"ქალი რომ ქმარს უღალატებს, უნდა დაისაჯოს!" - რა ვითარებაში მოკვდა 30 წლის ქალი ლამბალოში

საგარეჯოს მუნიციპალიტეტის სოფელ ლამბალოს მკვიდრის, 30 წლის ხანუმ ჯეირანოვას თვითმკვლელობამ საზოგადოება შეძრა. ადგილობრივთა მონათხრობით, ის ქმრის ნათესავებმა ქმრის ღალატში საჯაროდ ამხილეს,- საყვარელთან ყოფნის დროს გადაღებული მისი ფოტოები გაავრცელეს, რის შემდეგაც სოფლის ბირჟის თვალწინ სცემეს; ნაცემი სოფლის მაღაზიის უკან გაიყვანეს, სადაც კვლავ სცემეს. ბოლოს მამის სახლში წაიყვანეს, სადაც ქალმა თავი ჩამოიხრჩო.

ლ.ქ; ლამბალოს მკვიდრი:

- არ მესმის, რატომ ხმაურობს ხალხი, ქალი რომ ქმარს უღალატებს, უნდა დაისაჯოს; ჩვენი ხალხი მოღალატე ქალებს ყოველთვის ასე უკეთებს. ეს ჩვენთან არავის უკვირს.

- თქვენ არ ითვალისწინებთ, რომ დასჯის უფლება მხოლოდ კანონს აქვს...

- ჩვენი წესი ასეთია, ქალი ჩვენი იყო და მისი დასჯაც შეგვიძლია. თუ ქმარი არ უნდოდა, რატომ ცხოვრობდა მასთან 13 წელიწადი?! ეგ ამბობდა, ქმარი არ მიყვარსო, მაგრამ უყვარდა თუ არა, ქმარი ქმარია...

- როცა ჯეირანოვას სცემდნენ, თქვენც უყურებდით? ეს ხომ სისასტიკეა, - სუსტ ქალს კაცები ერთმანეთის თვალწინ სცემდნენ და არც ერთ მათგანს არ ეცოდებოდა...

- სცემდნენ, არ სცემდნენ, ეგ ერთია, მაგრამ ეგ ქალი არავის არ ერიდებოდა, ისე ღალატობდა ქმარს.

ნ. ხ; ლამბალოს მკვიდრი:

- ეგ გოგო 17 წლის რომ იყო, მაშინ გაათხოვეს მშობლებმა, ჩვენი წესის მიხედვით. ვინც მშობლებს უნდოდა, იმას გააყოლეს.

- ანუ ვის?

- მაგის ქმარი მწყემსია, მთაში ჰყავს ძროხები და ცხვარი. ცოლი რომ მოუკლეს, მაშინაც არ იყო სახლში.

- საქმიანობაზე არ გეკითხებით, რა თვისებების ადამიანია? მომხდარზე რას ამბობს?

- ლაპარაკი არ შეუძლია, არ ლაპარაკობს.

იხილეთ სრულად kvirispalitra.ge-ზე