ბათუმის უნივერსიტეტში ეპილეფსიით დაავადებული ახალგაზრდის მოშორებას ცდილობენ? - დისკრიმინაციის ბრალდება და რექტორის პასუხი

ეპილეფსია არის დაავადება, რომელიც ხასიათდება სპონტანურად აღმოცენებული გულყრის პროცესით. ეს დაავადება აწუხებდათ ისეთ ცნობილ ადამიანებს, როგორებიც არიან: იულიუს კეისარი, ალექსანდრე მაკედონელი, ნოსტრადამუსი, პეტრე I, ნაპოლეონ ბონაპარტე, სტენდალი, ვინსენტ ვან გოგი, თეოდორ დოსტოევსკი, გუსტავ ფლობერი, ალფრედ ნობელი... თუმცა ამ დაავადებას ხელი არ შაუშლია ამ ხალხისთვის, პოტენციალი სრულად გამოევლინათ. დღესაც ვხვდებით ისეთ ადამიანებს, რომლებსაც ამ დაავადების გამო, თვითრეალიზების საშუალებას არ აძლევენ. Ambebi.ge-ს დაუკავშირდა ბათუმის სახელმწიფო უნივერსიტეტის ადმინისტრაციის თანამშრომლის, ირაკლი ცეცხლაძის დედა, მზია ქათამაძე, რომელმაც მისი შვილის ისტორია გვიამბო. მისი მონათხრობი გვიჩვენებს ადმინისტრაციის მანკიერებას, მათი განათლების პრობლემას. მათ უბრალოდ აშინებთ ეპილეფსიით დაავადებული ადამიანი და ცდილობენ, როგორმე მოიშორონ ის. ამ ისტორიის მოსმენის შემდეგ, Ambebi.ge თავად ირაკლი ცეცხლაძეს დაუკავშირდა.

- ბათუმის უნივერსიტეტში ვმუშაობდი, სადაც მომწონდა მუშაობა - სამეცნიერო საქმე მაინტერესებს, სიახლეების ათვისება. მუშაობასთან ერთად სწავლაც დავიწყე მაგისტრატურაში. მე მაწუხებს ეპილეფსია და რამდენჯერმე მქონდა უნივერსიტეტში ეპილეფსიური შეტევები და ამის გამო, როგორც ჩანს, ამითვალწუნეს თანამშრომლებმა და აღარ დამტვირთეს, საქმე ნაკლები მომცეს. არადა ამ დროს ყველაფრის გაკეთება წარმატებით შემიძლია, ვერ დამაბრალებენ იმას, რომ რამე ვერ გავაკეთე.

- როცა შეამჩნიეთ, რომ ნაკლებად გტვირთავდნენ, არ დაინტერესდით მიზეზით?

- კი, როგორ არა. ვუთხარი, იქნებ, მეც დამტვირთოთ მეტად მეთქი, ეს ვუთხარი როგორც ჩემს უფროსს, ისევე იმ ხალხს, ვინც ჩემთან ერთად ოთახში ისხდნენ, მაგრამ უარს ვიღებდი - რასაც დაგავალებენ, ისე ქენიო. მამაჩემიც მუშაობს უნივერსიტეტში და მასაც ეუბნებოდნენ, რომ მე უნდა წავსულიყავი უნივერსიტეტიდან.

- ვინ ეუბნებოდა ამას?

- შემდეგ, მე როგორც მამაჩემისგან გავიგე, ზემდგომი პირები - რექტორი და ადმინისტრაცია.

- ბათუმის უნივერსიტეტის რექტორზე, ირაკლი ბარამიძეზეა საუბარი?

- ბარამიძეს მე ვერ დავაბრალებ. ბარამიძე, მე ვფიქრობ, თანამშრომლების ზეწოლის მსხვერპლი გახდა, ისიც შეაწუხეს ჩემს გამო და მან ვერ გაუწია წინააღმდეგობა სხვა თანამშრომლებს. თორემ, არ ვფიქრობ, რომ პირადად რამე პრეტენზია ჰქონდეს ჩემთან.

- შემდეგ რა მოხდა?

- მერე მე დამიბარეს, პირდაპირ ვერ მითხრეს, მაგრამ წასვლის სიტუაცია შემიქმნეს. არ წამოვსულვარ, განცხადება არ დამიწერია, გულწრფელად რომ გითხრათ, ჩემთვის უნივერსიტეტში მუშაობა ძალიან მნიშვნელოვანია. მე სტუდენტებთან მაქვს ახლო ურთიერთობა და მათი ღალატიც გამოდის ჩემი წამოსვლა. ჯერ ოფიციალურად არ გავუთავისუფლებივარ არავის, მაგრამ ისეთი სიტუაციაა, რომ არც დამასაქმებენ.

- ასეთ დამოკიდებულებას სხვაგანაც ხვდებოდით?

- სხვაგან მსგავსი პრობლემა არსად შემქმნია. უნივერსიტეტშიც, ყველა თანამშრომლისგან ასეთი დამოკიდებულება არ მიგრძვნია, უფრო, ალბათ, ვისთან ერთადაც ვარ კაბინეტში, ისინი შევაწუხე.

- ეპილეფსიური შეტევა თქვენი სიცოცხლისთვის საფრთხეს შეიცავდა?

-  ეპილეფსიური შეტევის დროს, უბრალოდ, ვიღაცამ რომ სადმე წამომაწვინოს, მორჩა, თხუთმეტ წუთში გამოვფხიზლდები, უბრალოდ ძილის მომენტია. შეიძლება შეტევა რამდენიმე თვის განმავლობაში არ შემხვდეს, მაგრამ ისიც მოსალოდნელია, რომ დღეში რამდენჯერმე გამეორდეს.

Ambebi.ge ბათუმის უნივერსიტეტის რექტორს, ირაკლი ბარამიძეს დაუკავშირდა, რომელმაც განგვიცხადა, რომ არ ადასტურებს ირაკლი ცეცხლაძის მიმართ დისკრიმინაციის ფაქტს და მისი თქმით, ირაკლი დღესაც უნივერსიტეტში მუშაობს.

გიორგი ხარშილაძე

AMBEBI.GE