"ივანიშვილის საქართველო არის დაჩმორებული და გაბანძებული საქართველო" - სააკაშვილის მიმართვა აქციის მონაწილეებს

ჩვენ წინაშეა ორი დაპირისპირებული მოდელის საქართველო - ერთი, რომლისაც გვჯერა ჩვენ და მეორე - რომელიც უნდა ივანიშვილს , - ამის შესახებ საქართველოს ყოფილმა პრეზიდენტმა მიხეილ სააკაშვილმა განაცხადა, რომელმაც პარლამენტის წინ მიმდინარე აქციის მონაწილეებს უკრაინიდან მიმართა.

სააკაშვილის თქმით, ამ ორ ხედვას შორის დიდი განსხვავებაა. "არასდროს ყოფილა ჩვენ წინაშე არჩევანი ასე ცხადი. ჩვენ წინაშეა ორი ურთიერთდაპირისპირებული მოდელის საქართველო. ერთი, რომლისაც გვჯერა ჩვენ და მეორე - რომელიც უნდა ივანიშვილს. ამ ორ ხედვას შორის ძალიან დიდი განსხვავებაა, რადგან ერთი მხრივ, არის ღირსეული და, მეორე მხრივ, მიჯირყვნილი საქართველო. ერთის მხრივ არის საქართველო, რომელიც მიუხედავად დიდი წინააღმდეგობებისა, მაინც იბრძვის დამოუკიდებლობისთვის და არის მეორე საქართველო, რომელიც ბაბაიას ეძახის დათვს და მორჩილად მოყვება მას ბუნაგში. ერთი მხრივ არის საქართველო, რომელიც მთელი მსოფლიოს გასაგონად საუბრობს ოკუპაციაზე, ჩვენს უფლებებზე, ჩვენს ლტოლვაზე თავისუფლებისკენ და მეორე მხრივ არის საქართველო, რომელსაც არ სჯერა, რომ რუსეთს აქვს დამპყრობლის გეგმები და აგრესიული ზრახვები ჩვენ და სხვა მეზობლების მიმართ. ერთი მხრივ არის საქართველო, რომელიც მიდის ევროპის გზით, რომელსაც სწამს, რომ მხოლოდ ამ გზას მივყავართ თავისუფლებისკენ, როგორც ეს სწამდა სულხან-საბა ორბელიანს, დავით აღმაშენებელს, ილია ჭავჭავაძე და სხვა საზოგადო მოღვაწეებს და მეორე მხრივ არის საქართველო, რომელიც იმას, თუ რომელი გზით იაროს უთავმოყვარეოდ უთანხმებს კარასინს, კრემლის შიკრიკს", - განაცხადა მიხეილ სააკაშვილმა.

ფოტოგალერეა

ქვეყნის ყოფილი პრეზიდენტის თქმით, ჩვენ საკმარისად ვნახეთ განვლილ ორ წელიწადში განსხვავება საქართველოს ამ ორ მოდელს შორის.

"ერთი მხრივ არის საქართველო, რომელიც არის რუსეთის მიერ ოკუპირებული და მეორე მხრივ საქართველო, რომელშიც ამბობენ, რომ სეპარატისტები 25 წელია, იბრძვიან თვითგამორკვევისთვის. ერთი მხრივ არის საქართველო, რომელიც მიისწრაფვის იმისკენ, რომ მთელი მსოფლიო ცივილიზებულ პარტნიორებად გვთვლიდეს და მეორე მხრივ არის საქართველოს მთავრობა, რომელიც ლანძღავს ყველა ჩვენს მეგობარს და ამცირებს ჩვენ ყველა კეთილისმსურველს. ერთი მხრივ არის საქართველო, რომელიც ცდილობს ყველა საერთაშორისო ბერკეტის გამოყენებას ჩვენ გადასარჩენად და მეორე მხრივ არის საქართველო, რომელსაც მიაქანებენ საერთაშორისო იზოლაციისკენ. ერთი მხრივ არის საქართველო, რომელიც არ შეურიგდება და არ ურიგდება ჩვენი უკრაინელი ძმების ჩაგვრას და მეორე მხრივ არის საქართველო, რომლის მთავრობას ერთი ხმა არ ამოუღია უკრაინელი ხალხის დასაცავად. ივანიშვილის ოცნებაში საქართველო არის ერთი პროვინციელი დიქტატორის ოცნებაზე მორგებული ქვეყანა, რომელიც უვარგისად მიიჩნევს დავით აღმაშენებლის, თამარის, ილია მიერ დატოვებული საქართველოს იდეას. ივანიშვილის ოცნებაში საქართველო პატარა, უმნიშვლეო სოფელი უნდა იყოს, რომელსაც არ უნდა გააჩნდეს რეგიონალური ამბიციები. საქართველო, რომელსაც ჩვენ ვხედავთ ტერიტორიულად პატარაა, მაგრამ ძალიან დიდია თავისი მნიშვნელობით, სამაგალითოა ბრძოლისუნარიანობით, მისაბაძია მეგობრებისთვის და ანგარიშგასაწევია მტრებისთვის", - მიმართა სააკაშვილმა აქციის მონაწილეებს.

იხილეთ ვიდეო

იხილეთ ყველაზე საინტერესო აქციიდან თეგზე #არა ანექსიას