"ჩვენი სიყვარული ვერაფერმა "ლეგალაიზა" - ჩემო ელაიზა" - ვინ არის მასტერის ნამუშევრების მუზა

რეპერი მასტერი (გიორგი პავლიაშვილი) თვეს ისე არ გაუშვებს, ახალი კლიპი საკუთარი ძალებით არ გადაიღოს. რამდენიმე დღის წინ ინტერნეტში ახალი პროდუქტი ატვირთა, რომლის ტექსტი და საერთოდ, რეპკომპოზიცია, გადაღება, მონტაჟი, ყველაფერი მას ეკუთვნის. ახალ ნამუშვარში მხოლოდ ერთი ლამაზი და მშვენიერი გოგონა ელისაბედ გაფრინდაშვილი მონაწილეობს, რომელიც ამერიკაში მცხოვრები ქართველია.

მასტერი:

- ლიზა ამერიკაში ბრუნდებოდა მაგ დღეს  და გადავიღე. მახსოვს, 4 ივლისი თენდებოდა, მანქანა ვახუშტის ხიდთან გავაჩერე, რადგან მტკვარში "ნივთი" უნდა გადაეგდო (ამას ალბათ მაყურებელი თავად მიხვდება და გაშიფრავს). ისე მოხდა, რომ ხიდის ქვემოთ მანქანები დადიოდნენ, ანუ ცოტა ადრე მომიწია გაჩერებამ, აქედან გამომდინარე, ლიზას ფეხით სიარული მოუხდა, რათა ნივთი მტკვარში ჩაეგდო. მეც ავდექი და ვიდეოს გადაღება დავიწყე... არანაირი იდეა არ მქონია, რომ ამ ყველაფერს ოდესმე კლიპის ფორმატის სახეს მივცემდი... შემდეგ ლიზა გაფრინდა... ერთ დღესაც ვნახე ის ვიდეო და იმის იდეა მომივიდა, რაც უკვე გავაკეთე... პირველი სიმღერაა, რომელიც გამოსახულების მიხედვით დავწერე ანუ რომ ვწერდი, თან, ამ კადრებს ვუყურებდი, - ასევე პირველი კლიპია, სადაც ის გოგო მონაწილეობს, რომელსაც კონკრეტულად სიმღერა ეძღვნება: "ჩვენი სიყვარული ვერაფერმა "ლეგალაიზა" - ჩემო ელაიზა"...

- ანუ თქვენი სიყვარული ვერაფერმა გახადა ლეგალური?

- ჩვენი სიყვარული ვერაფერმა გახადა ლეგალური (სიცილით ამბობს).

დიდი მნიშვნელობა აქვს ამას, მაგრამ ჯობია, მსმენელმა თავისით ამოხსნას ეს ყველაფერი... რაც შეგვეხება მე და ლიზას, რა თქმა უნდა, ეს არ იყო მხოლოდ მეგობრული ურთიერთობა და სხვა რამის დამატება ამ თემაზე ზედმეტი მგონია...

მოკლედ, ამ წელიწდში ისე მოხდა, რომ ყოველთვე ახალ კლიპს ვთავაზობდი. მერე მკითხა, - დეკემბერში რა კლიპს აპირებო? არაფერს ვეუბნებოდი და ეს ვიდეორგოლი მის დაბადების დღეზე გამოვუშვი ისე, რომ არც სიმღერის შესახებ იცოდა რამე და არც ის ახსოვდა, რომ მაშინ ვიდეოს ვუღებდი... ვფიქრობ, ყველაზე ნატურალური ნამუშევარია, რაც კი შემიქმნია, რადგან მასში არც ერთი % სიყალბე არ არის... ლიზასთან რა იქნება მომავალში ნამდვილად არ ვიცი, ან შეიძლება ვიცი კიდეც... მაგრამ ფაქტია ის არის, რომ ამ ნაბიჯით მე ის ჩემი კარიერის მუდმივ თანამგზავრად ვაქციე.

ლალი ფაცია