დედამიწიდან უცხოპლანეტელთათვის 90 000 შეტყობინება გაიგზავნა

ამერიკული კომპანია ”უვინგუს” წარმომადგენლებმა, რომელთაც ნასა აფინანსებს, მარსზე უცხოპლანეტელებისთვის 90 000 რადიო შეტყობინება გაგზავნეს. ასე აღნიშნეს ამერიკაში პლანეტაზე პირველი წარმატებული მისიის 50-ე წლისთავი.

”ეს პირველი შემთხვევაა, როდესაც ადამიანების შეტყობინება მარსზე რადიოს საშუალებით გაიგზავნა”, - ამბობენ კომპანიის წარმომადგენლები.

აქციაში მონაწილეობა ცნობილმა ადამიანებმაც მიიღეს. მაგალითად, მსახიობმა სეტ გრინმა მარსის მცხოვრებლებს მისწერა, რომ ერთი სული აქვს, როდის ჩამოვლენ ისინი დედამიწაზე და ”სტარბაქსის ერთ-ერთ ფილიალში მოკალათდებიან”.

მსახიობმა ჯორჯ ტაკეიმ, რომელიც სერიალ ”სტარ ტრეკითაა” ცნობილი, უცხოპლანეტელებს ხომალდ ”ენტერპრაისის” მშვიდობიანი მისიის შესახებ მოუყვა და შეტყობინება სერიალის ტრადიციული ფრაზით - ”იცხოვრეთ დიდხანს და აყვავდით” დაასრულა. სხვებმა მარსის მკვიდრებს თავიანთი ფოტოები, ისტორიები და სურვილები გაუზიარეს.