მინდია ჯანელიძე - მზად ვართ ყველა კითხვაზე პასუხი გავცეთ, მაგრამ არა შეკვეთილი სიუჟეტების ფორმით

ჩვენ მზად ვართ ყველა კითხვაზე პასუხი გავცეთ, მაგრამ არა თავდასხმებისა და შეკვეთილი სიუჟეტების ფორმით , - ამის შესახებ თავდაცვის მინისტრმა მინდია ჯანელიძემ "მაესტროს ცხრიანის" პირდაპირ ეთერში ჩართვისას განაცხადა.

თავდაცვის მინისტრმა ისაუბრა იმ ცილისმწამებლურ კამპანიაზე, რომელიც მისი თქმით, თავდაცვის სამინისტროს წინააღმდეგ მიმდინარეობს.

"ჯარი არის დეპოლიტიზებული და მისი პოლიტიკაში ჩართვის მცდელობა არის ნაბიჯი უკან ჩვენი შეიარაღებული ძალების მშენებლობის პროცესში. სავარაუდოდ, ამ ძალებს აშფოთებთ ის პროცესები, რაც მიმდინარეობს შეიარაღებულ ძალებში. მიმდინარეობს პროცესები მხოლოდ ოპტიმიზაციის კუთხით, მათ შორის ორგანიზაციული და საკადრო ოპტიმიზაციის კუთხით. შესაბამისად, ამ ძალებს მინდა ვურჩიო, რომ მათ მღელვარების საფუძველი ნამდვილად არა აქვთ. თუ რაიმე საკითხია, ჩვენ ღია ვართ მათთვის. შეგვიძლია მრგვალ მაგიდასთან დავსხდეთ, მოსაზრებები გავცვალოთ. ასეთ რეჟიმში თავდასხმები და მიზანმიმართული კამპანია ყოვლად მიუღებელია პირველ რიგში ჯარისთვის, აქ ჩემს დისკრედიტაციაზე არ არის საუბარი", - განაცხადა მინდია ჯანელიძემ.

"ინტერპრესნიუსი"