1
ივნისიდღის ზოგადი ასტროლოგიური პროგნოზი
ორ კვირაში ახალი, 2015 წელი გვესტუმრება. ახალი წლის მოლოდინს ყოველთვის თავისებური მღელვარება ახლავს, - ყველას უნდა, რომ ამ დღესასწაულს ღირსეულად შეხვდეს, უნდა რაღაც კარგი ჩაიფიქროს, უიმედოდ არ იყოს. ამ დროისთვის ასტროლოგებსაც საქმე ეძლევათ, - სამომავლო პროგნოზებს აკეთებენ, თუ როგორი წელი შეიძლება იყოს მომავალი და ამა თუ იმ წელიწადს სხვადასხვა ცხოველის სახელს ანიჭებენ. შესაბამისად, მათი მოთხოვნების შესრულებას გვთავაზობენ და თან გვაიმედებენ, - ამ მოთხოვნების შესრულების შემთხვევაში, ყველაფერი კარგად იქნებაო. ეს რაც შეეხება ასტროპროგნოზებს და ასტროლოგებს...
საინტერესოა, რას პროგნოზირებენ ჩვენი მოქალაქეები იმასთან დაკავშირებით, - რას მოგვიტანს 2015 წელი და როგორი შეიძლება იყოს ის საქართველოს მოსახლეობისთვის. ისინი უბრალოდ, არსებულ რელობას აფასებენ და აქედან აკეთებენ სამომავლოდ დასკვნებს.
კოტე ნემსიწვერიძე, იურისტი, 24 წლის:
- ხელისუფლება და ბიძინა ივანიშვილი გვპირდებოდა, რომ მესამე წელი უკვე კარგი უნდა ყოფილიყო და მეოთხე უკეთესი, მაგრამ ამის თქმის საფუძველს, ამ წლის ბოლოს ისე განვითარდა მოვლენები, იგივე ლარის კურსთან დაკავშირებით, რომ არაფერი გვაძლევს. ქვეყანაში მართლა არაფერი ხდება და აქედან გამომდინარე, მომავალშიც საინტერესო და დასაიმედებელი არაფერი მოხდება, რომ წელს გაკეთებული სამომავლოდ ფთებს შეისხამს, განვითარდება და მოქალაქეებისთვის დადებით შედეგს მოიტანს. მაპატიეთ, მაგრამ ვერცერთ წარმატებულ სფეროს ვერ გამოვყოფ.
- არც სოციალური კუთხით?
- ვფიქრობ, რომ არა. მოკლედ, არც პროგრესი იქნება და არც რეგრესი. უკეთესობის დიდი მოლოდინი ნუ გვექნება.
- სამთავრობო ცვლილებები როგორ ფიქრობთ, მოსალოდნელია?
- კი, ამას ვარაუდობენ კიდეც, სამთავრობო ცვლილებები იქნება. ცოტა ხნის წინ ერთი სერიოზული ძალა გამოეყო "ოცნებას". ახლა ლაპარაკობენ, რომ "რესპუბლიკური პარტია" დაადგება ამ გზას და ალბათ დაპირისპირებაში შევა... 2015 წელი საარჩევნო წლის წინა წელი იქნება და სხვა პოლიტიკური ძალებიც შეეცდებიან, რომ მოძლიერდნენ, გამოიკვეთონ.
ისე, ჩემი აზრით, ჩვეულებრივი მოქალაქეებისთვის პრიორიტეტული პოლიტიკა სულაც არ უნდა იყოს. სასურველია, ინტერესი სხვა მიმართულებით გამოავლინონ, მაგრამ ისე მიდის ვითარება საქართველოში, რომ ხალხს ჯერ სხვა არაფერი აინტერსებს. იმედს ვიტოვებ, რომ ოდესმე საქმე ისე იქნება, რომ ყველა ოჯახში საინფორმაციო გამოშვების ყურება აუცილებელი არ იქნება. სამწუხაროდ, ჯერჯერობით ასეა.
ერთადერთი სასიკეთო რამ, რაც შესაძლებელია, რომ მოხდეს, ალბათ დაჩქარდება მუშაობა ევროკავშირთან უვიზო რეჟიმის შემოღებასთან დაკავშირებით.
ანა მიქაია, ჟურნალისტი, 27 წლის:
- საერთოდ, ძალიან ოპტიმისტი ვარ და სულ მგონია, რომ უკეთესობისკენ შეიცვლება ყველაფერი. ზოგადად ქართველი ხალხის პრობლემაც ეგ არის, სულ ასე ჰგონია, რომ ყოველი ახალი წელი ქვეყნის სასიკეთოდ წარიმართება და ამ მოლოდინით ვცხოვრობთ. მოკლედ, მიუხედავად ამისა, მინდა, ისევ ოპტიმისტი ვიყო. ამასთან, მრგვალი თარიღებიც მიყვარს და მგონია, რომ 2015 წელი სწორედ ამის გამო იქნება ძალიან კარგი წელი.
თუ პოლიტიკურ სიტუაციას გავითვალისწინებთ, უნდა ვივარაუდოთ, რომ ამაზე მეტად პოლიტიკური კრიზისი არ უნდა დაგვემუქროს, - რაღაცნაირად მთავრობაში უკვე ყველა ერთი აზრის მქონე დარჩა. ამასთან, არჩევნები არ გველოდება და ამ კუთხით ვნებათაღელვა არ არის მოსალოდნელი. იმედი მაქვს, რომ სოციალური მდგომარეობა გაუმჯობესდება. ის გაყინული სიტუაცია ოდნავ ამოძრავდება.
- გაჭირვებულებს, უპოვრებს, უსახლკაროებს რა ეშველებათ?
- ჰო, ეს რთული საკითხია. ამ მიმართულებით, როგორც ცნობილია, არანაირი ცვლილება და სიახლე დიდად არ იგეგმება. ყოველ შემთხვევაში ამის შესახებ არაფერი მსმენია და ვერავის დავაიმედებ. ვფიქრობ, ხელისუფლებამ უნდა ეცადოს და იმაზე იზრუნოს, რომ შეამციროს იმ სახელფასო დანამატების რაოდენობა, რომელიც აქვთ და იგივე პენსიებში, სოციალურ დახმარებებში, ჯანდაცვის პროექტებში გამოიყენონ. ინფრასტუქტურის მოწყობა კარგია, მაგრამ ხალხის კეთილდღეობა უფრო მნიშვნელოვანი. მართლაც, ასფალტი ვჭამოთ?! - არ უნდა იყოს ეს ისევ ყბადაღებული საკითხი.
ტარიელ ქარელი, ტაქსის მძღოლი, 50 წლის:
- ჩემი პროგნოზი ასეთია: აუცილებლად მოხდება სამთავრობო ცვლილებები. კიდევ უფრო გართულდება ეკონომიკური მდგომარეობა. მე მხოლოდ 2015 წელზე კი არა, უფრო შორსმიმავალ პროგნოზებზე მაქვს ლაპარაკი. მომდევნო საპარლამენტო არჩევნებზე ეს ხელიუფლება დამარცხდება.
"ოცნების" მიმართ ბევრი ოპტიმისტურად იყო განწყობილი, თუმცა უმრავლესობა აღიარებს, რომ გატყდნენ. ნებისმიერ სოციალურ ფენაში უმეტესად უკმაყოფილო ადამიანები მხვდებიან და ამ ხელისუფლების იმედი ნამდვილად არ მაქვს, რომ კარგ წელს დაგვიყენებენ. დამერწმუნეთ, ასე ფიქრობენ და ლაპარაკობენ მაღაზიაში, სამარშრუტო ტაქსიში, ბირჟაზე, ამას ამბობს გამყიდველი, ექიმი.
ნათია აგლაძე, პედაგოგი, 32 წლის:
- დღევანდელი გადასახედიდან ძალიან ბუნდოვანია, რას შეიძლება ველოდოთ მომავალ 2015 წელს და რა კონკრეტული შედეგები შეიძლება დაიდოს პოლიტიკური თუ სოციალური მიმართულებით, - იმ კონკრეტული პრობლემების გადაჭრის თვალსაზრისით, რაც ქვეყანას და მოსახლეობის ძალიან დიდ ნაწილს აწუხებს. ვითარება იმდენად რთულია, რომ რაიმე დამაიმედებელი პროგნოზების გაკეთება მიჭირს. უბრალოდ, იმის გათვალისწინებით, რომ ახლოვდება საპარლამენტო არჩევნები და ხელისუფლებას 2016 წელს ოთხწლიანი ვადა გასდის, მინდა, იმედი დავიტოვო, რომ 2015 წელს მაქსიმალურად გამოიყენებენ ქვეყნისთვის სასარგებლო ნაბიჯების გადადგმისათვის.
ლალი ფაცია
სპეციალურად Ambebi.ge-სთვის
