მუსლიმი სასულიერო პირები ერთმანეთს უპირისპირდებიან

ჭელის მეჩეთის წინამძღვარი ჯამბულ აბულაძე სრულიად საქართველოს მუფთს ჯემალ პაქსაძეს მოსახლეობის შეცდომაში შეყვანაში ადანაშაულებს. მისი თქმით, ადიგენის მუნიციპალიტეტის სოფელ მოხეში მდებარე სადავო შენობის გამო მოსახლეობის დაპირისპირება მისმა საქციელმა გამოიწვია. 

"ეს ყველაფერი არის ჯემალ პაქსაძისა და ადგილობრივი ხელმძღვანელობის დანაშაულებრივი მოქმედების ბრალი. არჩევნების წინ იყვნენ ჩამოსული და მუსლიმებს დაპირდნენ, რომ შენობას დაუბრუნებდნენ. ამიტომ, ხალხს იმედი მიეცა და ის მივიღეთ დღეს სახეზე, რაც მივიღეთ. რატომ არ ჩამოდის დღეს, რომ თავისი დაპირების შესახებ ხალხს პასუხი გასცეს?! პაქსაძე არალეგიტიმურია, ის ვეღარ იქნება ჩვენი წინამძღვარი, მოსახლეობას ატყუებს", - ამბობს აბულაძე.

წინასაარჩევნო პერიოდისგან განსხვავებით, მუფთი  ჯემალ პაქსაძე ახლა აცხადებს, რომ მოხის მეჩეთის საკითხთან დაკავშირებით, ადიგენში წასვლას არ აპირებს. მისი თქმით, იქ არის როგორც სამცხე-ჯავახეთის მუფთი, ასევე ადგილობრივი ხელისუფლება, ამიტომ, მის ჩართულობას ამ ეტაპზე საჭიროდ არ მიიჩნევს. იგი წინასაარჩევნო დაპირებასაც უარყოფს.

"დაპირება არ მიგვიცია, ეს იყო თხოვნა, - აცხადებს პაქსაძე და დასძენს, რომ ჯამბულ აბულაძესთან დაპირისპირებაზე არ ისაუბრებს, "თუ რაიმე უნდა, თავად მითხრას, ამის შესახებ პირველად მესმის".

სოფელ მოხეში ადგილობრივი ქრისტიანები და მუსლიმები ერთმანეთს მეჩეთის ძველი შენობის გამო  დაუპირისპირდნენ.

იხილეთ ვრცლად

”სამხრეთის კარიბჭე”