"სად იყო მსოფლიო, როდესაც ჩეჩნეთში წამებით ხდიდნენ სულს ბავშვებს და ფეხმძიმე ქალებს" - პანკისელი მუსლიმები აქციას მართავენ

პანკისის ხეობაში, სოფელ დუისში ადგილობრივი მოსახლეობა წინასწარმეტყველ მუჰამედის კარიკატურების საწინააღმდეგო აქციას მართავს. პროტესტის მოტივებზე კომენტარი საქართველოში ჩეჩნური დიასპორის წარმომადგენელს, მექა ხანგოშვილს ვთხოვეთ:

- დუისში აქციის გამართვა ადეკვატური საქციელია. ჩვენ ვართ დემოკრატიული ქვეყანა და ნებისმიერ მსურველს აქვს უფლება მშვიდობიანი აქცია გამართოს. მე ვგმობ ყველანაირ ტერორიზმს, ვინაიდან ტერორიზმს გამართლება არ აქვს, შესაბამისად, ვგმობ იმასაც, რაც საფრანგეთში მოხდა, მაგრამ ვგმობ იმასაც, რასაც "შარლი ებდო" აკეთებდა. წმინდა მოციქულის კარიკატურის დახატვის უფლება მათ არ ჰქონდათ. ის, რასაც ისინი დღეს აკეთებენ, (მუჰამედის კარიკატურის კიდევ დახატვა და მილიონობით ტირაჟი) არის პროვოკაცია, რომელიც მიმართულია ისლამური სამყაროს წინააღმდეგ. სხვათა შორის, ახლა, როცა თქვენ გესაუბრებით, ღია ეთერით ვუყურებ ჩეჩნეთს, სადაც მილიონი ადამიანია გამოსული და აპროტესტებს "შარლი ებდოს" კარიკატურებს და იქ მთელი კავკასიიდანაა ხალხი ჩასული, რათა ეს ფაქტი გააპროტესტონ.

- ქალბატონო მექა, როგორ ფიქრობთ, პროტესტის სხვა რა ფორმა იქნება ადექვატური ამ კარიკატურების წინააღმდეგ?

- ვერ გეტყვით, ალბათ ყველაზე დემოკრატიული ფორმა სასამართლო იქნება, მაგრამ ვფიქრობ, მშვიდობიანი აქციაც არ არის ცუდი. ამ ფორმით ადამიანები საკუთარ აზრს გამოხატავენ.

- ზოგადად, მართლმორწმუნე მუსლიმებისთვის რამდენად მისაღები იყო ის, რაც პარიზში მოხდა?

- აბსოლუტურად ყველა საღად მოაზროვნე მუსლიმი გმობს ამ ფაქტს, მაგრამ იმაზეც უნდა ვისაუბროთ, თუ რამ გამოიწვია ეს ტერაქტი. ამ 12 ადამიანის სიცოცხლის გამო მთელი ევროპა და მსოფლიო დადგა ფეხზე, ამის ფონზე მიჩნდება ლოგიკური კითხვა - სად იყო მსოფლიო, როდესაც ჩეჩნეთში ამაზე ათასჯერ მეტი საშინელებები ხდებოდა?! იქ თორმეტი ადამიანი კი არ დაიღუპა, არამედ გაცილებით მეტი. თანაც რა ფორმით დახოცეს იქ ხალხი, წამებით ხდიდნენ სულს ბავშვებს და ფეხმძიმე ქალებს. სად არის მსოფლიო, როცა უდიდესი ტრაგედია დატრიალდა ჩვენს მეზობელ სომხეთში, გეკითხებით, სად არიან?! თქვენ წარმოიდგინეთ, რუსეთის არც ერთმა ტელე-არხმა სომხეთში მომხდარი ეს ფაქტი არ გააშუქა, მაშინ, როცა პარიზის ტერაქტს დღეში რამდენჯერმე გმობენ, თანაც გაითვალისწინეთ, ჩეჩნეთში უარესს თვითონ აკეთებდნენ. ყველანაირი ტერორისტული აქტი არის დასაგმობი.

- ბევრგან დაიწერა, რომ ამ ტერორისტული აქტით მორწმუნე მუსლიმებს არანაკლები შეურაცხყოფა მიადგათ, ვიდრე კარიკატურებით...

- ამ აზრს ნამდვილად აქვს არსებობის უფლება. კიდევ ერთხელ ვამბობ, რომ ყველანაირი ტერორიზმი დასაგმობია. ტერორიზმი შობს ტერორიზმს. გულის სიღრმეში დიდი შიში მაქვს, რომ ეს მარტო ამით არ დასრულდება, ვინაიდან ჩემი აზრით, ისიც ტერორისტული აქტია, როდესაც სახელმწიფო თვალს ხუჭავს "შარლი ებდოს" პროვოკაციულ ქმედებაზე, როდესაც მათ ისევ გამოაქვეყნეს მუჰამედის კარიკატურა. ჩემთვის ეს იგივე ტერორიზმია. ამ ქმედებით ისინი მუსლიმებს იწვევენ და გეკითხებით, პროვოკაცია მეტი რა არის?! მიაღწია მსოფლიო იმას, რომ დღეს ისლამს აქვს ტერორიზმის იმიჯი (რაც ძალიან არასწორი შეხედულებაა), მიუხედავად ამისა, თქვენ ერთხელ მაინც გსმენიათ, თუნდაც რადიკალური ისლამისტებისაგან, რომ მათ მოციქულების (ქრისტეს ან მისი მოწაფეების) კარიკატურები დაეხატოთ?! ამას არცერთი მორწმუნე მუსლიმი არ იკადრებს.

ლადო გოგოლაძე

AMBEBI.GE