პრობლემების ჯაჭვი, რომელიც თბილისში საცობს ქმნის - რა განტვირთავს ქალაქს

თბილისში არსებული საცობები მძღოლების თავსატეხად იქცა. რა გამოსავლის პოვნა შეიძლება ამ პრობლემიდან, ამაზე კომენტარი საკრებულოს დეპუტატს, ფრაქცია "დემოკრატიული მოძრაობის" წევრს შალვა ოგბაიძეს ვთხოვეთ:

- იმას, რასაც მე ვამბობ, შეიძლება დავარქვათ არა გეგმა, არამედ შეთავაზება. 4 თვეა, რაც ახალი შემადგენლობა შეუდგა მუშაობას, როგორც მერიაში ასევე საკრებულოშიც, მაგრამ ჯერჯერობით მოძრაობის მოწესრიგების კუთხით არაფერი გაუმჯობესებულა - მეტიც, დღითიდღე მძიმდება სიტუაცია.

საავტომობილო საცობი ესაა სარკე იმ პრობლემებისა, რომელიც გროვდება იმ სფეროში, რომელსაც მოძრაობის ორგანიზება ჰქვია. მოძრაობის მოწესრიგება არაა მხოლოდ კარგად დაგებული ასფალტი ან თუნდაც სწორად მონიშნული ნიშნები. მოძრაობის ორგანიზება გაცილებით ფართო და ვრცელი ცნებაა, ვიდრე უბრალოდ ინფრასტრუქტურული პროექტი, თუმცა ბუნებრივია, ინფრასტრუქტურა უმნიშვნელოვანესი ნაწილია.

მოძრაობის მოწესრიგებისთვის მუშაობა უნდა წარიმართოს როგორც ათწლიანი პერსპექტივით, ისე სწრაფი რეაგირების კუთხით. მაგ: კონკრეტული ახდილი ჭა, გაფუჭებული გზა, ორმო და სხვა. მაშინვე უნდა იყოს დაფიქსირებული, რადგან პატარ-პატარა პრობლემა ჯამში იძლევა დიდ პრობლემას. ერთ კონკრეტულ მაგალითს გეტყვით: სასტუმრო "აჭარის" წინ მდებარე მოედნის გასხვისება იყო უდიდესი შეცდომა და ეს გვაჩვენა პრაქტიკამ, ვინაიდან ნაკადს, რომელიც მოდის სააკაძის მოედნიდან და აგრძელებს მოძრაობას პირდაპირ, უწევთ ჯერ "დანიურ სახლთან" არსებულ შუქნიშანზე გაჩერება, შემდეგ კი მარჯვნივ ხვდებათ კიდევ მეორე შუქნიშანი. ანუ რა გამოდის, ეს ნაკადი პრაქტიკულად იჭედება.

ზოგადად, მოედნის დანიშნულება სხვადასხვა მიმართულებით მოძრავი სატრანსპორტო ნაკადების მოწესრიგებაა. გავიხსენოთ ამ მოედანზე არსებული სიტუაცია გასხვისებამდე და გასხვისების შემდეგ. გასხვისებამდე ამ ტერიტორიაზე თითქმის არ იყო საცობი. ამ მოედნის გასხვისებამ გზა გაუმრუდა დოლიძის ქუჩაზე მცხოვრებთაც, რომლებსაც მეტროდან ამოსვლის შემდეგ უწევთ ჯერ "დანიური სახლის" მხრიდან გაჭრან ქუჩა, შემდეგ გადაკვეთონ პეკინის გამზირი, წავიდნენ მარცხნივ და მოხვდნენ თავიანთ ქუჩაზე. მოედნის გასხვისებით ხალხს ცხოვრების წესი შეეცვალა, ამიტომ მერიამ უნდა გააკეთოს ყველაფერი და სასტუმროს მეპატრონეს დაელაპარაკოს ამ თემაზე. სხვათა შორის, ეს მოედანი არც იმ მეპატრონეს არ არგია. ამ მოედანზე მხოლოდ ავტო-სადგომია და მეპატრონემ ვერავითარი ინვესტიცია იქ ვერ ჩადო. იქ რამის აშენება გამორიცხულია, რადგან ქვეშ მეტრო გადის, ამიტომ მერიამ სასწრაფოდ უნდა დაიწყოს ამაზე მოლაპარაკება.

მოძრაობის ორგანიზებას უნდა ჰყავდეს ერთი პატრონი, რომელიც დაექვემდებარება უშუალოდ მერს ან მერის პირველ მოადგილეს. მან პასუხისმგებლობა უნდა აიღოს როგორც გრძელვადიან პროექტებზე, ისე მოკლევადიანზე. აუცილებლად უნდა გაუმჯობესდეს კოორდინაცია საპატრულო პოლიცისთან, სამაშველო სამსახურთან, აგრეთვე "სითი პარკთანაც" (რომელიც ყოველგვარ იურიდიულ ჩარჩოებს სცდება). საშუქნიშნე მეურნეობაც ძალიან მნიშვნელოვანია. ყველაფერმა, რაც გზასთანაა დაკავშირებული, ერთ ხელში უნდა მოიყაროს თავი, თორემ კიდევ უფრო დამძიმდება სიტუაცია.

- ბევრ ქვეყანაშია, როდესაც ერთი კონკრეტული მანქანის მეპატრონეს მხოლოდ ლუწ დღეებში აქვს მგზავრობის უფლება და მეორეს მხოლოდ კენტ დღეებში. ასეთ რამ თუა შესაძლებელი ჩვენთან?

- ასეთი პარქტიკა ნამდვილად არსებობს, მაგრამ მე მიმაჩნია, რომ მოძრაობის სწორად რეგულირების შემთხვევაში, კიდევ რამდენიმე წელი არ ემუქრება ეს "დრაკონული" მეთოდი. დამერწმუნეთ, ეს არაა კარგი, როდესაც მე დღეგამოშვებით მომიწევს მანქანით სიარული. თუ სწორად მოვაწესრიგებთ მოძრაობას, ჩვენ შეგვიძლია დავუბრუნდეთ ათი წლის წინანდელ მდგომარეობას.

- როგორ ფიქრობთ, შემოვლითი გზის პროექტი თუ უნდა განხორციელდეს?

- შემოვლითი გზის აშენებას ალტერნატივა არ გააჩნია, აუცილებლად უნდა აშენდეს. შემოვლითი გზა უნდა იყოს, უბრალოდ, რა ადგილას იქნება, ეს უკვე ტექნიკური ნაწილია და ეს შესაბამისი პირების გადასაწყვეტია. შემოვლითი გზა ძალიან განტვირთავს მოძრაობას.

- საზოგადოებრივი ტრანსპორტი თუ ქმნის პრობლემას?

- რა თქმა უნდა, და ესეც მისახედია. თუ დააკვირდებოდით, ზოგან მკვეთრი დეფიციტია და ზოგან სიჭარბეა, ამიტომ ერთ გაჩერებაზე, როდესაც პიკის საათში 5 ავტობუსი და ორი ამდენი მიკრო-ავტობუსი იყრის თავს, დამერწმუნეთ, იქ დამთავრებულია მოძრაობის დარეგულირება. საზოგადოებრივი ტრანპოსრტის მოძრაობა ცალკე მოსაწესრიგებელია. ასევე გადასახედია, სად შეიძლება სამარშრუტო ტაქსის გაჩერება და სად არა. მაგალითად, ჩვეულებრივ დარღვევად ითვლება შუქნიშნის ხაზზე მანქანის გაჩერება, თუმცა იგივე ფაქტი დარღვევად არ ეთვლება სამარშრუტო ტაქსს. იქნებ ვინმემ ამიხსნას რატომ?!

- მძღოლების არაპროფესიონალიზმიც ხომ არ ქმნის პრობლემას?

- ყველა გარემოება, რაც მოძრაობის დარეგულირებას ეხება, მნიშვნელოვანია, მაგრამ ამ ყველაფრით უნდა ისარგებლოს ჭკვიანმა მძღოლმა და ჭკვიანმა ქვეითმა, უფრო მართებული იქნება თუ ვიტყვით - მაღალი კულტურის მქონე მძღოლმა და მაღალი კულტურის მქონე ქვეითმა. სად უნდა შეიძინონ ეს კულტურა?! საბავშვო ბაღიდან დაწყებული დამთავრებული ავტო სკოლით, რომელიც შეიძლება ითქვას, არ არსებობს დღევანდელ საქართველოში. ჩვენ ხშირად ვამბობთ, რომ მივდივართ ევროპისკენ, მაგრამ ეს არაა გზა ევროპისკენ, ესაა გზა მონღოლეთისაკენ, ჩვენ ძალიან სწრაფად უნდა გავასწოროთ ჩვენი ცხოვრების კომპასი არა გეოგრაფიული დასავლეთისაკენ, არამედ მაღალი კულტურის მქონე ქვეყნებისაკენ, სადაც მძღოლი ქვეითს უღიმის და ქვეითმა იცის, სად გადაკვეთოს გზა და სად არა.

ლადო გოგოლაძე

AMBEBI.GE

გამოყენებულია Che Anothordonic Photography-ს ფოტო