"მალე მთაწმინდის პანთეონიდან კუბოებსაც ამოყრის" - ნათია ფანჯიკიძე "პანორამა თბილისს" უპირისპირდება

თავდაცვის ყოფილი მინისტრის ირაკლი ალასანიას მეუღლე, ნათია ფანჯიკიძე "პანორამა თბილისის" პროექტს უპირისპირდება.

"გთხოვთ!! გადავარჩინოთ (შევეცადოთ მაინც) თბილისი გლახა ბატონებისგან და ტყუილისგან, თითქოს ეს ხალხის საკეთილდღეოდ კეთდება.

ვიხსნათ ეს საწყალი ქალაქი ფარული და ამავდროულად აშკარა მტრობისგან.

თუ სიკეთე უნდათ, განავითარონ თბილისის სხვა უბანი, სხვა ქალაქი თუნდაც..

ბოტანიკური ბაღი ხომ უკვე გადაყლაპა და მალე მთაწმინდის პანთეონიდან კუბოებსაც ამოყრის, მოგეხსენებათ, დამრწმუნებელი არ აკლია, რომ ილია ჭავჭავაძეა (კიდევ კარგი, შალვა ნუცუბიძის, დიმიტრი უზნაძის და სხვა დიდი მოაზროვნეების შესახებ ჯერ არაფერი გაუგიათ მეხოტბეებს).

ნუ იპასიურებთ ხალხო. გამორიცხული არაა, რომ მაინც თავისი გაიტანონ, როგორც სააკაშვილს ვერ ვთოკავდით, მაგრამ მცდელობა აუცილებელია, რომ თანამონაწილეობას მაინც ავერიდოთ და ქალაქის მიმართ სინდისის ქენჯნა არ გვქონდეს ჩვენივე უმოქმედობის გამო.

მე ჩემი მინიმუმი გავაკეთე - მოვაწერე პეტიციას ხელი", - წერს ნათია ფანჯიკიძე "ფეისბუქის" პირად გვერდზე.

პროექტის წინააღმდეგ პეტიციას უკვე 2500-ზე მეტმა ადამიანმა მოაწერა ხელი.

საქართველოს თანაინვესტირების პროექტის "პანორამა თბილისი" განხორციელება ქალაქის ისტორიულ ნაწილში - სოლოლაკის ქედზე, თავისუფლებისა და ერეკლეს მოედნების ტერიტორიაზე იგეგმება.

მშენებლობა ჯერ არ დაწყებულა, თუმცა პროექტის ირგვლივ ვნებათაღელვა არ წყდება. არასამთავრობო ორგანიზაციები და მწვანე მოძრაობები კატეგორიულად ეწინააღმდეგებიან ძველი თბილისის ისტორიულად მნიშვნელოვან ტერიტორიაზე დაგეგმილ მშენებლობას და ქალაქის იერსახის დაცვას ცდილობენ.

იხილეთ ასევე: "პანორამა თბილისი" თუ იუნესკოს სიაში მოხვედრის შანსი - პროექტი, რომელიც საზოგადოების დაპირისპირების მიზეზი გახდა