ირაკლი ღარიბაშვილი - ჩვენ დავუმტკიცეთ აფხაზებს და ოსებს, რომ მათთან მშვიდობიანი თანაცხოვრება გვინდა

ჩვენ ვაჩვენეთ და დავუმტკიცეთ აფხაზებს და ოსებს, რომ მათთან მშვიდობიანი თანაცხოვრება გვინდა, - ამის შესახებ საქართველოს პრემიერ-მინისტრმა ირაკლი ღარიბაშვილმა მიუნხენის უსაფრთხოების კონფერენციაზე განაცხადა.

პრემიერმა პოლიტიკური ნების ნაკლებობაზე ისაუბრა, რომლის არსებობის შემთხვევაში, პრობლემების მოგვარება შესაძლებელია.

"გასული ორი წლის განმავლობაში ჩვენ გამოვხატეთ ჩვენი ნება, დაგვერეგულირებინა ურთიერთობა რუსეთთან და კარგი მეგობრები გავმხდარიყავით. ხელისუფლებაში მოსვლის პერიოდიდან ჩვენ რუსეთისთვის არანაირი საბაბი არ მიგვიცია, საქართველო რაიმე სახის პროვოკაციაში დაედანაშაულებინა. რუსეთის მხრიდან ჩვენს კონსტრუქციულ და მეგობრულ პოლიტიკას კი იმავე სულისკვეთებით არ უპასუხეს. მათ ააგეს 60 კმ-იანი მავთულხლართების ღობე. ბერლინის კედელი დაინგრა 25 წლის წინ და ახლა, 21-ე საუკუნეში, ჩვენს ტერიტორიაზე ვახდენთ რაღაც გამყოფი ხაზების აღდგენას. მრავალმა ქართულმა ოჯახმა დატოვა სახლ-კარი ამ ბარიერის მიღმა. ეს ჩვენს შორის ნდობას ვერ აღადგენს. ვერავინ წარმოიდგენდა, რომ რუსეთი მოახდენდა ყირიმის ანექსიას, თუნდაც იმიტომ, რომ ყირიმის ანექსიით რუსეთმა ფაქტობრივად უკრაინა და უკრაინელები დაკარგა. როგორ უნდა აღადგინო ხალხის და ქვეყნის ნდობა, როცა მათ ტერიტორიას ანექსიას უკეთებ?!", - განაცხადა პრემიერ-მინისტრმა.

სესიის მედიატორის კითხვას, ფიქრობს თუ არა, რომ რუსეთი რეგიონში წინასწარ ჩაფიქრებულ პოლიტიკას ახორციელებს, საქართველოს მთავრობის მეთაურმა უპასუხა, რომ რუსეთის ქმედებები ამაზე მიუთითებს.

ჩვენ ვთავაზობთ ჩვენს აფხაზ და ოს ძმებს ევროპულ მომავალს, წარმატებულ და განვითარებულ საქართველოს, მართლაც დემოკრატიულ და ევროპულ სახელმწიფოს, - აღნიშნა პრემიერ-მინისტრმა.

პრემიერს დაუსვეს კითხვა, რით არის საქართველო მიმზიდველი აფხაზებისა და ოსებისთვის და რით სჯობს ხელისუფლების შეთავაზება ამჟამინდელ სტატუს-კვოს, რათა განხორციელდეს მდგომარეობის ნორმალიზაცია.

ირაკლი ღარიბაშვილის განცხადებით, უპირველეს ყოვლისა, ახალი ე.წ შეთანხმებები მოკავშირეობისა და ინტეგრაციის შესახებ ნიშნავს აფხაზეთისა და ე.წ სამხრეთ ოსეთის უფრო ინტენსიურ ინტეგრაციას რუსეთის ფედერაციაში, მაშინ, როდესაც საქართველო აფხაზ და ოს ძმებს ევროპულ მომავალს სთავაზობს.

"ასოცირების ხელშეკრულება არის ჩვენი ქვეყნის მოდერნიზაციისა და ევროპეიზაციის გენერალური გეგმა. ამჟამად ჩვენ ვმუშაობთ ვიზების ლიბერალიზაციის სამოქმედო გეგმაზე. ვვარაუდობთ, რომ მივიღებთ ევროკომისიის დადებით შეფასებას. ვემზადებით რიგის სამიტისთვის, რომელიც დაგეგმილია მაისში. მაგალითად, თუ საქართველოს მოქალაქეებს ექნებათ ევროპაში უვიზო მიმოსვლის შესაძლებლობა, ეს იქნება კიდევ ერთი მიმზიდველი ფაქტორი აფხაზებისა და ოსებისთვის. დღეს ისინი, სამწუხაროდ, სრულიად იზოლირებულნი არიან ცივილიზებული სამყაროსგან. მე ძალიან შემტკივა გული აფხაზებისა და ოსების ხვალინდელ დღეზე, რადგანაც ღრმად მწამს, რომ მათ არ აქვთ კარგი მომავალი ქართველების გარეშე, ჩვენ გარეშე. ხსენებულ შეთანხმებებს კი ჩვენ განვიხილავთ, როგორც ჩვენი ტერიტორიების ანექსიისკენ გადადგმულ კიდევ ერთ ნაბიჯს", - განაცხადა ირაკლი ღარიბაშვილმა.

პრემიერის თქმით, აფხაზები და ოსები მამაცი ხალხია. "ჩვენ გვიყვარს ეს ხალხი, ეს ეთნიკური ჯგუფები და ჩვენი სურვილია, დავიცვათ ისინი და გადავარჩინოთ მათი მომავალი. ჩემი აზრით, ევროპული პერსპექტივა არის ერთ-ერთი მომხიბვლელი ფაქტორი აფხაზებისა და ოსებისთვის: უკეთესი განათლება, ჯანდაცვა, სოციალური პირობები, ღია საქართველო, წარმატებული საქართველო - აფხაზებსა და ოსებთან ერთად! ჩვენ მზად ვართ მყისიერი შერიგებისთვის ჩვენს დებთან და ძმებთან, სწორედ ასე მოვიხსენებ მე მათ - აფხაზებსა და ოსებს, რადგანაც ჩვენ ერთად ვცხოვრობთ. ეს ჩვენი ისტორიაა. ეს არის ძალიან ბუნებრივი თანაარსებობა. ჩვენ უნდა შევრიგდეთ. მშვიდობას ალტერნატივა არ აქვს", - განაცხადა პრემიერ-მინისტრმა და იმედი გამოთქვა, რომ დადგება დღე, როდესაც მიუნხენში შედგება შეკრება შერიგების აღსანიშნავად.

"ინტერპრესნიუსი"