6
ივნისიდღის ზოგადი ასტროლოგიური პროგნოზი
დიდ დიღომში, პეტრიწის ქუჩაზე წუხელ გვიან ღამით ინციდენტი მოხდა. დაუდგენელმა პირებმა კორპუსის ეზოში მდგარ ავტომანქანას სამი საბურავი მოხსნეს. ამის შესახებ ავტომანქანის მფლობელმა თავად გაავრცელა ინფორმაცია სოციალური ქსელის მეშვეობით. Ambebi.ge მომხდართან დაკავშირებით გურამ ვარშანიძეს დაუკავშირდა:
"წუხელ ღამის პირველ საათზე მოვედი სახლში და მანქანა ჩემი კორპუსის ეზოში დავაყენე. დილას უკვე მომხდარი იყო ეს ინციდენტი, სამი საბურავი მოხსნეს და ერთი რატომღაც დატოვეს, ალბათ გული რომ არ დამწყვეტოდა. გამოვიძახე პატრული, კრიმინალური ექსპერტები და კინოლოგებიც იყვნენ და ოქმი შეადგინეს. დიდი იმედი არ მაქვს, რომ კვალზე გავლენ, მაგრამ მე ჩემი მოქალაქეობრივი ვალი მოვიხადე და დიდი დიღმის განყოფილებაში ჩვენებაც დავწერე. ისიც კი მკითხეს, ვინმესთან ბოლო დროს კონფლიქტი ხომ არ მოგსვლია, ვისზეც შეიძლება ეჭვი გქონდესო. მსგავსი რამ არ მომხდარა, მშვიდად ვცხოვრობ.
ფაქტია, რომ ბოლო დროს კრიმინალურმა შემთხვევებმა საგრძნობლად მოიმატა. სხვებისგანაც გამიგია ასეთი ინციდენტის შესახებ. თუმცა, ვითვალისწინებ ბატონ ბიძინას რჩევას და გაგებით ვეკიდები ამ ყველაფერს"- განუცხადა Ambebi.ge-ს გურამ ვარშანიძემ.
შსს-ს ოფიციალური ინფორმაციით, ფაქტზე უკვე აღძრულია საქმე და გამოძიება სისხლის სამართლის კოდექსის 177-ე მუხლით მიმდინარეობს, რაც ქურდობას გულისხმობს.
სალომე შიხაშვილი, Ambebi.ge
