შეჩერდა არჩევანი მასზე, როგორც შოუს თანაწამყვანზე?
- როდესაც დავიწყეთ პაატა ბურჭულაძის საიუბილეო საღამოს დაგეგმვა, ორგანიზატორებს ჩანაფიქრი ჰქონდათ, რომ იუბილარისთვის კონცერტზე უნდა ემღერათ ქალბატონებს, ხოლო წამყვანი მამაკაცი უნდა ყოფილიყო. შემდეგ გაჩნდა მოსაზრება, რომ ამხელა შოუს მხოლოდ ერთი წამყვანი ვერ გაუძღვებოდა და სასურველი იქნებოდა დათუნა ალადაშვილს გვერდით სხვა თანაწამყვანიც ჰყოლოდა, რაც მთავარია ყველასთვის ცნობილი და სიმპათიური უნდა ყოფილიყო. ჩვენ გვყავს აგენტი, რომელმაც მოგვაწოდა იმ ცნობილი მამაკაცების სია, რომლებისთვისაც გვქონდა ჩამოყვანის შეთავაზების შესაძლებლობა. სწორედ ამ სიიდან გამომდინარე შევაჩერეთ არჩევანი ალენ დელონზე.
- როგორი შთაბეჭდილებით დატოვა ალენ დელონმა თბილისი, მოასწრო ქალაქის ღირშესანიშნაობების ნახვა?
- სამწუხაროდ, იქიდან გამომდინარე, რომ სულ დღენახევრით იყო ჩამოსული, ფიზიკურად ვერ მოასწრო ქალაქის დათვალიერება. ჩვენ გვქონდა დაგეგმილი ტური ძველ თბილისში, გვინდოდა ჩვენი ღირშესანიშნაობები გვეჩვენებინა. მისი სურვილი იყო, რომ პატრიარქთან სტუმრობა მოხერხებულიყო. პაატა ბურჭულაძესთან ერთად ესტუმრა და დადებითი შთაბეჭდილებებით დატოვა საპატრიარქო. after party-ზე ხმალი აჩუქეს, თავად კი პაატას სცენიდან happy birthday" უმღერა.
- რატომ გააპროტესტა კონცერტის დროს ეკრანზე მისი ახალგაზრდობისდროინდელი კადრების ჩვენება?
- ეს არ იყო პროტესტი უარყოფით კონტექსტში. უბრალოდ გაგვეხუმრა, ახლა ასაკში ვარ და კონტრასტის ჩვენება რა საჭირო იყოო. რეალურად, ძალიან გაუხარდა და ესიამოვნა იმ კადრების ნახვა.
- საზოგადოების გარკვეული წრეები ალენ დელონის ვიზიტის ხარჯებზე ალაპარაკდა. ნიკა რურუამ Ambebi.ge-ს განუცხადა, რომ მისი ინფორმაციით, ამ ვიზიტისთვის 80 ათას ევრომდე თანხა დაიხარჯა...
- რაც შეეხება ბიუჯეტს, ეს თემა სალაპარაკო არ არის. თანხა მთლიანად "არტ პალასმა" გაიღო, ჩვენ ხომ ხალხის ჯიბეს არ შევხებივართ.
სალომე შიხაშვილი
AMBEBI.GE
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
