"ისლამური სახელმწიფოს" "ბოევიკებმა" ბრიტანელი მძევლის თავის მოკვეთის ვიდეო გაავრცელეს

ინტერნეტში კიდევ ერთი ვიდეო გავრცელდა, სადაც ასახულია როგორ კვეთენ თავს "ისლამური სახელმწიფოს" "ბოევიკები" ბრიტანელ მძევალს, ალან ჰენინგს. "ბიბისის" ინფორმაციით, 47 წლის ტაქსის მძღოლი ალან ჰენინგი სირიაში დეკემბერში აიყვანეს მძევლად, როდესაც ჰუმანიტარული დახმარება გადაჰქონდა. დიდი ბრიტანეთის პრემიერ-მინისტრის დევიდ ქემერონის განცხადებით, ალან ჰენინგი სირიაში ყველა სარწმუნოების ხალხის დასახმარებლად იყო ჩასული და მისი მკვლელობის ფაქტი კიდევ ერთხელ ადასტურებს, თუ რაოდენ ბარბაროსულია "ისლამური სახელმწიფო".

ბრიტანელი მძევლის თავის მოკვეთა დაგმო აშშ-ის პრეზიდენტმა ბარაკ ობამამაც. მისი განცხადებით, აშშ-ი მკაცრად გმობს ბრიტანეთის მოქალაქის სასტიკ მკვლელობას. "ჩვენს ბრიტანელ მეგობრებთან და მოკავშირეებთან ერთად ყველაფერს ვიღონებთ ალანის, ისევე როგორც ჯიმ ფოლის, სტივენ სოტლოფისა და დევიდ ჰეინსის მკვლელთა გასასამართლებლად. ჩვენს მოკავშირეებთან და პარტნიორებთან ერთად, ჩვენ გავაგრძელებთან გადამწყვეტ ქმედებებს "ისლამური სახელმწიფოს" საბოლოო განადგურებისთვის", - განაცხადა ბარაკ ობამამ.

ალან ჰენინგი "ისლამური სახელმწიფოს" "ბოევიკების" მეოთხე მძევალი იყო, რომელსაც თავი მოკვეთეს. ინტერნეტში გუშინ გავრცელებულ ვიდეოში "ისლამური სახელმწიფოს" "ბოევიკები" კიდევ ერთი, როგორც თავად აცხადებენ, ამერიკელი მძევლის თავის მოკვეთით იმუქრებიან. როგორც ვიდეოში ამბობენ, ეს ამერიკელი პიტერ კასიგია.