28
მარტიდღის ზოგადი ასტროლოგიური პროგნოზი
მარტოხელა მოგზაურები და უცნობი გმირები. ამ ადამიანებმა ოფისის კომფორტული სავარძელი იალქნების ხმაურში, ფანჯრის მიღმა არსებული პეიზაჟი კი - პოლარულ ციალზე გაცვალეს. ამ არაორდინარულმა და გაბედულმა ადამიანებმა საკუთარი ცხოვრების სტილი დამოუკიდებლად აირჩიეს.
თომას სტივენსი
1884 წლის 22 აპრილს სან-ფრანცისკოელი მუშა თომას სტივენსი საკუთარ ველოსიპედზე დაჯდა და უცნობი სამყაროს აღმოსაჩენად გაეშურა. სულ მალე სტივენსი და მისი ორთვლიანი მეწყვილე, რომლის წინა ბორბალი უკანაზე 5-ჯერ დიდი იყო, ისტორიაში შევიდნენ. მოგზაურმა მოიარა ჩრდილო ამერიკის კონტინენტის ნახევარი, ესტუმრა ინგლისს, საფრანგეთს, გერმანიას, ავსტრიას, უნგრეთს, სერბეთს, ბულგარეთსა და თურქეთს. მცირე შესვენების შემდეგ სტივენსმა და მისმა ველოსიპედმა მოიარეს სომხეთი, ირანი, ერაყი. ზამთარი მან თეირანში გაატარა. ციმბირში შესვლაზე უარის მიღების შემდეგ, თავზეხელაღებული ამერიკელი ველოსიპედისტი კასპიის ზღვით ინდოეთში მოხვდა. მისი ველო-მოგზაურობა მსოფლიოს გარშემო 1886 წლის 17 დეკემბერს იოკოჰამაში დასრულდა. მან ველოსიპედით 30,000 კმ გაიარა. საქვეყნოდ ცნობილი მოგზაური სან-ფრანცისკოში დაბრუნდა და საკუთარ მოგზაურობაზე წიგნი დაწერა.
რობერტ ნოქს-ჯონსონი
თავგადასავლების ამ მაძიებელს წყალი და ზღვა ბავშობიდან იზიდავდა. საკუთარი ხელით პირველი მცურავი საშუალება მან 5 წლის ასაკში ააგო. თუმცა მუყაოს ტივის "სიცოცხლე" ხანმოკლე აღმოჩნდა. სამხედრო ფლოტში სამსახურის შემდეგ მისი სიყვარული ზღვის მიმართ გაძლიერდა. საკუთარი იახტით - "სუაჰილი", ის დედამიწის გარშემო სამოგზაუროდ გაემგზავრა. ჯონსონთან ერთად სტარტი კიდევ 8 იალქნიანმა გემმა აიღო. მაგრამ ფინიშამდე მხოლოდ მან მიაღწია. რეგატის წესები მარტივი იყო. იახტებს ეკრძალებოდათ პორტებში შესვლა, საკვები მარაგის შევსება და რემონტი. 312 დღის შემდეგ "სუაჰილის" კაპიტანმა მიზანს მიაღწია. ისტორიაში რობერტ ჯონსონი პირველი ადამიანია, რომელმაც დედამიწის გარშემო შეუჩერებლივ იცურა.
რობერტ გარსაიდი
რობერტ გარსაიდს ანუ "მორბენალ ადამიანს" საქვეყნო დიდება მისმა ფეხებმა მოუტანეს. კაცობრიობის ისტორიაში ის პირველი ადამიანია, რომელმაც დედამიწის გარშემო ფეხით ირბინა. 1997 წლის 20 ოქტომბერს ბრიტანელმა გერსაიდმა ინდურ ნიუ დელიდან სტარტი აიღო, რომ 2003 წლის 13 ივნისს ისევ ამ ქალაქში დაბრუნებულიყო. მან პრაქტიკულად შეჩერების გარეშე ექვსი წელი ირბინა და ექვსი კონტინენტის 29 ქვეყანა გაირბინა. 6 წლის განმავლობაში "ფორესტ გამპმა" თითქმის 48,000 კმ გაირბინა და 50-ზე მეტი სპორტული ფეხსაცმელი გამოიცვალა. უცნაურ მოგზაურობაში მისი განუყრელი მეგზური ჯიბის კომპიუტერი იყო, რომელზეც ის თავის ნაბიჯებს არეგისტრირებდა. საგულისხმოა, რომ გინესის რეკორდების წიგნმა გარსაიდის მიღწევა მხოლოდ სამი წლის შემდეგ დააერგისტრირა.
ფიოდორ კონიუხოვი
რუსმა ფიოდორ კონიუხოვმა თავი ზღვებსა და ოკეანეებში მარტოხელა მოგზაურობით გაითქვა. მის ანგარიშზეა 5 მოგზაურობა დედამიწის გარშემო, ატლანტიკის ოკეანის 17 გადაკვეთა, 50-ზე მეტი უნიკალური საზღვაო ექსპედიცია. ნიჩბიანი ნავით ატლანტიკის ოკეანის მარტო გადაცურვას მან 46 დღე და 4 საათი მოანდომა და ახალი მსოფლიო რეკორდი დაამყარა.
სტიფ ფოსეტი
ამ ექსცენტრიულ ამერიკელ მილიონერს დიდი ხნით ერთ ადგილზე გაჩერება არ შეეძლო. მსოფლიომ მის შესახებ სხვადასხვა რეკორდების დამყარებით შეიტყო. 61 წლის ასაკში ის თვითმფრინავ Virgin Atlantic Global Flyer-ის კაბინაში ჩაჯდა და მარტომ დედამიწას შემოუფრინა. ფრენა 67 საათს 2 წუთსა და 38 წამს გაგრძელდა. ისტორიაში ეს დედამიწის გარშემო პირველი ფრენა იყო, რომელიც დაჯდომისა და საწვავით გაწყობის გარეშე შესრულდა. ფოსეტი მიღწეულზე არასდროს ჩერდებოდა. 2006 წლის 8 თებერვალს ის კანავეარლის კონცდიხან აფრინდა და 76 სთ-ის შემდეგ ინგლისში დაეშვა. ფოსეტმა 41,5 ათასი კილომეტრი დაფარა.
2007 წლის 3 სექტემბერს ფოსეტი ერთძრავიანი თვითმფრინავით ჰაერში უკანასკნელად აფრინდა. მის გვამს და თვითმფრინავის ფრაგმენტებს მხოლოდ ერთი წლის შემდეგ, კალიფორნიის მთებში მიაგნეს.
მოამზადა ნუკრი მგელაძემ
