როგორ უნდა ვიკვებოთ სამსახურში და რა ვჭამოთ, რომ ვარჯიშმა შედეგი გამოიღოს - ქართველი ენდოკრინოლოგის რჩევები

თანამედროვე ცხოვრების წესი ადამიანის გარეგნობაზეც აისახება. როგორ უნდა ვიკვებოთ სამსახურში და რა ტიპის პროდუქტს მივანიჭოთ უპირატესობა, ვარჯიშმა შედეგი რომ გამოიღოს, ამის შესახებ ენდოკრინოლოგიის ეროვნული ინსტიტუტის ხელმძღვანელი ელენე გიორგაძე გვესაუბრება.

- როგორ ვიკვებოთ სწორად სამსახურში?

- ეს დღეს საკმაოდ რთული პრობლემაა, რადგან ყოველთვის არის დროის პრობლემა და ჯანსაღი საკვებისთვის 21-ე საუკუნის საქმიანი ადამიანი ვერ იცლის. მიუხედავად იმისა, რომ განვითარებულია ყველა სახის ელექტროტექნიკა და სოციოლოგიური წვდომა, მაინც დროის უკმარისობაა. ასევე ძალიან დიდ როლს თამაშობს სწრაფი კვების ობიექტების სწრაფი გავრცელება. ეს ხელს უწყობს საბოლოო ჯამში, ჭარბი წონის ან სიმსუქნის ჩამოყალიბებას, გამორჩეულად მაღალკალორიული საკვების გამო, რასაც დღეს უკვე მიხვდა ამერიკა და დაიწყო პრევენციული ღონისძიებების გატარება. სიმსუქნის მაჩვენებელი, მით უმეტეს ბავშვებში, საბოლოო ჯამში დიდ ზეგავლენას ახდენს ქვეყნის სოციო-ეკონომიურ მდგომარეობაზე, თუმცა არჩევანის გაკეთება ჩვენ ყოველთვის შეგვიძლია. ალბათ, დამეთანხმებით, რომ სწრაფი კვების ნაწარმის ან ნებისმიერი ცომეულის მირთმევას სჭირდება ზუსტად იგივე დრო, რაც ხილის ან ნებისმიერი რძის პროდუქტის მირთმევას, რაც ბევრად უფრო სასარგებლოა ორგანიზმისათვის. ასევე თუ ჩვენი სამსახური დილიდანვე იწყება აქტიური გონებრივი თუ ფიზიკური დატვირთვით, უმჯობესია ჩვენი საუზმე იყოს ამ დროს ნოყიერი, ხოლო სამსახურში წავიხემსოთ ხილით, ან მივირთვათ ხაჭო-იოგურტი.

- რომელი საკვების მიღებაა რეკომენდებული?

- ადამიანის ორგანიზმში უნდა შევიდეს ყველა სახის საკვები კომპონენტები: ცხიმები, ცილები, ნახშირწყლები, მიკრო-მაკროელემენტები, ვიტამინები და აუცილებლად წყალი. ბუნებაში არ არსებობს უნივერსალური პროდუქტი, რომელიც ყველა ამ მოთხოვნას დააკმაყოფილებს. შესაბამისად, ჩვენ დღის განმავლობაში უნდა მივირთვად ბალანსირებულად. უნდა მოხდეს ორგანიზმისთვის სრულად ყველა ამ კომპონენტის მიწოდება და საბოლოო ჯამში, ნივთიერებათა ცვლის ნორმალური ფუნქციონირება. აუცილებელია დღის განმავლობაში მივირთვათ, როგორც ხორცის, რძის და ბურღულეულის პროდუქტები, ასევე ხილი და ბოსტნეული, უბრალოდ ამ ყველაფერში უნდა დავიცვათ ზომიერება და ბალანსი.

- რა პროდუქტებია რეკომენდებული იმ ადამიანისთვის, ვისაც ახალი დაწყებული აქვს ვარჯიში და სურს დროულად ჩადგეს ფორმაში?

- როდესაც ფიზიკურ აქტივობას ვიწყებთ, რა თქმა უნდა, ამ დროს აუცილებელია კვებაც იყოს სწორი და ჯანსაღი, რადგან მივიღოთ სრული ეფექტი ფიზიკური აქტივობიდან. სწრაფი ტემპით დატვირთვა დასაწყის პერიოდში არ შეიძლება, რადგან ეს ორგანიზმისთვის სტრესია და უნდა მოხდეს ამასთან ადაპტაცია. ასევე, არ არის რეკომენდებული წონის სწრაფი კლება. ფიზიკური აქტივობისას უნდა განვსაზღვროთ რამდენ კკალ-იას ვხარჯავთ და იმის მიხედვით უნდა მოხდეს კკალ-იების მიღება საკვები სახით. ვარჯიშის დროს სასურველია, საკვები მდიდარი იყოს ცილოვანი პროდუქტებით, რადგან არ მოხდეს კუნთის მოდუნება (სწრაფი დაღლა). ასევე აუცილებელია სითხის მიღება, რადგან ვარჯიშისას გააქტიურებული ნივთიერებათა ცვლის შემდგომ, დარჩენილი შლაკების და ტოქსინები გამოდევნა მოხდეს ორგანიზმიდან.

თამარ ბოჭორიშვილი

AMBEBI.GE