"დაცვამ მითხრა, ყველაფერი გავაკეთეთ ზურაბის ღირსების შესანარჩუნებლადო და პირჯვარი გადაისახა" - პოლიტიკოსები ჟვანიას საქმის სკანდალურ, გაუხმაურებელ დოკუმენტზე

გრძელდება გამოხმაურებები ჟვანიას საქმეში არსებულ დოკუმენტზე, რომელიც გასაიდუმლოებული იყო და მისი არსებობის შესახებ საზოგადოებამ "რუსთავი 2"-ს თოქშოუ "არჩევანის" საშუალებით შეიტყო. როგორც გადაცემაში იყო ნათქვამი, დოკუმენტში წარმოდგენილია FBI-ს დასკვნები, რომელშიც მითითებულია, რომ ზურაბ ჟვანიასა და რაულ უსუპოვის დნმ-ის კვალი რამდენიმე განსხვავებული ტიპის ნივთზეა აღმოჩენილი. მათ შორის, არის არა მარტო ჭიქა და სიგარეტის ნამწვავი. დნმ-ის კვალი ასევე აღმოჩენილია ხალათებსა და ზეწარზეც.

დოკუმენტის გასაჯაროების შემდეგ ცნობილი ადამიანების გარდა, [მეტი] შეფასებებს პოლიტიკური ფიგურებიც აკეთებენ.

პარლამენტის თავმჯდომარის, დავით უსუფაშვილის განცხადებით, მნიშვნელოვანია, რომ ყოფილი პრემიერ-მინისტრის, ზურაბ ჟვანიას საქმეზე სპეკულაციები რაც შეიძლება მალე დასრულდეს.

როგორც უსუფაშვილმა გოგლა ჟვანიას მიერ გუშინ გაკეთებულ განცხადებაზე კომენტირებისას ჟურნალისტებს განუცხადა, ისურვებდა, რომ

პროცესი მართლმსაჯულების ჩარჩოებში დარჩეს და ნაკლებად ხდებოდეს მისი გარჩევა "სხვაგან".

"ძალიან მნიშვნელოვანია ყველა საქმის დროული გახსნა ან იმის თქმა, რომ ესა თუ ის საქმე ახლა ვერ იხსნება ან კიდევ იმის თქმა, რომ არაფერია გასახსნელი. ძალიან მნიშვნელოვანია, რომ სპეკულაციები ამ ტიპის საქმეებზე რაც შეიძლება მალე დასრულდეს. დიახ, არის რთული საქმეები, რომელთა გამოძიებას სჭირდება წლები, მაგრამ მე ვისურვებდი, რომ თუ დრო არის საჭირო რაიმეს გასარკვევად, ამ დროის განმავლობაში იყოს რაც შეიძლება ნაკლები სპეკულაცია, იყოს რაც შეიძლება ნაკლები დებატები, რომელიც ჩრდილს აყენებს ბევრ ადამიანს, რომელიც არის ძალიან მტკივნეული და რთული გადასატანი გარდაცვლილის, მოკლულის, თუ დაზარალებულის ახლობლებისთვის. ზოგადად მე ვისურვებდი, რომ ეს პროცესები იყოს მეტად მართლმსაჯულების ჩარჩოებში და ნაკლებად ხდებოდეს მისი გატანა სხვაგან გასარჩევად", - აღნიშნა უსუფაშვილმა.

ასევე დაგაინტერესებთ| გოგლა ჟვანია FBI-ს გასაიდუმლოებულ დოკუმენტზე

"თავისუფალი დემოკრატების" შეფასებით, ყოფილი პრემიერ-მინისტრის, ზურაბ ჟვანიას გარდაცვალების საკითხი ძალიან საფრთხილო საქმეა.

როგორც დღეს ჟურნალისტებს "თავისუფალი დემოკრატების" ერთ-ერთმა ლიდერმა ირაკლი ჩიქოვანმა განუცხადა, ამ საკითხს დეტალური გამოძიება სჭირდება.

"თუ არსებობს ეჭვი, რომ რაიმე არის გამოუძიებელი, რა თქმა უნდა, ეს საკითხი უნდა იქნეს გამოძიებული. ჩვენ მომხრე ვართ ამ გამოძიების, მაგრამ ვფიქრობთ, რომ პოლიტიკური შეფასებებისგან ყველამ თავი უნდა შეიკავოს. საქმე გვაქვს ადამიანურ ტრაგედიასთან, მაგრამ ამასთან, ყველა კითხვას უნდა გაეცეს პასუხი, უნდა დაველოდოთ გამოძიების შედეგებს და მერე გავაკეთოთ კომენტარები", - განაცხადა ჩიქოვანმა.

ასევე დაგაინტერესებთ| "დაესხით თავს მიცვალებულს, ჟვანია გადაგიყოლებთ თქვენ!" - ხათუნა ხოფერიას მწვავე ემოციური პოსტი "ნაციონალებს"

არ მაქვს საფუძველი ჟვანიას გარდაცვალებასთან დაკავშირებით ოფიციალურ, ან FBI-ის დასკვნაში ეჭვი შევიტანო, - ამის შესახებ ჟურნალისტებს ყოფილმა დეპუტატმა პეტრე მამრაძემ განუცხადა.

როგორც მამრაძემ აღნიშნა, ჟვანიას გარდაცვალების შემდეგ მას არაერთი უცხოელი დიპლომატი ესაუბრა და ყველა კმაყოფილებით აღნიშნავდა, რომ მთავრობამ პირველივე წუთიდან შესაბამისი მასალების გაცნობის და გამოძიებაში FBI-ს ჩართვის საშუალება მისცა მათ.

"მათი აზრით, ეს იყო უბედური შემთხვევა. ეს მოხდა იქ და არა სხვაგან. წლების განმავლობაში ვამბობდი, რომ იოტისოდენა საფუძველიც არ მაქვს იმისა, ეჭვი შევიტანო იმაში, რომ ეს არის უბედური შემთხვევა. კონფიდენციალურად რა თქმა უნდა, მეუბნებოდნენ დნმ-ის შესახებაც. ჩემთვის სიურპირიზი იყო, როდესაც ირაკლი ბათიაშვილმა ტელევიზიით განაცხადა, რომ ზურაბ ჟვანიას ასეთი კონფიდენციალური ბინები ყოველთვის ჰქონდა და მათ ცვლიდა. ამის შესახებ ვკითხე იმ ადამიანებს ზურას გარემოცვიდან, ვისაც ეს უნდა სცოდნოდათ და მათაც დამიდასტურეს", - განაცხადა პეტრე მამრაძემ.

იგი სრულიად დარწმუნებულია ზურაბ ჟვანიას დაცვის წევრების, ხარშილაძისა და ძაძამიას უდანაშაულობაში და აცხადებს, რომ ისინი არიან უდანაშაულოები ყველაფერში გარდა იმისა, რომ ბრძანების მიღების შემდეგ, ადგილზე არსებული ვითარების ფალსიფიცირებას შეუდგნენ.

ასევე დაგაინტერესებთ| "შეწყვიტეთ მასკარადი" - თამარ ჩერგოლეიშვილი ჟვანიას პირადი ცხოვრების შესახებ გავრცელებულმა დეტალებმა გააღიზიანა

მამრაძე მოუწოდებს ხარშილაძეს და ძაძამიას, ასევე ყოფილ ვიცე პრემიერს, გიორგი ბარამიძეს დაკითხვას არ დაელოდონ და დეტალურად მოყვნენ ის სიტუაცია და ის ვითარება, რაც მათ ბინაში დახვდათ.

მისივე თქმით, ზურაბ ჟვანიას მამა, ბესარიონ ჟვანია რომ ცოცხალი ყოფილიყო, ის მთელს საქართველოს ფეხზე დააყენებდა და არ დაუშვებდა, რომ უდანაშაულო ადამიანები ტყუილუბრალოდ გაწვალებულიყვნენ ამ საქმის გამო.

"ამ ამბის შემდეგ, როდესაც ძაძამია შემხვდა, მან მითხრა ასეთი სიტყვები: მინდა იცოდეთ, რომ ყველაფერი გავაკეთეთ ბატონი ზურაბის ღირსების შესანარჩუნებლად და პირჯვარი გადაისახა. მოვუწოდებ მას მოყვეს, რა იყო ის აბსურდული სიტუაცია, რომელიც დახვდა ბინაში", - განაცხადა პეტრე მამრაძემ.

მომზადებულია "ინტერპრესნიუსი"-ს მასალების მიხედვით.

სიახლე!

თუ დაინტერესებული ხართ მხოლოდ საზოგადოებრივი თემებით და არ გსურთ, მიიღოთ სხვა, თქვენთვის უინტერესო ინფორმაცია, მოიწონეთ გვერდი