4
ივნისიდღის ზოგადი ასტროლოგიური პროგნოზი
გაუვალი ჩიხები, უამრავი გარემოვაჭრე, სუნი, ანტისანიტარია, დაუსრულებელი მშენებლობა - ამ ყველაფრის გადალახვა ყოველდღიურად მეტრო "ახმეტელის" მიმდებარე ტერიტორიაზე გამვლელებს უწევთ. შესასვლელში დაწყებულმა უზარმაზარმა მშენებლობამ, რომელიც უკვე თითქმის ორი წელია გრძელდება, მეტროში ჩამსვლელ-ამომსვლელებისთვის მხოლოდ ვიწრო გასასვლელი დატოვა, რომელიც, ამ ტერიტორიით მოსარგებლე ადამიანების რიცხვს თუ გავითვალისწინებთ, ისედაც შეუფერებელია და თან ისიც გარემოვაჭრეებითაა სავსე.
"ახმეტელის" მეტროთი ძირითადად გლდანისა და მუხიანის მოსახლეობა სარგებლობს, რომელთა საერთო რაოდენობაც 300 ათასამდეა. ალბათ ადვილი მისახვედრია, თუ რამდენ ადამიანს აწუხებს პრობლემა. ნათელია ისიც, რომ ასეთ ტერიტორიაზე ფართო გასასვლელებია საჭირო და არა ჩახერგილი საცალფეხო ბილიკები.
დაახლოებით 2 წლის წინ, მანამ, სანამ მეტროს შესასვლელთან მშენებლობა გაჩაღდებოდა, ასეც იყო, მაგრამ ახლა, დილიდან გვიან ღამემდე ტერიტორია მუდმივად ხალხითაა სავსე.
აქ გადასაადგილებლად საკმაოდ დიდი ენერგია, დრო, გამძლე ნერვები და შესაშური მოთმინება დაგჭირდებათ, რათა გვერდი აუქციოთ და მოიშოროთ ბოსტნეულის, ხილის, ტანსაცმლის, ფეხსაცმლის თუ "ბულკი-ქადა-ტუფლის მაზი"-ს გამყიდველები.
გარემოვაჭრეების პრობლემა თბილისისთვის არახალია, თუმცა, სამართლიანობისთვის უნდა აღინიშნოს, რომ ქვეყნისა და ქალაქის მთავრობის შეცვლამდე, მათ ამ ადგილის დაკავების საშუალებას არ აძლევდნენ. გარემოვაჭრეებს იმავე ტერიტორიაზე მოზრდილი მაღაზიაც გამოუყვეს, რათა თავიანთი საქმიანობა იქ გაეგრძელებინათ და სიტუაციაც გამოსწორდა. თუმცა, 2012 წლის არჩევნების შემდეგ მაღაზიებიდან კვლავ ქუჩაში გადმოინაცვლეს და როგორც ჩანს, ამას არც არავინ უშლით.
რაც შეეხება მშენებარე შენობას, იქვე გამოკრულ აბრაზე აღნიშნულია, რომ დამკვეთია შპს "სალხინო 93", აშენდება "გლდანი მოლი", რომელიც იქნება მრავალფუნქციური სავაჭრო-საზოგადოებრივი ცენტრი. მასში განთავსდება მაღაზიები, კინოთეატრი, გასართობი ცენტრები, სუპერმარკეტი და ა.შ.
ადრე გავრცელებული ინფორმაცია იმის შესახებ, რომ იქ ჰიპერმარკეტი "კარფურიც" გაიხსნება, ტყუილი აღმოჩნდა, როგორც კომპანიაში აცხადებენ, გახსნა 2014 წლის 1-დან 15 დეკემბრამდე იგეგმება.
შეწუხებული მოსახლეობა ამბობს, ორმ მდგომარეობა უკვე გაუსაძლისია, მაგრამ "გამკითხავი არავინ არის". მათი თქმით, გარდა იმისა, რომ მეტროში მოსახვედრად დიდი ძალისხმევა სჭირდებათ, საკმაოდ ხშირია ჩხუბი და აყალ-მაყალიც.
"აქ სულ ხმაურია. "ციგნები" ხან ერთმანეთში ჩხუბობენ, ხან კლიენტებს ეჩხუბებიან. მორიდება მაგათ არ აქვთ და შეგნება. რომ გაივლი, თუ შემოთავაზებული ნივთი არ იყიდე, უკან ლანძღვას მოგაყოლებენ. შუა საუკუნეებში ვცხოვრობთ თუ რა ხდება?! ამ ქალაქს და უბანს პატრონი არ ჰყავს?
"ამას წინათ ერთი ქალი საშინელ დღეში ჩააგდეს. მეტროდან ამოვედი და ვნახე, რომ საშინელი წივილ-კივილი იყო. ვიღაცას ეჩხუბებოდნენ ყველა ერთად. როგორც აღმოჩნდა, ამ ქალს ერთ-ერთ მათგანთან რაღაც უყიდია და სახლში აღმოუჩენია, რომ "ბრაკი" იყო და უკან ჩამოუტანა, ფულის დაბრუნებას ითხოვდა. დაესივნენ და ისეთ დღეში ჩააგდეს, ისე გალანძღეს ქალებმაც და კაცებმაც, შემეშინდა რამე არ დამართნოდა.
"პოლიციას სძინავს ამ დროს?! ხომ ხედავენ აქ რა ხდება, ისედაც ამხელა შენობა ჩააკვეხეს უადგილო ადგილას და ის გასასვლელები მაინც გაანთავისუფლონ გარემოვაჭრეებისგან, რაც დარჩა.
"ჯერ ის ადამიანია დასაჭერი, ვინც აშენების უფლება გასცა. ასეთ ხალხმრავალ ტერიტორიაზე მეტროს ამოსასვლელში, შუა გზაზე ამხელა რაღაცის დადგმა შეიძლებოდა?!" - ამბობს "მთელ კვირასთან" საუბრისას გლდანის მე-7 მიკრორაიონის მცხოვრები ლია ზუმბაძე.
"აქაურობას პატრონი არ ჰყავს. სამსახურის გამო ყოველდღე მიწევს აქ გავლა და ტალახი, სუნი, უამრავი ხალხი - ძალიან შემაწუხებელია.
"ამ შენობის გამო ისედაც ვიწრო გასასვლელებია დატოვებული და იქაც გარემოვაჭრეები სხედან, რომლებსაც სულ ხალხი ესევა და გზას კეტავენ. პირდაპირ შუა ქუჩაში იზომებენ ტანსაცმელს. ცივილურ ქალაქში ეს უნდა ხდებოდეს? ხომ აქვთ ბაზრობებისთვის გამოყოფილი ადგილი, შევიდნენ და იქ დასხდნენ, ჩვენ რა დავაშავეთ?" - ამბობს კიდევ ერთი გლდანელი ბენო ჭყოიძე.
კიდევ ერთმა ადგილობრივმა მცხოვრებმა ნინო ხიმშიაშვილმა კი განგვიცხადა, რომ შექმნილი პრობლემის გამო საცხოვრებელი ადგილის გამოცვლას ფიქრობს.
"ახმეტელის" მეტროსთან ვცხოვრობ და უკვე ვფიქრობ, ბინა გავყიდო და გადავიდე. ასეთ ხმაურსა და ანტისანიტარიაში ცხოვრება შეუძლებელია. ფაქტობრივად, ერთი დიდი ბაზრის შუაგულში გვიწევს ცხოვრება, იმიტომ, რომ ყოველ ფეხის ნაბიჯზე გარემოვაჭრეები სხედან. ადამიანს ბაზარში შესვლა აღარც სჭირდება, ყველაფერი ქუჩაშივე იყიდება.
"ნაციონალების" დროს ერთი პერიოდი აკრძალეს გარეთ ვაჭრობა და ნორმალური სიტუაცია იყო. ხელისუფლება რომ შეიცვალა, ისევ გაივსო აქაურობა ხალხით", - გვითხრა ხიმშიაშვილმა.
არგუმენტები გარემოვაჭრეებსაც აქვთ. უმეტესობა ჩვენმა გამოჩენამ და კითხვამ გააღიზიანა - უკეთესი სამსახური გვიშოვეთ და წავალთ, ამ სიცივეში ჯდომა არც ჩვენ გვსიამოვნებსო. ერთ-ერთმა მათგანმა, ქალბატონმა ნელიმ კი ისიც გვითხრა - ბაზარში დადგომაც ვცადე, მაგრამ აღარაფერი მრჩებოდა და ისევ აქ გამოვედიო.
"რატომ უნდა შევიდე ბაზარში? იქაც ისევე ცივა, ყინავს, ტალახია, მაგრამ თან გადასახადს მახედვინებენ და პურის ფული აღარ მრჩება. კომფორტს რომ გვიწყობდნენ, კიდე ჰო, მაგრამ რაში ვიხადო გადასახადი, რკინის დახლში? მირჩევნია, ისევ აქ ვიჯდე, რასაც ვშოულობ, "სუფთად" მაინც მრჩება", - გვითხრა მან.
მოვაჭრეები იმედს გამოთქვამენ, რომ ტერიტორიის დატოვებას არც "გლდანი მოლის" მშენებლობის შემდეგ აიძულებენ. თუმცა, კომპანიაში აცხადებენ, რომ გახსნამდე სავაჭრო ცენტრის გარე პერიმეტრიც მოპირკეთდება და მოწესრიგდება. იგულისხმება თუ არა ამაში გერემოვაჭრეებისგან მისი გასუფთავება, არ იციან, თუმცა ამბობენ, რომ "ისინი იქ უკანონოდ სხედან".
"საერთოდაც, გასასვლელი მოლშივე იქნება. ჩვენ ფართო გასასვლელს ვტოვებთ და მეტროში მიმავალი ხალხი დილის 6 საათიდან ღამის 1 საათამდე შენობაშივე გაივლის", - გვითხრა კომპანიის ტექნიკური სამსახურის უფროსმა ზვიად ჯამალაშვილმა.
დედაქალაქის საკრებულოში ამბობენ, რომ გარემოვაჭრეების პრობლემის გადაწყვეტა ამ ეტაპზე არ იგეგმება და მათთვის არც აკრძალვის დაწესებას აპირებენ. კითხვას "ახმეტელის" მეტროს მიმდებარე ტერიტორიის მდგომარეობაზე საკრებულოს უმრავლესობის წევრი, სოფელ გლდანისა და გლდანულას მაჟორიტარი კობა კობალაძე შემდეგნაირად პასუხობს:
"სამწუხაროდ, მძიმე მემკვიდრეობა დაგვხვდა. ნელ-ნელა ყველაფერი სწორდება და კეთდება. არა მარტო გარემოვაჭრეების ინტერესი იქნება დაცული, არამედ ჩვენი ქალაქის თითოეული მცხოვრებისაც.
"ჯერჯერობით არავითარ აკრძალვაზე საუბარი არაა. მაგ საკითხს არ განვიხილავთ, რადგან ვიცით, თუ რა მძიმე სოციალური მდგომარეობაა ქვეყანაში.
ჩვენ მხოლოდ იმაზე ვსაუბრობთ, თუ რა შეიძლება გაკეთდეს ქალაქისთვის უკეთესი როგორც კი რაღაც ჩამოყალიბდება, რა თქმა უნდა, თქვენც გაიგებთ", - განუცხადა "მთელ კვირას" კობალაძემ.
თაკო მათეშვილი
