ფოთის მერიაში 168 ადამიანი სამსახურიდან გაათავისუფლეს
რეორგანიზაციის მიზეზით, თვითმმართველი ქალაქ ფოთის მერიიდან 168 თანამშრომელი გაათავისუფლეს.
ფოთის მერის, ირაკლი კაკულიას ხელმოწერილი ბრძანება დაკავებული თანამდებობიდან გათავისუფლების შესახებ მერიის უკვე ყოფილმა თანამშრომლებმა 1 ოქტომბერს მიიღეს. ბრძანებაში ნათქვამია გათავისუფლების მიზეზი - განხორციელდა მერიის სტრუქტურული ერთეულების რეორგანიზაცია, რის შედეგად შემცირდა სამსახურების ნუსხა.
თუმცა მერის ამ გადაწყვეტილებას უკანონოს უწოდებს მერიის კულტურისა და ძეგლთა დაცვის სამსახურის განათლების განყოფილების ყოფილი ხელმძღვანელი ნინო ჯაკონია. მისი თქმით, რეალობა ეწინააღმდეგება დოკუმენტში ასახულს. კერძოდ, ნინო ჯაკონიას თქმით, მისი განყოფილება არ შემცირებულა, თუმცა ის სამსახურიდან მაინც ამ მიზეზით გაათავისუფლეს. ჯაკონია მიიჩნევს, რომ მერიის გადაწყვეტილებას "პოლიტიკური სარჩული აქვს". მას მედიასთან დეტალებზე საუბარი არ სურს, თუმცა ამბობს, რომ მისი მეუღლე არის ერთ-ერთი ოპოზიციური პარტიის წარმომადგენელი: "ვფიქრობ, შეიძლება სამსახურიდან დათხოვნის ერთ-ერთი მიზეზი ეს იყო, რადგან რეალურად მათ სხვა მიზეზი არ გააჩნიათ".
ნინო ჯაკონია და გათავისუფლებული თანამშრომლების ნაწილი სარჩელის შესატანად დოკუმენტაციას უკვე ამზადებს, ნაწილს კი მერიის წინააღმდეგ სასამართლოსთვის მიმართვა ჯერ არ გადაუწყვეტია.
იმერეთის გუბერნატორის ხელფასი გაორმაგდა
ორი ობლისა და ორი ბებიას შემზარავი გასაჭირი გურიაში
