19
ივლისიდღის ზოგადი ასტროლოგიური პროგნოზი
მრავალი წელია ფოთის ცენტრალურ პარკს რეაბილიტაცია არ ჩატარებია. იქ არსებული სურათი უცვლელია. მოუწესრიგებელი ინფრასტრუქტურა, მხოლოდ სადღესასწაულო დღეებში ჩართული შადრევანი და ახალგაზრდების ნაკლებობა. Ambebi.ge ფოთის ცენტრალურ პარკში არსებული მდგომარეობით დაინტერესდა.
ფოთის ცენტრალური პარკი ფოთელების თავშეყრის ერთ-ერთი ადგილია, თუმცა მრავალი წელია იქ ვითარება არ იცვლება. პარკში დასვენებისა და გართობისათვის არანაირი პირობა არ არის, ცენტრალურ პარკში ერთი კაფეც არ ფუნქციონირებს. იქ პატარებისთვის არც ატრაქციონებია, სამაგიეროდ შეხვდებით მოუწესრიგებელ ინფრასტრუქტურას, სკამებს, რომლებიც მწყობრიდანაა გამოსული და ახლით ჩანაცვლებას საჭიროებს, ლამპიონებს რომლებიც დაზიანებულია და თავის ფუნქციას არ ასრულებს. ახლგაზრდები ამბობენ, რომ მათი უმრავლესობა პარკში არ დადის და დასვენებას ქალაქგარეთ ამჯობინებს. ცენტრალურ პარკში ერთადერთი შადრევანია, რომელიც მხოლოდ სადღესასწაულო დღეებში ირთვება, დანაგვიანებული შადრევანი უვარგისი საყოფაცხოვრებო ნივთების ნაგავსაყრელადაა ქცეული. ის, რომ ფოთის ცენტრალური პარკი თანამედროვე სტანადარტებს არ აკმაყოფილებს, ამას მისი დირექტორიც არ უარყოფს. რამაზ ქორქია დაფინანსების სიმწირეზე ამახვილებს ყურადღებას და აცხადებს, რომ ბიუჯეტი წელს თითქმის განახევრებულია.
Ambebi.ge-სთან საუბარში რამაზ ქორქია ამბობს, რომ 35 ათასი ლარი, რომელიც ფოთის მუნიციპალიტეტიდან არის გათვალისწინებული, არა თუ პარკის რეაბილიტაციისთვის, არამედ იქ დასაქმებული 12 მუშახელის შენახვისათვის არ არის საკმარისი. რამაზ ქორქია ყვება, რომ შარშან ესპანურმა ჯგუფმა პარკის რეაბილიტაციის პროექტი მოამზადა, რომელიც განსახილველად ეკონომიკის სამინისტროს გადაეცა, თუმცა საკითხი ადგილიდან არ დაძრულა.
"ადგილობრივი მუნიციპალიტეტის პრიორიტეტულ საკითხებში წელს ეზოების კეთილმოწყობა, სანიაღვრე არხებისა და საკანალიზაციო ქსელის მოწესრიგება, ასევე სატუმბი სადგურების რეაბილიტაცია შედის’’,- აცხადებს Ambebi.ge -სთან საუბარში ფოთის მერის მოადგილე გიორგი მოისწრაფიშვილი. იმის მიუხედავად, რომ ფოთის ცენტრალური პარკი კულტურული მემკვიდრეობის ძეგლთა დაცვის ნუსხაშია შესული, ეს იქ არსებულ მდგომარეობაზე ოდნავადაც არ ასახულა. როგორც ირკვევა, მისი რეაბილიტაცია არც ახლო მომავალშია დაგეგმილი.
სოფო კორტავა
AMBEBI.GE
