4
ივნისიდღის ზოგადი ასტროლოგიური პროგნოზი
შინაგან საქმეთა სამინისტროს ანტიკორუფციული სააგენტოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, განსაკუთებით დიდი ოდენობით ქრთამის აღების ფაქტზე, ქალაქ თბილისის მერიის ზედამხედველობის სამსახურის აპარატის უფროსი, 1972 წელს დაბადებული ჯოკია ბოდოკია დააკავეს.
შსს-ს ინფორმაციით, თბილისის მუნიციპალიტეტის მერიის ზედამხედველობის სამსახურის აპარატის უფროსმა ჯოკია ბოდოკიამ ერთ-ერთი კერძო კომპანიის წარმომადგენელს სასტუმროს მშენებლობის ნებართვის გაცემაში დახმარებისა და მშენებლობის პროცესში მფარველობის გაწევის სანაცვლოდ, ქრთამის სახით მოსთხოვა სასტუმროს მშენებლობის ღირებულების 10% – 180 000 აშშ დოლარი, საიდანაც წინასწარ ქრთამის სახით აიღო მოთხოვნილი თანხის ნაწილი – 50 000 აშშ დოლარი.
როგორც დაკავებული ჯოკია ბოდოკიას შესახებ თბილისის მერობის ყოფილი კანდიდატი ნიკა მელია აცხადებს, ბოდოკიას თბილისის მერთან, დავით ნარმანიასთან ახლო მეგობრობა აკავშირებს და ამასთან, ის ნასამართლევია.
"თვეების წინ ვაპროტესტებდით ჯოკია ბოდოკიას თბილისის მერიაში თანამდებობაზე დანიშვნას!
ვაპროტესტებდით არა იმიტომ, რომ ნარმანიას უახლოესი მეგობარი და თანასოფლელი იყო, არამედ იმიტომ, რომ 2010 წელს მძიმე დანაშაულისთვის იყო ნასამართლევი!
არა მგონია ვინმე თვლიდეს, რომ ჯოკია ბოდოკიამ 180 000 აშშ დოლარი დამოუკიდებლად აიღო და მისი უშუალო ხელმძვანელობა - ზედამხედველობის სამსახურის უფროსი გეგი ნიჟარაძე და მისი მოადგილე დავით მედულაშვილი საქმის კურსში არ იყვნენ!
სამწუხაროდ, ეს ხალხი საშოვარზეა მოსული! მათ არ გააჩნიათ უკეთესი ხვალინდელი თბილისის არც ხედვა და არც უნარი!", - წერს მელია "ფეისბუქის" ოფიციალურ გვერდზე.
შეგახსენებთ, რომ გამოძიება განსაკუთრებით დიდი ოდენობით ქრთამის აღების ფაქტზე მიმდინარეობს (საქართველოს სისხლის სამართლის კოდექსის 338-ე მუხლის მე-3 ნაწილის "ე" ქვეპუნქტით, რაც სასჯელის სახით 11-დან 15 წლამდე თავისუფლების აღკვეთას ითვალისწინებს). "დედაქალაქის მერია მზად არის გამოძიებასთან ითანამშრომლოს", - ამის შესახებ თბილისის მერმა დავით ნარმანიამ საგანგებო ბრიფინგზე განაცხადა, სადაც ზედამხედველობის საქალაქო სამსახურის აპარატის უფროსის, ჯოკია ბოდოკიას დაკავების ფაქტს გამოეხმაურა [მეტი].
