მნიშვნელოვანი ინფორმაცია
28
მაისიდღის ზოგადი ასტროლოგიური პროგნოზი
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
საქართველო 5 უმძიმესი გამოწვევის წინაშე - 2015 წლის მწარე ქართული რეალობა
23:46 / 20-01-2015
მიმდინარე წელს ხელისუფლებას ხუთ ძირითად გამოწვევასთან გამკლავება მოუწევს. მათ შორის, ერთ-ერთი მნიშვნელოვანი მიმართულება ოკუპირებული ტერიტორიებთან დაკავშირებული არსებული მძიმე ვითარებაა - აფხაზეთი და ცხინვალის რეგიონი რუსეთთან თანამშრომლობას აღრმავებს და ექსპერტების პროგნოზით, ორივე დე-ფაქტო სახელმწიფო რუსეთის ფედერაციაში ინტეგრაციისთვის ემზადება.
ექსპერტი ლევან გერაძე აფხაზეთსა და რუსეთს შორის დადებული ხელშეკრულების ფონზე, ვითარების გამწვავებას 2015 წელსაც პროგნოზირებს:
"რუსეთთან ხელშეკრულებაზე ხელმოწერის ფონზე, აფხაზეთსა და ცხინვალის რეგიონს დანარჩენ საქართველოსთან ურთიერთობა კიდევ უფრო შეეზღუდება. ამიტომ მიმდინარე წელს, საქართველოს ხელისუფლებამ ყურადღება არ უნდა მოადუნოს და კონფლიქტების მოგვარების თვალსაზრისით მუშაობა აქტიურად გააგრძელოს. ბუნებრივია, ამ მიმართულებით შემუშავებულ სტრატეგიაში რადიკალური ცვლილება შეუძლებელია, მაგრამ შესაბამისმა სტრუქტურებმა დე-ფაქტო ხელისუფლების წარმომადგენლებთან კონტაქტი მაქსიმალურად უნდა დაამყარონ. აუცილებელია არასამთავრობო ორგანიზაციებთან ურთიერთობაც, რათა აფხაზეთის მოსახლეობა საქართველოთი დაინტერესდეს. დღეს მთავარი გამოწვევა ოკუპირებულ ტერიტორიებთან ნდობის აღდგენაა".
მეორე მნიშვნელოვან გამოწვევას საგარო პოლიტიკა, ძირითადად კი, რუსეთიდან მომავალი საფრთხეები წარმოადგენს - 2015 წელს საქართველო ევროპასთან ვიზა-ლიბერალიზაციის პროცესის დასრულებას ელოდება, თუმცა დასავლეთთან ინტეგრაციისა და უკრაინის მოვლენების ფონზე, ჩრდილოეთიდან საფრთხე პარალელურ რეჟიმში მატულობს. ექსპერტი თორნიკე შარაშენიძე 2015 წელს პრორუსული ძალების გააქტიურებას ელოდება და აცხადებს, რომ პირველ ეტაპზე, რუსეთი საქართველოში განწყობის შეცვლას საინფორმაციო პროპაგანდით შეეცდება:
"2015 წელს რუსეთი საქართველოში არასტაბილური ვითარების შექმნას შეეცდება. უკრაინაში ომის გამო, მას მორიგი ცხელი წერტილის შექმნა არ აწყობს, ამიტომ მიმდინარე წელს სამხედრო საფრთხეს არ ველოდები, თუმცა რუსეთს ჩვენ წინააღმდეგ დეზინფორმაციული პროპაგანდის იარაღი აქვს, რომელსაც უკვე წარმატებით ამუშავებს. კერძოდ, საქართველოში რუსული არხები სწორედ რუსეთის სასარგებლოდ მაუწყებლობენ და მათ საკმაოდ ბევრი ქართველი მაყურებელი ყავთ. 2015 წელს რუსეთი პრორუსულ ძალებსაც პირდაპირი წესით დააფინანსებს. შედეგად, საქართველო უფრო დასუსტდება. შესაძლოა, ჯარისკაცებმაც კი ჩათვალონ, რომ რუსეთი ოკუპანტი სახელმწიფო არ არის. თუ ჯარში მსგავსი ეჭვი გაჩნდება, ბუნებრივია, პუტინი საქართველოში საკუთარ მიზანს მარტივად მიაღწევს".
ხელისუფლებისთვის მორიგ მნიშვნელოვან გამოწვევას ქვეყნის შიგნით მიმდინარე პოლიტიკური პროცესები წარმოადგენს - არჩევნების მოახლოებასთან ერთად, კოალიცია მნიშვნელოვანი ცვლილებებისთვის ემზადება, ხელისუფლებასთან პოლიტიკურ ბრძოლას საპარლამენტო ოპოზიციაც გაააქტიურებს, არასაპარლამენტო ოპოზიცია კი, ვადამდელი არჩევნების დანიშვნის მოთხოვნით პროცესების ქუჩაში გადატანას აანონსებს. გია ხუხაშვილი ოპოზიციის მოთხოვნას სკეპტიკურად უყურებს, თუმცა პოლიტიკურ ფლანგზე ცვლილებებს არ გამორიცხავს:
"დღეს ხელისუფლებას ობიექტური და წონადი ოპოზიცია არ ყავს, ამიტომ არასაპარლამენტო ოპოზიციის მოთხოვნა ვადამდელი არჩევნების დანიშვნის შესახებ, არასერიოზულად მიმაჩნია. შიდა პოლიტიკაში ახალი კოალიციის შექმნას ველოდები, სავარაუდოდ, პარტიები საერთო ღირებულებების ბაზაზე ახალი გაერთიანების შექმნას შეეცდებიან. ეს ნორმალური პროცესია, რადგან დღეს ქვეყნისთვის მთავარ პრობლემას ხელისუფლებაში მყოფი ეკლექტური კოალიცია წარმოადგენს".
რაც შეეხება ეკონომიკურ გამოწვებს, ანალიტიკოსი დემურ გიორხელიძე ლარის კურსის გაუფასურების ფონზე, მოსახლეობას "აიმედებს", რომ პროცესი 2015 წელსაც გაგრძელდება:
"ლარის კურსი თავის ნიშნულს მიუახლოვდება და რეალური გათვლებით, დღევანდელი ეკონომიკის პირობებში 2,15-ის ფარგლებში უნდა გაჩერდეს. ამ ფონზე საპანიკო არაფერია, პროფესიული მიდგომაა საჭირო. დღეს საღი და გონიერი პოლიტიკის დეფიციტი გვაქვს".
დაბოლოს, უმუშევრობა, რომელიც საქართველოს უახლეს ისტორიაში ქვეყნის ერთ-ერთი მთავარ და ჯერჯერობით, დაუძლეველ გამოწვევად რჩება. ექსპერტი ლევან კალანდაძე აღნიშნული პრობლემის მოგვარებას 2015 წელსაც არ ელოდება:
"ხელისუფლების პოლიტიკა უმუშევრობის შემცირებაზე ორიენტირებული არ არის. მისი ძირითადი დატვირთვა პოლიტიკურ-სოციალურია და საარჩევნო ხმების გაზრდას გულისხმობს. ზოგადად, უმუშევრობა არა სახელმწიფო პოლიტიკით, არამედ ბიზნესპროექტების რეალიზაციით მცირდება. ბიზნესის აქტივობის თვალსაზრისით კი, მნიშვნელოვანი გარღვევა არც 2015 წელსაა მოსალოდნელი. აქედან გამომდინარე, დასაქმება არა მხოლოდ მიმდინარე წელს, მომდევნო წლებშიც მთავარ პრობლემად დარჩება".
რუსუდან შელია
AMBEBI.GE
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
შინაგან საქმეთა მინისტრად გელა გელაძე დაინიშნა
კვირის კითხვადი სტატიები
მნიშვნელოვანი ინფორმაცია
მკითხველის რჩევით
