ვრცელდება ინფორმაცია, რომ ჯიჰადის ლიდერი თარხან ბათირაშვილი მოკლეს

ინტერნეტსაიტები ავრცელებენ ინფორმაციას, რომ ერაყში, ქურთისტანის ტერიტორიაზე შეტაკებისას მოკლულია სირიაში მებრძოლი რადიკალი ისლამისტების მეთაური ომარ ალ შიშანი, იგივე თარნახ ბათირაშვილი. კახეთის საინფორმაციო ცენტრი გავრცელებული ინფორმაციის გადამოწმებას თარხან ბათირაშვილის ოჯახის წევრებთან ცდილობს.

28 წლის ომარ ალ შიშანის სახელი უკვე რამდენიმე თვეა სირიის სამხედრო ანგარიშებში ვრცელდება. BBC-ის ინფორმაციით, "წითური გენერლის" ფსევდონიმით ცნობილი შიშანი დიდი ხანი არაა, რაც "ერაყისა და ლევანტის ისლამური სახელმწიფოს" ჩრდილოეთ სექტორის, ერაყსა და სირიაში მებრძოლი რადიკალი ისლამისტების მეთაურია.

სირიაში გამგზავრებამდე თარხან ბათირაშვილი პანკისის ხეობის სოფელ ბირკიანში ცხოვრობდა და საქართველოს ჯარში მსახურობდა.

2008 წელს, აგვისტოს ომის დროს ბათირაშვილი ფრონტის ხაზზე იყო, რუსეთის ტანკებს თვალყურს ადევნებდა და მათ კოორდინატებს ქართულ საარტილერიო ნაწილებს გადასცემდა.

Wall Street Journal წერდა, რომ აგვისტოს ომიდან ორი წლის შემდეგ ბათირაშვილის ცხოვრება უარესობისკენ შეიცვალა. მას 2010 წელს ტუბერკულოზი დაუდგინეს და სამხედრო საავადმყოფოში რამდენიმე თვე გაატარა. თავდაცვის სამინისტროს ცნობით, როდესაც გამოჯანმრთელდა, ის სამხედრო სამსახურისთვის შეუფერებლად მიიჩნიეს და სამსახურიდან გაათავისუფლეს.

იხილეთ ვრცლად

კახეთის საინფორმაციო ცენტრი