21
ივნისიდღის ზოგადი ასტროლოგიური პროგნოზი
ახალი წლის ღამეს საქართველოს მოსახლეობის ნაწილი ტრადიციულად სახლში, ოჯახთან ერთად ხვდება. თუმცა ბევრი ახალ წელთან შეხვედრას ქუჩაში, მეგობრებისა და საახალწლო ღონისძიებების გარემოცვაში გეგმავს. ტრადიციულად, 31 დეკემბრის ღამეს, თბილისის მერია, საქართველოს კულტურისა და ძეგლთა დაცვის სამინისტროს მხარდაჭერით, ევროპის მოედანზე ქართველი და უცხოელი შემსრულებლების ერთობლივ საახალწლო გალა-კონცერტს გამართავს.
როგორც უკვე ცნობილია, ღონისძიებაში, რომელიც 10 საათზე დაიწყება, თბილისის "ბიგ-ბენდი" და სპეციალურად ამ დღისთვის მოწვეული ცნობილი ბენდები - ბრიტანული GROOVESONIX და ავსტრიული PAROV STELAR BAND მიიღებენ მონაწილეობას. GROOVESONIX - ეს არის ცნობილი ბრიტანული ბენდი, რომელიც ჯგუფ Jamiroquai-ის მოქმედი წევრებისგან არის დაკომპლექტებული. ბენდის ვოკალისტი ბრიტანული X-Factory-ის გამარჯვებული შონ უილიამსია. ახალი წლის ღამეს GROOVESONIX ქართველ მსმენელს ცნობილი მომღერლების ყველა დროის საუკეთესო ჰიტებს შესთავაზებს. PAROV STELAR BAND კი, ცნობილი ავსტრიული ჯგუფი, Dj Parov Stelar-ის ხელმძღვანელობით როგორც ძველ, ასევე უახლეს ჰიტებს შეასრულებს.
საახალწლო ღონისძიებაში მონაწილეობას ქართული ცნობილი როკ-ჯგუფი LOUD speakers-იც მიიღებს. LOUD speakers თავის მსმენელს უკვე ცნობილ სიმღერებთან ერთად, ახალ ნამუშევრებსაც შესთავაზებს.
მსმენელის საახალწლო განწყობაზე, რა თქმა უნდა, ქართველი სოლო მომღერლებიც იზრუნებენ, რომელთა შერჩევამ წელს განსაკუთრებული აჟიოტაჟი გამოიწვია. მას შემდეგ, რაც თბილისის მერიის ერთ-ერთმა წარმომადგენელმა განაცხადა, რომ მერიამ ის მომღერლები შეარჩია, რომლებსაც ცოცხალი ბენდის გვერდით შესრულება შეუძლია, მერიის მიერ შედგენილი სიის მიღმა დარჩენილმა ქართული ესტრადის ზოგიერთმა ვარსკვლავმა ეს პროფესიულ შურაცხყოფად მიიღო. ინგა გრიგოლიას გადაცემა "რეაქციაში", რომელიც სწორედ მომღერალთა შერჩევის თემას ეხებოდა, თბილისის მერიამ ლამის ბოდიში მოიხადა გაკეთებული განცხადების გამო და აღნიშნა, რომ ეს განცხადება მერიის პოზიციას არ გამოხატავდა. თუმცა მერიის მიერ შერჩეული მომღერლების სია უცვლელი დარჩა, რომლის მიხედვით, თბილისელების განწყობაზე ქართველი შემსრულებლები: ვაჟა მანია, ალეკო ბერძენიშვილი, ზაურ შავგულიძე, სოფო ხალვაში, თაკო გაჩეჩილაძე, ლევან ჩიჩუა, მარი პავლიაშვილი, გიორგი სუხიტაშვილი, სალომე ბაკურაძე, თიკა მახალდიანი, ანი კეკუა, ანრი ჯოხაძე, ნინი ბადურაშვილი, სოფო გელოვანი, მაია ბარათაშვილი, ქრისტინე იმედაძე, ბორის ბედია, ოთო ნემსაძე, აჩიკო ნიჟარაძე, მარიკო ებრალიძე, ნათია დუმბაძე, ანანო მჟავია, ნინი წიკლაური, დათო გომართელი, მაკა ზამბახიძე, ნოდიკო ტატიშვილი და ნუცა ბუზალაძე იზრუნებენ.
31 დეკემბერს კონცერტები დედაქალაქის გარდა, 11 ქალაქში გაიმართება. ბათუმში, ქუთაისში, ზუგდიდში, მცხეთაში, რუსთავში, გორში, ახალციხეში, ამბროლაურში, ოზურგეთში, ფოთსა და თელავში ადგილობრივ ფოლკლორულ თუ საესტრადო მუსიკალურ ჯგუფებთან ერთად, მსმენელის წინაშე ცნობილი ქართველი მომღერლებიც წარსდგებიან.
თამარ კორკოტაშვილი
AMBEBI.GE
