ია ანთაძე - "მოქალაქის" ხედვა არის აბსოლუტურად უკუპროცესი იმისი, რაც იწვევს სამოქალაქო საზოგადოების განვითარებას

არასამთავრობო ორგანიზაცია ,,სამოქალაქო განვითარების ინსტიტუტის" ხელმძღვანელი, ჟურნალისტი ია ანთაძე ბიძინა ივანიშვილის მიერ დაფუძნებული ორგანიზაცის პროექტების შესახებ საკუთარ პოზიციაზე რჩება და ამბობს, რომ შენიშვნა იმ ხედვასთან დაკავშირებით აქვს, რითაც "მოქალაქე" სამოქალაქო საზოგადოების გაძლიერებას აპირებს.

როგორც ანთაძემ "ინტერპრესნიუსთან" საუბარში აღნიშნა, "მოქალაქის" მიერ მისი მისამართით გავრცელებულ განცხადებაში იმ საკითხებზე საუბარი არ არის, რაზეც შენიშვნები აქვს. "პირველ რიგში, დიდი მადლობა, რომ საჭიროდ ჩათვალეს, პასუხი გაეცათ ჩემს შენიშვნაზე. ეს საშუალებას მაძლევს, დავაზუსტო, რისი თქმა მინდოდა. განცხადებაში საუბარია იმაზე, რომ სამოქალაქო და სახელმწიფო სექტორის თანამშრომლობა კანონის დარღვევა არ არის, ანუ იურიდიული ასპექტი კანონიერია. ამასთან დაკავშირებით მე არც მქონია შენიშვნა - რა თქმა უნდა, ეს კანონიერია. "მოქალაქე" ასევე განმარტავს, რომ სამოქალაქო ჩართულობა სრულფასოვნად ვერ განხორციელდება, თუ ხელს არ შეუწყობენ სახელმწიფო სტრუქტურები, ანუ ცენტრალიზებულად ხედავს ყველანაირ პროცესს და მიიჩნევს, რომ პროექტი მხოლოდ ამ შემთხვევაში იქნება წარმატებული. ჩემი აზრით კი, სამოქალაქო საზოგადოების განვითარება ვერავითარ შემთხვევაში ვერ იქნება წარმატებული, თუ ის იქნება ცენტრალიზებული პროცესის ნაწილი. სამოქალაქო საზოგადოების განვითარება ნიშნავს ადამიანების რაც შეიძლება დიდ ჯგუფში მაღალი სააზროვნო უნარებისა და მაღალი სამოქალაქო პასუხისმგებლობის განვითარებას, ეს კი შეუძლებელია, მოხდეს ტესტებით და კონკურსებით. ეს უნდა მოხდეს ადგილებზე რაც შეიძლება მეტი ორგანიზაციის გაძლიერებით, რუდუნებითი შრომით, ეს არის ხანგრძლივი პროცესი. განსაკუთრებით არ მესმის, გამოცდების ეროვნულ ცენტრს (NAEჩ) რა კავშირი აქვს სტუდენტების თვითმმართველობასთან და როგორია მისი გამოცდილება იმ ტიპის პროექტთან დაკავშირებით, რის განხორციელებასაც აპირებს? რაც შეეხება "სამოქალაქო განათლების ოლიმპიადას", ის საშუალებას იძლევა, რომ ერთგვარი საინფორმაციო ბანკი გაკეთდეს იმის შესახებ, თუ სად გვყავს ნიჭიერი ბავშვები, თუმცა ამ მხრივაც მიმაჩნია, რომ ტესტი და კონკურსი არ არის საუკეთესო გზა. ერთი სიტყვით, ყველაზე მთავარი პრობლემა, რაც მე მაქვს, როგორც არასამთავრობო სექტორის წარმომადგენელს ამგვარ მენეჯმენტთან არის ის, რომ ცენტრალიზებულად სამოქალაქო საზოგადოების განვითარება არ ხდება. სამოქალაქო საზოგადოება არის რაც შეიძლება ბევრი თვითორგანიზებული ჯგუფი ადგილზე. სად არის აქ თვითორგანიზებული ჯგუფების მხარდაჭერა? ამას ვერ ვხედავ", - განაცხადა ია ანთაძემ.

მისი შეფასებით, ხედვა, რაც პროექტების განხორციელების მიზნით "მოქალაქეს" აქვს, უკუპროცესია იმისი, რაც სამოქალაქო საზოგადოების განვითარებას იწვევს.

"აქ ხედვაშია მთავარი პრობლემა - სამოქალაქო საზოგადოების განვითარება გვინდა, ამაში ფული არ გვენანება, მაგრამ მივიჩნევთ, რომ ეს უნდა გავაკეთოთ ცენტრალიზებულად. სინამდვილეში სამოქალაქო საზოგადოება ცენტრალიზებულად ვერ გაძლიერდება. თუ ჩვენ გვინდა სამოქალაქო საზოგადოების გაძლიერება, უნდა ვცადოთ, რომ რაც შეიძლება მეტი დეცენტრალიზება იყოს, რაც შეიძლება მეტი თვითორგანიზებული ჯგუფი ადგილებზე. "მოქალაქის" ხედვა არის აბსოლუტურად უკუპროცესი იმისი, რაც იწვევს სამოქალაქო საზოგადოების განვითარებას", - აღნიშნა ანთაძემ.

არასამთავრობო ორგანიზაცია "მოქალაქემ" დღეს განცხადება გაავრცელა და მათი პროექტის შესახებ ია ანთაძის მოსაზრებას"უპასუხისმგებლო" უწოდა. "ორგანიზაცია "მოქალაქე" საჭიროდ თვლის, პასუხი გასცეს ამ უპასუხისმგებლო განცხადებას. როგორც ჩანს, ქალბატონ ანთაძეს ბოლომდე არ ესმის ჩვენი ორგანიზაციის მიერ წამოწყებული პროექტების არსი. ამიტომაც, თავს ვალდებულად ვთვლით, განვმარტოთ: "სამოქალაქო განათლების ოლიმპიადა" და სტუდენტური კონკურსი - "სტუდენტები თვითმმართველობისთვის" ორგანიზაცია "მოქალაქის" პროექტებია. მათ აფინანსებს და მენეჯმენტს უწევს უშუალოდ ეს ორგანიზაცია. ამავე დროს, ბუნებრივია, რომ მსგავსი მასშტაბის პროექტების განხორციელებისათვის საჭიროა ამ სფეროში გამოცდილი სტრუქტურების ჩაბმა. შეფასებისა და გამოცდების ეროვნული ცენტრი არის ერთადერთი სტრუქტურა საქართველოში, რომელსაც აქვს ანალოგიური პროექტების განხორციელების გამოცდილება. არსებული კანონმდებლობით, შეფასებისა და გამოცდების ეროვნულ ცენტრს უფლება აქვს მიიღოს და შეასრულოს კერძო დაკვეთა. ამიტომ სრულიად ლოგიკურია, რომ ჩვენი პროექტების წარმატებით განსახორციელებლად მივმართეთ ცენტრს.

კიდევ ერთხელ გვინდა ხაზი გავუსვათ, რომ ამ შემთხვევაში სამოქალაქო და სახელმწიფო სექტორის თანამშრომლობის იურიდიული ასპექტი სავსებით კანონიერი და გამჭვირვალეა. პროექტების განხორციელებისათვის არამცთუ არ იხარჯება სახელმწიფო სახსრების არც ერთი თეთრი, არამედ პირიქით, სახელმწიფო ამ პროექტით სერიოზულ შემოსავალსაც კი მიიღებს. რაც შეეხება სამოქალაქო ჩართულობის ხელშემწყობ პროექტში სახელმწიფო სტრუქტურის მონაწილეობის მორალურ ასპექტს, მტკიცედ გვწამს, რომ სამოქალაქო ჩართულობა ვერ განხორციელდება სრულფასოვნად, თუ ამ პროცესს ხელს არ შეუწყობენ სახელმწიფო სტრუქტურები", - ნათქვამია "მოქალაქის" განცხადებაში.

რაც შეეხება პროექტებს, მათი პრეზენტაცია ორგანიზიცია "მოქალაქემ" ორი დღის წინ გამართა. პროექტების განხორციელებაში გამოცდების ეროვნული ცენტრია ჩართული.

"ინტერპრესნიუსი"