სააკაშვილი ამერიკაში ცხოვრებასა და მომავლის გეგმებზე - ექსკლუზიური ინტერვიუ "ნიუ-იორკ თაიმსთან"

ამერიკული გამოცემა "ნიუ-იორკ თაიმსი" საქართველოს ყოფილ პრეზიდენტ მიხეილ სააკაშვილთან ინტერვიუს აქვეყნებს.

გამოცემის ინფორმაციით, საქართველოს ექსპრეზიდენტი მემუარებს წერს, კითხულობს კარგად ანაზღაურებად ლექციებს, მონაწილეობს ვაშინგტონში სამეცნიერო-კვლევითი ინსტიტუტის დაფუძნებაში და ხვდება თავის ძველ ნაცნობებს, ისეთებს, როგორებიც არიან სენატორი ჯონ მაკკეინი და აშშ-ის სახელმწიფო მდივნის თანაშემწე ვიქტორია ნულანდი.

"ნიუ-იორკ თაიმსის" ინფორმაციით, ამჟამად მიხეილ სააკაშვილი ბიძის სახლში ცხოვრობს, რომელიც ნიუ იორკში, უილიამსბურგში მდებარეობს.

***

უილიამსბურგში საჭმლის ბაზრობაზე მიხეილ სააკაშვილი მწვანე ბოტასებში რიგში დგას ტატუიან მამაკაცებთან და გამჭირვალე სამოსიან ქალებთან ერთად. ხალხი რიგში ყველის ფუნთუშებს და დონატებს ელოდება, სააკაშვილი ქოქოსის წვენს იღებს.

"ჩემმა მეგობარმა, ერთ-ერთმა ყველაზე გავლენიანმა არაბმა შეიხმა საქართველოს 20 000 პალმის ხე აჩუქა", - ამბობს სააკაშვილი და რამდენიმე ყლუპით ამთავრებს წვენს. ის განმარტოებულია, მეშვიდე ქუჩაზე, გეგმავს ტრიუმფით დაბრუნებას, იმის მიუხედავად, რომ მისი დიდება დაცემით დასრულდა. ეს ამერიკელებისთვის, რომლებიც მიიჩნევდნენ, რომ სააკაშვილი ყოფილ საბჭოთა ქვეყნებში დემოკრატიის გამავრცელებელი იქნებოდა, გაკვეთილი უნდა იყოს.

"უილიამსბურგი დემოკრატიული ტრანსფორმაციის ნაწილია. თუ ადრე აქ მაფია იყო, ახლა "ჯაზური ატმოსფეროა", აქაურობა ენერგიითა და ახალი მშენებლობებით არის სავსე", - ციტირებს გამოცემა მიხეილ სააკაშვილის სიტყვებს.

როდესაც კაფეებში არ დადის, ველოსიპედით არ სეირნობს და საღამოს მეგობრებთან სასტუმრო "უაიტში" არ ატარებს, სააკაშვილი უკრაინის კონფლიქტს ეჭიდება და ვლადიმირ პუტინთან დაპირისპირებას იხსენებს - "ეს პუტინის დასასრულია. მან თავად გაიბა თავი მახეში".

სააკაშვილი აგრეთვე ყვება, რომ როდესაც ბრუკლინში "ნორმალური ცხოვრებით" ცხოვრობდა, თავს მნიშვნელოვან პიროვნებად თვლიდა აღმოსავლეთ ევროპაში, რადგან ალბანეთში მოგზაურობისას მის გამო გზა გადაკეტეს და 20 ესკორტი გამოუყვეს. ის ახლა საკუთარი ტურისტული ვიზის სამუშაო ვიზაში გადაცვლის პროცესშია, მანამდე კი ბარებსა და კაფეებში გაჰყავს დრო.

სააკაშვილი უილიამსბურგის მაღალ ფასებზე ჩივის, როგორც თავად ამბობს, ის ღარიბი არაა, მაგრამ ფასები ძალიან "იკბინება". გასულ კვირას მაღაზიაში რეტრო წიგნები შეიძინა. "50 ცალი ვიყიდე და უკან, ჩემ საპრეზიდენტო ბიბლიოთეკაში გავაგზავნე. იმ მაღაზიაში, სადაც ვიყავი, ხუთი თვით ადრე ლეონარდო დიკაპრიო ყოფილა. ცოტა ხნის მერე მანჰეტენზე ქართველი ქალი შემხვდა, მომიახლოვდა და მკითხა: "თქვენ მიხეილ სააკაშვილი ხართ?" ამ დროს თავი დიკაპრიოდ ვიგრძენი", - ამბობს კმაყოფილი სააკაშვილი.

ყოფილი პრეზიდენტი ძირითადად მანჰეტენზე ქართულ რესტორნებს სტუმრობს. ყველაზე ხშირად "პეპელასა" და "ოდა ჰაუსში" დადის. ამ უკანასკნელის მეპატრონეს ის მოწონს, მიმტანს - არა. იქ სააკაშვილი 2004 წლის მშრალ ქართულ ღვინოს უკვეთავს და ... ცოტა ხნის წინ ბილ კლინტონთან ერთადაც ისადილა.

ამჟამად მისი მეუღლე სანდრა რულოვსი თბილისში იმყოფება უმცროს ვაჟთან ერთად. უფროსი ვაჟი, რომელმაც ერთხელ "აიპადზე" სწრაფად ბეჭდვაში მსოფლიო რეკორდი დაამყარა, პენსილვანიაში, სვართმორის კოლეჯში სწავლობს. აგვისტოში საქართველოს გენერალურმა პროკურატურამ სააკაშვილს ბრალი წაუყენა საბიუჯეტო თანხების ფლანგვაში, მათ შორის იყო პერსონალური სტილისტის სასტუმროს ხარჯების ანაზღაურება, ბოტოქსის ხარჯები, იტალიაში იახტის დაქირავება და ლონდონელი მხატვრის, მერედიტ ოსტრომის ნამუშევრების შეძენა. თუ სააკაშვილს ბრალი დაუმტკიცდება, მას 11 წლით თავისუფლების აღკვეთა ელოდება.

ბატონ სააკაშვილს ასევე ბრალი წაუყენეს საბიუჯეტო ხარჯების გამოყენებაში მასაჟისტის, დოროთი შტეინის საქართველოში ვიზიტისას 2009 წელს. თავად სააკაშვილი ამბობს, რომ დოროთი შტეინის მასაჟით მხოლოდ ერთხელ ისარგებლა, თუმცა ქალბატონი შტეინი აცხადებს, რომ ორი ათასი ევრო მიიღო, მათ შორის "კბენითი მასაჟის" სეანსებისთვის.

გამოცემა ციტირებს დოროთი შტეინის კომენტარს, რომელიც აცხადებს, რომ უამრავი საჩუქარი მიიღო მიხეილ სააკაშვილისგან - "მითხრა, რომ მისი ცოლი არ იყო წინააღმდეგი. ასევე მაჩუქა ოქროს ყელსაბამი რელიგიური გულსაკიდით, თუმცა ჩემი ღმერთი ფრენკ ზაპაა და ამ ყელსაბამის ტარებას არ ვაპირებ".

თავად მიხეილ სააკაშვილი აღნიშნავს, რომ მისთვის წაყენებული ბრალდებები არაფერს ამტკიცებს გარდა იმისა, რომ მასზე პოლიტიკური დევნა ხორციელდება.