"მიუძახებია, წელიწადნახევარში ნახევარ საქართველოს ციხეში ამოგალპობთო" - რა საუბარი შედგა ადეიშვილსა და ქართველ ბიზნესმენს შორის "ჰილტონში"

ბრიუსელში ევროპარლამენტის პრესკლუბის ფოიეში გამოფენა, სახელწოდებით "სააკაშვილის რეჟიმის სისხლიანი ქრონიკა" გაიმართა. არასამთავრობო ორგანიზაცია "ყველა თაობა საქართველოსთვის" თავმჯდომარის, გია სალუქვაძის ორგანიზებით ფილმის ჩვენებაც მოეწყო, რომელიც ბოლო პერიოდში საქართველოში მომხდარ გახმაურებულ საქმეებს ეხებოდა. სწორედ ამ ფაქტის შესახებ ვთხოვეთ კომენტარი ბატონ გიას, თუმცა საუბარი მის მიერ გავრცელებული ინფორმაციით დავიწყეთ, რომელიც ზურაბ ადეიშვილს შეეხებოდა:

- ერთ-ერთ ინტერვიუში ვთქვი "შერატონი", მაგრამ ახლა დავაზუსტებ, - ეს მოხდა უკრაინაში, სასტუმრო "ჰილტონში", იანვრის დასაწყისში, ჩემი მეგობარი ქართველი ბიზნესმენი (რომელიც უახლოეს მომავალში თვითონაც გააკეთებს ამაზე განცხადებას) იყო შესული და დაინახა, რომ ადეიშვილი და "ნაციონალური მოძრაობის" სხვა ლიდერები (ვაშაძე, საყვარელიძე და სხვ), ისხდნენ და ლაპარაკობდნენ. ეს ბიზნესმენი ადეიშვილის დროს იყო რეპრესირებული და გაკვირვებული მისულა მასთან და უთქვამს, აქ რა გინდაო და არცთუ ისე დაბალი ტონით უსაუბრია. როგორც ჩემმა მეგობარმა მითხრა, თურმე ადეიშვილი მშვიდად უსმენდა მის ლაპარაკს, ერთი სიტყვაც კი არ უთქვამს, მაგრამ როცა ეს წამოსულა, ადეიშვილს მიუძახებია - წელიწადნახევარში გაჩვენებთ რასაც გიზამთ, ნახევარ საქართველოს ციხეში ამოგალპობთო. ხედავთ, ადეიშვილი საკუთარ განზრახვას, აღარც მალავს, თავისუფლადაც გადაადგილდება, ხან "ჰილტონშია" და ხანაც "შერატონში" და აკეთებს იმას, რაც თვითონ სურს.

- რა აძლევს ასეთი განცხადების საბაბს?

- რა აძლევს ამის საშუალებას და ის მოტაცებული ფული, რაც მან და მისმა მეგობრებმა ხელისუფლებაში ყოფნის დროს იშოვეს. სწორედ ამ ფულის იმედი აქვთ, რომ მობრუნდებიან ხელისუფლებაში და სათავეში ყოფნით კვალავაც დატკბებიან. მერე ისევ ქართველი ხალხის ხარჯზე იშოვნიან ფულს. მათ იმედს აძლევს ისიც, რომ საქართველოში ისევ აქტიურად თარეშობენ "ნაციონალური მოძრაობის" ლიდერები, რომლებსაც ფაქტობრივად სისიხლის სამართლის დანაშაული აქვთ ჩადენილი და მიუხედავად ამისა ციხეში არ სხედან. მე როგორც იურისტი გეტყვთ, რომ არ შეიძლება ადამიანს ამდენი დანაშაული ჰქონდეს ჩადენილი და არ იჯდეს ციხეში, ესაა პარადოქსი და დანაშაულიც კი, როდესაც დამნაშავეს არ ეზღვება საკადრისი.

- როგორ ფიქრობთ, რატომ იკრიბებიან უკრაინაში?

- როგორც ჩანს, უკრაინის დღევანდელი პრეზიდენტი სააკაშვილის მიმართ გარკვეულწილად დავალებულია და თან "ნაციონალებმა" უკარინას თავის თავი მიაწოდეს, როგორც "დემოკრატიის შუქურა" და ამათაც როგორც ჩანს, მიიღეს.

- ევროპარლამენტში თქვენს გამოფენაზე მინდა გკითხოთ...

- ჩვენ ევროპარლამენტარებს ვაჩვენეთ დოკუმენტური კადრები, თუ რას სჩადიოდა "ნაციონალური" რეჟიმი საქართველოში. დამიჯერეთ, რაც იქ მოხდა, იმას არც ჩვენ ველოდით. მათთვის ეს შოკისმომგვრელი იყო და ამას განცხადებებშიც არ მალავდნენ. ჩვენ მოვახდინეთ როგორც ფოტო-ვიდეო მასალის დემონსტრირება, ასევე დავარიგეთ ბუკლეტებიც, რათა უფრო მეტ ხალხს ქჰონოდა საშუალება გაცნობოდა "ნაციონალების" "გმირობებს".

- მოახდენს ეს გავლენას?

- აუცილებლად ექნება შედეგი. უბრალოდ, მე ჩვენს ხელისუფლებას მოვუწოდებ კიდევ უფრო მეტი აქტიურობისაკენ და დაანახოს დემოკრატიულ ქვეყნებს, რომ თვითონაც რაღაცას აკეთებენ. მთვარია, რომ დამნაშავე იყოს საკადრისად დასჯილი. ჩვენ უდანშაულო ადამიანებს გვიჭერდნენ და ახლა დამნაშავეები არიან გარეთ. ამას აუცილებლად უნდა მიხედოს ხელისუფლებამ.

ლადო გოგოლაძე

AMBEBI.GE