რით ემუქრება მამულიჩა ნუცა ბუზალაძის თაყვანისმცემლებს

ნუცა ბუზალაძე ''ახალი ტალღის'' გამარჯვებულია. მას და მის პროდიუსერ კახა მამულაშვილს , იმავე მამულიჩას , თბილისში დაბრუნებიდან მეორე დღეს შევხვდით, როცა ''დღის შოუს'' სტუმრობდნენ. ძალიან გადაღლილები იყვნენ, მაგრამ ვრცლად საუბარი არ დაიზარეს. მათგან შევიტყვეთ, რომ ნუცას პრიზი, 50 000 ევრო, მთლიანად არ გადაეცა, ნაწილი, კერძოდ, 12 000 ევრო, ლატვიის სახელმწიფომ გადასახადის სახით დაიტოვა...

- როგორ აფასებთ ზოგადად ამ ფესტივალს. იყო ლაპარაკი, უნდა წასულიყო თუ არა ქართველი კონკურსანტი.

კახა:

- ჩვენ ხომ 2008 წელსაც ვიყავით ''ახალ ტალღაზე''. მაშინაც ასე გადავწყვიტეთ, ახლაც ნუცასთან ერთად გადავწყვიტეთ. ძალიან დიდი ბოდიში, მაგრამ უკრაინელები ჩავიდნენ და იმღერეს, რაც, ალბათ, უფრო გასაკვირი უნდა ყოფილიყო, ვიდრე ნუცას ჩასვლა იურმალაში. სადაც საშუალება გვექნება, რომ ჩავიდეთ და ქართული დროშა ავაფრიალოთ, გარდა ოკუპირებული ტერიტორიებისა, ამას აუცილებლად გავაკეთებთ. რასაკვირველია, გემოვნებაზეც დავობენ და ჟიურის წევრებს ''ნაფტალინებს'' უწოდებენ, მაგრამ ისინი უზარმაზარ ქვეყანაში არიან წარმატებულები, უყვარს რუსულ აუდიტორიას და არ ადარდებთ, ვინ რას ლაპარაკობს მათზე. რისი თქმა გინდათ, რომ არ უნდა გამოგვეყენებინა აუდიტორია, რომელიც ''ახალ ტალღას'' უყურებს? ნუცა საქართველოს სიყვარულით გადიოდა სცენაზე და მღეროდა. მგონია, რომ მისი გამარჯვება ყველას გაუხარდა. ჩვენ ნამდვილად გვეკუთვნოდა პირველი ადგილი.

ჟიურის ქულებზე არ ვდავობ. ფილიპ კირკოროვი ბოლოს იძულებული გავხადეთ და არანაირი შანსი არ დავუტოვეთ, რომ 11 ქულა არ აეწია. კირკოროვი უკვე თავის იმიჯზეც ფიქრობდა. რუსული არხები, პირველ რიგში, ლაპარაკობდნენ იმაზე, რომ ის პეტრიკის პროდიუსერი იყო.

- ვიცი, რომ ჯესი ჯეის სიმღერა ''კბილებით გაიტანეთ''.

- დიახ, ასე იყო. ნუცამ მთხოვა, პირველ ტურში ამ სიმღერის შესრულება ძალიან უნდოდა. რომ გავაგზავნეთ, პასუხი მოგვივიდა, სხვა სიმღერები გამოგვიგზავნეთო. შევარჩიე მაქსიმალურად უცნობი და ცუდი სიმღერები და ისინი გადავუგზავნე (იცინის). მოგვწერეს, ჯესი ჯეი იყოსო...

ლელა სპეციალურად ადრე ჩამოვიყვანეთ, რომ რევზინისთვის ''მიეხედა''. მაგრამ მას ძალიან დიდი მადლობა, რადგან ნუცა ჩამოაყალიბა. მნიშვნელოვანია, რომ ნუცა ყველაფერს იწერდა, რასაც რევზინი ეუბნებოდა. ბოლოს, მაინც არ მოეწონა ჯესი ჯეის სიმღერა, პირველად რეპეტიციაზე რომ შეასრულა, რევზინმა თავი გააქნია, არაო. მერე ხმის რეჟისორმა შესთავაზა პირველი ვერსიის 30 წამით შემოკლება და ყველაფერი გემრიელად გამოვიდა. მესამე ტურში ნათლად გამოჩნდა, როგორ უყურებდა კირკოროვი აგუტინს, თუკი ის 10-იანს ასწევდა, თავადაც ათიანს დაწერდა და პეტრიკი ნუცას გაუთანაბრდებოდა.

ვფიქრობ, ხალხი, რომელიც დარბაზში იჯდა, აღარ მისცემდა საშუალებას არავის, რომ ბოლო ტურზე ნუცასთვის ათიანები დაეწერათ. ჩასვლისთანავე მქონდა შეხვედრები ალსუს პროდიუსერთან, სოსო პავლიაშვილთან, სხვა მნიშვნელოვან ადამიანებთან. მათ კონკურსის დაწყებამდე ჰქონდათ ინფორმაცია, როგორი მონაწილე გვყავდა ჩაყვანილი. ყველანაირად ვეცადეთ, რომ ნუცას თავი კომფორტულად ეგრძნო და რაიმე პრობლემაზე არ ეფიქრა.

ნუცა:

- ჩემი პროდიუსერი ძალიან მიწყობდა ხელს. მამულიჩამ ძალიან კარგად იცის ჩემი ხასიათი. სხვათა შორის, რთული ხასიათი მაქვს (იღიმის). ისე მიწყობდა ხელს, რომ სულ კარგ ხასიათზე ვყოფილიყავი. ყველას ჩვენ-ჩვენი პლუსები და მინუსები გვაქვს, მაგრამ იურმალაში ყოფნისას კომფორტში ვიყავი. თუმცა მაინც ვნერვიულობდი, განსაკუთრებით, პირველ დღეს, არ ვიცოდი, რა ქულებს დამიწერდნენ. პირველი ტურის შემდეგ ყველა მილოცავდა, შენ იქნები გამარჯვებულიო, ყველას მოვეწონე. მას მერე მე აღარ ვნერვიულობდი და ესენი განიცდიდნენ.

იხილეთ გაგრძელება