12
ივნისიდღის ზოგადი ასტროლოგიური პროგნოზი
პროკურატურამ ე.წ. კორტების სპეც-ოპერაციის საქმე გახსნა. საქმეზე შსს-ს მაღალჩინოსნები და სპეც-რაზმელები დააკავეს. დაკავებულია კრიმინალური პოლიციის მაშინდელი ხელმძღვანელი ირაკლი ფირცხალავა, რომელიც კორტების სპეც-ოპერაციას ხელმძღვანელობდა. რამდენიმე კვირის წინ კორტების სპეც-ოპერაციის დროს, დაღუპული ზურაბ ვაზაგაშვილის მამა, სოფელ ყარაფილაში, შვილის საფლავზე ააფეთქეს. იური ვაზაგაშვილი აფეთქებამდე ბიძინა ივანიშვილთან იმყოფებოდა შეხვედრაზე. ინფორმაცია, ლიკვიდაციის შესახებ ვაზაგაშვილს და ბუტა რობაქიძის მშობლებს ჰქონდათ, ისინი ამაზე პრესაშიც საუბრობდნენ.
გავრცელებული ინფორმაციით, იმ დღეს, როცა ვაზაგაშვილი შვილის საფლავზე ააფეთქეს, ის საქმის მთავარ მოწმეს უნდა დაკავშირებოდა, რომელიც უკრაინაში ცხოვრობს. ექსპერტ მაია ნიკოლეიშვილს იური ვაზაგაშვილის მკვლელობის შესახებ ახალი დეტალები არ აქვს, თუმცა მიიჩნევს, რომ მამის შვილის საფლავზე აფეთქება ე.წ. კორტების სპეც-ოპერაციასთან კავშირშია.
- იური ვაზაგაშვილი იყო სამართლიანობასთან ბრძოლის სიმბოლო, მან, ფაქტობრივად, იცოდა მისი შვილის მკვლელობის საქმის ყველა დეტალი. უბრალოდ ინფორმაცია, რომელიც გუშინ გაავრცელა პროკურატურამ, მანამდე იმიტომ ვერ გახმაურდებოდა, რომ რაღაც სამუშაოები იყო ჩასატარებელი. ვფიქრობ, რომ მისი შვილის მკვლელობა და ეს ტერორისტული აქტი კავშირშია ერთმანეთთან, მაგრამ არ მგონია იური ვაზაგაშვილზე განხორციელებული ტერაქტი, იმ პირების გაკეთებული იყოს, ვინც გუშინ დააკავეს კორტების სპეც-ოპერაციის საქმეზე. ყველა ვერსიით, თუ რამე დაემართებოდა იური ვაზაგაშვილს, პირველი, ვისზეც ეჭვი გაჩნდებოდა, ეს იქნებოდა ირაკლი ფირცხალავა. ამიტომ ვფიქრობ, რომ მისი გაკეთებული არაა. იური ვაზაგაშვილს საშიში ცნობადობა და დიდი ნდობა ჰქონდა, ამ შემთხვევაში მისი ლიკვიდაცია მიზნად ისახავდა საზოგადოების დაშინებას და იმ პროცესების პროვოცირებას, რომელიც შეიძლება მოყოლოდა ან დაგეგმილი ყოფილიყო. ამ ფორმით უკავშირდება მისი შვილის საქმეს.
- თქვენი აზრით, ვისი გაკეთებულია ეს საქმე, სპეც-სამსახურების?
- შეიძლება მკვლელობა ბევრმა ჩაიდინოს, მაგრამ აფეთქებას პროფესიონალები გეგმავენ და ასრულებენ. თან ეს იყო ისეთი დაგეგმილი, რომელიც ცხელ კვალზე არ გაიხსნა. ვისზე შეიძლება იფიქრო, თუ არა სპეც-სამსახურებზე?
- ამბობენ, რომ შემსრულებელმა საქართველო დატოვა, თქვენ რა ინფორმაცია გაქვთ ამის შესახებ?
- მაგას ვერ ვიტყვი. ეს იყო მამუკა არეშიძის ვარაუდი, რადგან ასეთი საქმის შემსრულებლები ქვეყანას ტოვებენ. კარგმა ანალიტიკურმა სამსახურმა უნდა დაადგინოს, ვინ შეიძლება იყოს ამის სპეციალისტი საქართველოში, ეს არაა ის საქმე, რასაც ინტერნეტით ისწავლი. უნდა დადგინდეს პირთა წრე, ვინ შეიძლება ფლობდეს ამ დონეზე დივერსიული აქტების მოწყობის ცოდნას.
- ხელისუფლებას აკრიტიკებენ იმის გამო, რომ იური ვაზაგაშვილის მკვლელობა დროულად არ გამოიძია, თქვენი აზრით, დაგვიანებულია საქმის გამოძიება?
- გახსნა დაგვიანებული არაა. თუ ცხელ კვალზე გაიხსნებოდა, დავრწმუნდებოდით, რომ პროფესიონალი არ მუშაობდა ამაზე. ეს კიდევ უფრო მარწმუნებს, რომ პროფესიონალის შესრულებულია. ამ ტერორისტულმა აქტმა საზოგადოებას დაუბრუნა შიში, ამის უარყოფა არ შეიძლება. ამის მიუხედავად, არ გამოვრიცხავ, ეს იმ ადამიანების დაგეგმილი იყოს, ვისაც უკრაინულ ბირთვს უწოდებენ. ის ადამიანები, ვინც იმუქრება, ხვალ ან ზეგ ამას მოვაწყობო. არეულობის დაგეგმვის წინ სწორედ ასეთი ტერორისტული აქტები იგეგმება, რაც საზოგადოების დაშინებას და სიმბოლოების მოკვლას ისახავს მიზნად. ეს პირდაპირ ჯდება ტაქტიკაში. არ გამოვრიცხავ ეს დაგეგმილი იყოს ქვეყნის გარეთ, იმ ხალხის მიერ, ვინც რევანშს გეგმავს, ყოველ ნაბიჯზე გვესმის მუქარები, მათ შორის "ფეისბუქზე". დამგეგმავმაც კი გაწირა ფირცხალავა, თუ ის ხვალ რაღაც ჩვენებებს მისცემს, უკვე მოშორებულია. ის თავისიანების გაწირულია, ამ ტერორისტული აქტით, ფირცხალავაზე უარი თქვა მისმა მოკავშირემ.
თამარ ბოჭორიშვილი
AMBEBI.GE
ს
იახლე!
თუ დაინტერესებული ხართ მხოლოდ საზოგადოებრივი თემებით და არ გსურთ, მიიღოთ სხვა, თქვენთვის უინტერესო ინფორმაცია,მოიწონეთ გვერდი
