ფიცრულში მცხოვრებ შვიდშვილიან ოჯახს უამინდობამ პრობლემები შეუქმნა

უამინდობამ პრობლემები შექმნა ე.წ. ოცნების ქალაქში.

ბათუმში, შვიდი შვილთან და მოხუცი დედასთან ერთად ფიცრულში მცხოვრები შოთა ბოლქვაძის ოჯახი ბოლო ერთი კვირაა შეშის გარეშეა დარჩენილი. გათბობის გარეშე გაატარეს მათ გუშინდელი თოვლიანი ღამეც. მრავალშვილიანი ოჯახის ბავშვები არც სკოლაში დადიან და არც ბაღში. მათ ტანსაცმელი არ აქვთ. ოჯახის უფროსის განცხადებით, მისამართის ცვლილების გამო სოციალური დახმარებაც დაკარგეს. ოჯახი ბოლო 8 წლის განმავლობაში ქალაქის ტერიტორიაზე ნაქირავებ ბინაში ცხოვრობდა, ბოლო რვა თვის განმავლობაში კი ყოფილი 53-ე ბატალიონის ტერიტორიაზეა უნებართვოდ შეჭრილი. 10 წევრიანი ოჯახის ერთადერთი შემოსავალი შოთა ბოლქვაძის 300 ლარიანი ხელფასია.

"შეშას ძირითადად, მდინარის პირას ვაგროვებ. ფული არასდროს მყოფნის საყიდლად. ერთ-ერთი შვილი ასთმიანი მყავს და კვირაში 100 ლარის წამალი არ ყოფნის. საჭმელი უფასო სასადილოდან მოგვაქვს და ძირითადად, დღეში ერთხელ ვიკვებებით. პატარა სამი თვისაა. არც მისთვის გვაქვს აუცილებელი ნივთები. ჩემი ხელფასი რაში გვეყოფა? სოციალური დახმარებაც მოგვიხსნეს. სამი თვეა მპირდებიან - მოგცემთო და დღემდე ველოდები" - ამბობს მრავალშვილიანი მამა შოთა ბოლქვაძე.