"შეიძლება დაჩიმ უნებურად ვიღაცის პირადი ცხოვრების შესახებ იცოდა..." - ვინ მფარველობს დაჩი დარჩიას მკვლელს

მოკლული დიჯეის, დაჩი დარჩიას ოჯახის წევრები და ახლობლები მკვლელობის რეალური მოტივის დადგენას მოითხოვენ და აცხადებენ, რომ მკვლელის, მიხეილ გრძელიშვილის დაცვის მხარე ცდილობს, რომ მოტივად წარმოაჩინოს თითქოს დაჩი დარჩიამ მიაყენა შეურაცხყოფა გრძელიშვილს, რის შემდეგაც მოხდა დაპირისპირება და მკვლელობა. შეყრილაძის განცხადებით, რჩება შთაბეჭდილება, რომ გამოძიება იჩენს გულგრილობას და ცდილობს, მომხდარში დაჩი დარჩია დაადანაშაულოს. ჟურნალი "სარკე" დაჩი დარჩიას დედას, ლილი შეყრილაძეს ესაუბრა. Ambebi.ge გთავაზობთ მცირე ფრაგმენტს "სარკეში" გამოქვეყნებული ინტერვიუდან:

"სარკე": ბარის შიდა ვიდეოჩანაწერებში რა ჩანს?

ლილი შეყრილაძე: ის ვიდეოჩანაწერი დაჩის სიკვდილიდან ერთი კვირის შემდეგ ნახეს. გამორიცხული არ არის, რომ დაამონტაჟეს. ვფიქრობ, გამოსასვლელში კონფლიქტი მოხდა ბარის ადმინისტრაციასა და გრძელიშვილის თანმხლებ პირს შორის. შეიძლება იმ კონფლიქტის დროს დაჩიმ შემრიგებლური ტონით რამე თქვა, შეიძლება სულ სხვა საიდუმლო იმალება. დაჩი რეჟისორი იყო, ბევრ ხალხთან ჰქონდა ურთიერთობა. შეიძლება უნებურად ვიღაცის პირადი ცხოვრების შესახებ იცოდა, რაღაცას ყური მოჰკრა, რაღაც დაინახა და არ ენდობოდნენ.

თავისთავად ყველაფერი იმისკენაა მიმართული, რომ მკვლელს მფარველი ჰყავს. ცდილობენ, დაჩის დააბრალონ შეურაცხყოფის მიყენება და მკვლელობის მიზეზი შეთხზან, რომ სანამ გრძელიშვილს პატიმრობაში ყოფნა მოუწევს, ციხეში, მათი კანონებით, ხელშეუხებელი იყოს.

დაჩი პოეტური სულის გახლდათ. ადამიანს სულს ულამაზებდა საკუთარი ლექსით ან მუსიკით. ჩემი შვილი არასოდეს ყოფილა დაინტერესებული ქუჩური ცხოვრებით, ქუჩაში ორი წუთითაც არ ჩერდებოდა. უკონფლიქტო პიროვნება იყო. არც სხვის პირად ცხოვრებაში იჭრებოდა. ამიტომ ჩნდება კითხვა - რატომ მოკლეს?

"სარკე": გრძელიშვილი რას ამბობს ჩვენებაში?

ლილი შეყრილაძე: ადვოკატის ნათქვამს იმეორებს, ადვოკატი მართავს. გრძელიშვილის თქმით, დაჩიმ მას ქუჩაში შეურაცხყოფა მიაყენა და ამიტომ მოკლა. ეს თუ სიმართლეა, ღამის 3 საათზე ერთ ადგილზე მომლოდინე ადამიანი არ იქნებოდა დაფიქსირებული ვიდეოჩანაწერში. ის დაჩის ელოდებოდა და მკვლელობა განზრახული ჰქონდა. ადვოკატი ამბობს, რომ ის აფექტში იყო და ჩადენილი საქციელი ინანა, მაგრამ ეს არ არის სიმართლე. თუ ინანა, უკან რატომ მიბრუნდებოდა და სასიკვდილო ჭრილობას რატომ მიაყენებდა? გრძელიშვილს არ უნდოდა, რომ დაჩი ცოცხალი დარჩენილიყო. საუბედუროდ, ამას ვერ ვამტკიცებ.

"სარკე": კონკრეტულად ვისზე გაქვთ ეჭვი, რომ მკვლელს მფარველობს?

ლილი შეყრილაძე: გამწარებული დედა კი ვარ, მაგრამ უფლება არ მაქვს, მხოლოდ ეჭვის საფუძველზე რაიმე ვთქვა. ამ ადამიანებზე ხომ დაწერეს ჟურნალისტებმა.

"სარკე": ეკა ბესელიას შვილს გულისხმობთ?

ლილი შეყრილაძე: დიახ. ამის შესახებ ტელევიზიაში, პრესაში, ყველგან ისაუბრეს.

სიახლე!

თუ დაინტერესებული ხართ მხოლოდ საზოგადოებრივი თემებით და არ გსურთ, მიიღოთ სხვა, თქვენთვის უინტერესო ინფორმაცია, მოიწონეთ გვერდი