სოფელ ფლავისმანში რამდენიმე ათეული საცხოვრებელი სახლი იტბორება

გორის რაიონის სოფელ ფლავისმანში რამდენიმე ათეული საცხოვრებელი სახლი იტბორება. ადგილობრივი მოსახლეობა, დატბორვის მიზეზად ორი თვის წინ, სოფლის განაპირას მდებარე სარწყავი არხის გაწმენდისას დაშვებულ შეცდომას მიიჩნევს. მათი განცხადებით, დატბორილია 40-მდე საცხოვრებელი სახლი. მამისბედაშვილების სარდაფში კი, წყალმა მიწიდან ქვევრები ამოყარა.

წუხელ, გვიან ღამით, ფლავისმანში, შიდა ქართლის გუბერნატორი და მუნიციპალიტეტის გამგებელი ჩავიდნენ, რის შემდეგაც, სოფლის მეურნეობის სამინისტროში შექმნილი სპეციალური კომისიის წევრების და გეოლოგების ჩასვლაც გადაწყდა. მდგომარეობის გასაცნობად, ფლავისმანში, სოფლის მეურნეობის მინისტრის მოადგილე და მელიორაციის დეპარტამენტის თავმჯდომარეც იმყოფებოდნენ. სპეციალისტებმა სოფელი შუაღამით დატოვეს.

"ინტერპრესნიუსი"