ირაკლი ღარიბაშვილი - ძალიან სამწუხაროა, რომ გაერო-ში გამგზავრება ამდენი სპეკულაციის საგანი გახდა

ძალიან სამწუხაროა, რომ ისეთი მარტივი საკითხი, როგორიც არის გაერო-ში გამგზავრება და ქვეყნის წარმოჩინება, ამდენი სპეკულაციის საგანი გახდა , - ამის შესახებ პრემიერ-მინისტრმა ირაკლი ღარიბაშვილმა ჟურნალისტებთან საუბრისას განაცხადა.

ირაკლი ღარიბაშვილი ყოფილი პრემიერ-მინისტრის, ბიძინა ივანიშვილის განცხადებებს გამოეხმაურა და აღნიშნა, რომ მისთვის ასევე მიუღებელია სპეკულაცია, რომელიც გაერო-ში გამგზავრებასთან დაკავშირებით გაჩნდა. ღარიბაშვილის თქმით, ვინაიდან არის აღმასრულებელი ხელისუფლების მეთაური, მთავრობამ საჭიროდ ჩათვალა, რომ ქვეყნის სახელით წარდგეს პრემიერ-მინისტრი.

"ჩემთვის ძალიან მნიშვნელოვანია ბიძინა ივანიშვილის შეფასება მისი თითოეული სიტყვა. ძალიან სამწუხაროა, რომ ასე ვთქვათ ასეთ მარტივ საკითხზე, როგორიც არის გაეროში გამგზავრება და ქვეყნის წარმოჩინება გახდა ამდენი სპეკულაციის საგანი. მე ვკითხე პრეზიდენტ ალიევს მიემგზავრებოდა თუ არა იგი გაეროში. მან მითხრა, რომ ამის საჭიროებას ვერ ხედავს და აგზავნის მხოლოდ საგარეო საქმეთა მინისტრს. ჩემი გაეროში წასვლის აუცილებლობა გაჩნდა იმიტომ, რომ თვეების განმავლობაში მქონდა სამზადისი გაეროში ვიზიტთან დაკავშირებით, მქონდა მოლაპარაკებები და ვარ გაეროში ქართული დელეგაციის ხელმძღვანელი. მე მოვისმინე დამაბნეველი განცხადებები სხვადასხვა პიროვნებებისგან, თითქოს გაეროს ასამბლეა არის მხოლოდ სახელმწიფოს მეთაურების შეკრების ადგილი, რაც აბსოლუტური ტყუილია. მოსაწვევში წერია, რომ ეს არის ან სახელმწიფოს, ან მთავრობის მეთაურების შეკრების ადგილი, იმის მიხედვით, როგორ არის მოწყობილი ესა თუ ის სახელმწიფო. დღეს მე ვფიქრობ მხოლოდ საქმეებზე, იმ გაჭირვებასა და პრობლემებზე, რომელიც წლების განმავლობაში დაგროვდა. ჩვენი მოსახლეობა დღეს უმძიმეს მდგომარეობაშია, ვინაიდან ჩვენი მთავარი გამოწვევა დღეს სიღარიბის დაძლევა და ეკონომიკური განვითარება", – აღნიშნა ირაკლი ღარიბაშვილმა.

ღარიბაშვილმა დღესვე კომენტარი გააკეთა პრემიებთან დაკავშირებით ბიძინა ივანიშვილის კრიტიკაზე და განაცხადა, რომ მაღალი პრემიების გაცემა მთავრობის რეალური შეცდომა იყო.

"ეს იყო ერთ-ერთი მთავარი შეცდომა ჩვენი მთავრობის და მეორე მხრივ, სასიხარულოა, რომ რამე სხვა შეცდომა ამ ორი წლის განმავლობაში არ გვაქვს. ეს პრობლემა არსებობდა წლების განმავლობაში და ინერციით გაგრძელდა. ვაღიარებ ამ შეცდომას და ამაზე არაერთხელ მითქვამს კიდეც საჯაროდ. ჩვენ ეს გამოვასწორეთ, მოვაწესრიგეთ, პრემიების გაცემის სისტემა ჩამოვაყალიბეთ და მე დიდი იმედი მაქვს, რომ აღარ განმეორდება მსგავსი ინციდენტი", – განმარტა პრემიერმა.

"ინტერპრესნიუსი"