ჭიკაიძის მოვალეობის შემსრულებლის ვინაობა ცნობილია - ინფორმაცია შსს-ს დროებითი ხელმძღვანელის შესახებ

შინაგან საქმეთა მინისტრის მოვალეობას მინისტრის პირველი მოადგილე ვახტანგ გომელაური შეასრულებს. როგორც "ინტერპრესნიუსს" შსს-ში განუცხადეს, როდესაც პრემიერ-მინისტრი დააკმაყოფილებს და ხელს მოაწერს ალექსანდრე ჭიკაიძის განცხადებას გადადგომის შესახებ, ამის შემდეგ მინისტრის მოვალეობას ვახტანგ გომელაური შეასრულებს.

ინფორმაცია ვახტანგ გომელაურის შესახებ:

დაბადების თარიღი და ადგილი: 24 დეკემბერი, 1975 წ. ქ. თბილისი.

განათლება:

2001 წ. - ფიზიკური აღზრდისა და სპორტის აკადემია.

პროფესიული გამოცდილება:

2013 წლიდან დღემდე - შს მინისტრის მოადგილე;

2013 წლამდე - პრემიერ მინისტრ - ბიძინა ივანიშვილის დაცვის უფროსი;

2002 წ. - შსს დაცვის პოლიცია;

1994 წ. - სამთავრობო დაცვის სპეციალური სამსახური. სპეციალური ქვედანაყოფის საბრძოლო განყოფილების უფროსი.

ენების ცოდნა: ქართული, ინგლისური, რუსული.

ოჯახური მდგომარეობა: ჰყავს მეუღლე და ორი შვილი.

შეგახსენებთ, რომ საქართველოს შინაგან საქმეთა მინისტრმა ალექსანდრე ჭიკაძემ პრემიერ-მინისტრს გადადგომის მოთხოვნით მიმართა.

"მინდა მივმართო საქართველოს პრემიერ-მინისტრს გადადგომის მოთხოვნით. ჩემი ეს გადაწყვეტილება განაპირობა ბოლო დროს გაჟღერებულმა ბრალდებებმა, თითქოს მე ხელს ვაფარებ ზურა ვაზაგაშვილის მკვლელობაში მონაწილე პირებს. მიუხედავად იმისა, რომ ეს ბრალდება არ შეესაბამება სიმართლეს, მე ვგრძნობ მორალურ პასუხისმგებლობას და ვტოვებ დაკავებულ თანამდებობას. იმ შემთხვევაში, თუ მოხდებოდა ცხელ კვალზე იური ვაზაგაშვილის მკვლელობის გამოძიება, მე არ მივიღებდი ასეთ გადაწყვეტილებას. ამ ტრაგედიის დღეს მე არ ვიმყოფებოდი საქართველოში. ვინაიდან გამოძიება გრძელდება, ვთვლი, რომ უნდა ჩამოვშორდე პროცესს, რათა საზოგადოებას არ დარჩეს კითხვები ხელისუფლების მიმართ. გამოვთქვამ იმედს, რომ უახლოეს მომავალში გამოძიება დასრულდება და ყველაფერს თავისი სახელი დაერქმევა", - ნათქვამია ალექსანდრე ჭიკაიძის განცხადებაში. როგორც პრემიერ-მინისტრმა განაცხადა, იგი ჭიკაიძის განცხადებას დააკმაყოფილებს.