მისია "როზეტა" კომეტაზე დაეშვა - დედამიწაზე სიცოცხლის გაჩენის ისტორიას ნათელი მოეფინება

ევროპული კოსმოსური სააგენტოს ინფორმაციით, ზონდი Philae წარმატებით დაეშვა ე.წ. ჩურიუმოვ-გერასიმონეკოს კომეტაზე. ზონდი კოსმოსურ აპარატ როზეტას 12 ნოემბერს გამოეყო, რომელმაც დედამიწა ჯერ კიდევ 2004 წლის 2 მარტს დატოვა და დაახლოებით 10 წლის განმავლობაში მიფრინავდა კომეტისკენ.

მისიის ძირითად მიზანს ადრეული მზის სისტემის ევოლუციის შესწავლა წარმოადგენს. ამბიციური პროექტის წარმატებით დასრულების შემთხვევაში, მოვლენა, შესაძლოა, ერთ-ერთ ყველაზე საკვანძო შემთხვევად იქცეს არა მხოლოდ ასტრონომიის, არამედ ზოგადად, ტექნოლოგიების ისტორიაში. კომეტა 67P/ჩურიუმოვ-გერასიმენკო 1969 წელს, საბჭოთა ასტრონომმა კლიმ ჩურიუმოვმა, სვეტლანა გერასიმენკოს მიერ გადაღებული ფოტოსურათების კვლევის დროს აღმოაჩინა. კომეტა მოკლეპერიოდულთა რიცხვს მიეკუთვნება: მისი მზის გარშემო ბრუნვის დრო 6,6 წელიწადია.

მსგავსი კოსმოსური სხეულების კვლევა აუცილებელია, პირველ რიგში იმიტომ, რომ მოხდეს კომეტის ევოლუციის და კომეტიდან აორთქლილი აირების მიერ, მიმდებარე კოსმოსურ სხეულებზე შესაძლო გავლენის შესწავლა. მისია "როზეტას" მიერ მოპოვებული მონაცემები, მეცნიერებს დაეხმარება, ახსნან მზის სისტემის ევოლუციის პროცესები და ნათელი მოფინონ დედამიწაზე წყლის გაჩენის ისტორიას. გარდა ამისა, მეცნიერები იმედოვნებენ, აღმოაჩინონ L-ფორმის ამინომჟავის კვალი, რომელიც დედამიწაზე სიცოცხლის გაჩენის საფუძველს წარმოადგენს. თუკი ზემოთ ნახსენები ნივთიერებების კომეტაზე არსებობა დამტკიცდება, დედამიწაზე კოსმოსიდან გაჩენილი სიცოცხლის ჰიტოთეზა დადასტურდება.