რას პასუხობს თამუნა ლეკვეიშვილი ქეთი დოლიძის კრიტიკას

''ახლა ვუყურებ ''რუსთავი 2''-ზე ჩემზე უნიჭო კარიკატურას... ბრავო! ქალაქშიც ბევრჯერ დამხატეს... ერთხელ მამამ მითხრა, თუ შენზე კარიკატურა შექმნეს, ესე იგი, რაღაცას წარმოადგენო!!! ''რუსთავი 2''-ის ''მსახიობებს'' ვურჩევ, ჩემთან გაიარონ ოსტატობის გაკვეთილები. კარგად მოვამზადებ... იქნებ, გაეცინოს მაინც ვინმეს! ასეა, ბიძიკო, პროვინციალიზმი საშინელი რამაა! ''რუსთავი 2'' კი უკვე მრავალი წელია, თავისი ''კომედი შოუთი'' სულ აგიზგიზებს პროვინციალიზმს... გოიმობა კი აღმოუფხვრელია! ძალიან ცოდვა ხართ და რა ვქნა. იაფფასიანი იუმორი კი ყველაზე მოთხოვნადია!''

- ეს სტატუსი ქალბატონმა ქეთი დოლიძემ ''კომედი შოუს'' იმ სკეტჩს მიუძღვნა, სადაც პოლიტიკური თოქშოუ იყო გაშარჟებული. ჟიმნი მებონია, იგივე ვახო ბიჭიკაშვილი, ''დუღარე შოუს'' წამყვანი გახლდათ, მოწვეულ სტუმრებთან ერთად კი სტუდიაში თამუნა ლეკვეიშვილიც იჯდა, რომელიც ქეთი დოლიძის პაროდიას აკეთებდა.

თამუნა ლეკვეიშვილი ანიმაციურ სერიალ ''ქერის უბანში'' ეკა ბესელიას ახმოვანებს. მასთან საუბარი სწორედ ამ გმირით დავიწყეთ.

- სანამ ''ქერის უბანი'' დაიწყებოდა, გავაკეთეთ სკეტჩი, გადაცემის ''რა, სად, როდის'' პაროდია. ინტელექტუალურ თამაშს პოლიტიკური გუნდი თამაშობდა. გუნდის ერთ-ერთი წარმომადგენელი იყო ეკა ბესელია. ჩემსა და ეკას შორის არანაირი მსგავსება არ არის, ჩავთვალეთ, რომ არ გამოვიდოდა ეკასთან მიმსგავსება, ამიტომ გადავწყვიტეთ, ხმით დავმსგავსებოდი და ის ცნობილი ''ხააალხოც'' ამ სკეტჩში დაიბადა. შემდეგ ''ქერის უბანი'' რომ დავიწყეთ, ეკას გახმოვანება მე მანდეს. ეკაც გვეხმარება პერსონაჟის განვითარებაში, ახლა უკვე ინგლისური ფრაზებიც შემოგვაშველა (იცინის). ხალხს ეს პერსონაჟი მოსწონს.

- თუ იცი ეკას დამოკიდებულება მისი პაროდიის შესახებ.

- მე ვნახე გიორგი გაბუნიას ერთ-ერთი გადაცემა, სადაც გიორგიმ ჰკითხა ეკას, თუ მოგწონთ თქვენი პერსონაჟიო. მომწონს, ძალიან ვხალისობ, მაგრამ ამხელა ხმა არ მაქვსო, უპასუხა ეკამ.

- სამაგიეროდ, თავისი პერსონაჟი არ მოეწონა ქეთი დოლიძეს ''დუღარე შოუში'' და მას უნიჭო კარიკატურა უწოდა.

- ქალბატონი ქეთი ''კომედი შოუს'' პროვინციულ იუმორს უწოდებს. გემოვნებაზე არ დავობენ, ყველა თავად ირჩევს, როგორი იუმორი მოეწონოს. რაც შეეხება კონკრეტულად მის პაროდიას, თუ არ მოსწონს, არც ეს არის ჩემთვის პრობლემა. მე არ ვარ პროფესიონალი მსახიობი, თუმცა ვთვლი, რომ მისი, როგორც თავად უწოდებს, უნიჭო კარიკატურა, ბევრს მოეწონა. ამას მოწმობს მაყურებლის რეაქცია, მათი კომენტარები სოციალურ ქსელებში, გზავნილები ჩემს ინბოქსში ''ფეისბუქზე''. ეს გადაცემის რეიტინგზეც აისახა. იმდენად კარგი სკეტჩი გამოვიდა, თვითონაც არ ველოდით.

იხილეთ გაგრძელება