ირაკლი ღარიბაშვილი - ვერც ერთ ქვეყანასთან ურთიერთობას ვერ გადაწონის ექსპრეზიდენტი, რომელსაც მძიმე დანაშაულებში ედება ბრალი და ყველაფერი ჯერ წინ არის

განცხადებები იმის თაობაზე, რომ სახელმწიფომ არ უნდა გამოიძიოს უმაღლესი თანამდებობის პირების მიერ წარსულში ჩადენილი შესაძლო დანაშაულები, პირდაპირ ეწინააღმდეგება მთავარ დემოკრატიულ პრინციპებს და ღირებულებებს, - ასე ეხმაურება პრემიერ-მინისტრი ირაკლი ღარიბაშვილი ექსპრეზიდენტ მიხეილ სააკაშვილისთვის სამართლოს მიერ პატიმრობის შეფარდებას.

პრემიერ-მინისტრი დარწმუნებულია, რომ ეს საქართველოს დასავლეთ სახელმწიფოებთან ურთიერთობებზე უარყოფითად არ აისახება და ქვეყნის ევროპასთან იტეგრაციის პროცესს ხელს არ შეუშლის.

"საჭიროა, ყველანი გამოძიების საბოლოო შედეგებს დაველოდოთ და სასამართლომ მიიღოს გადაწყვეტილება. სასამართლო დაადგენს ამა თუ იმ პირის დანაშაულეს. ჩვენ, ჩვენის მხრივ, მაქსიმალურად უზრუნველვყოფთ პროცესის გამჭვირვალობას. ჩვენ ქვეყანაში რეალური დემოკრატიის მშენებლობა დავიწყეთ, ვართ სუვერენული სახელმწიფო, გვსურს ისეთი სახელმწიფოს მშენებლობა, როგორიც არის თანამედროვე, განვითარებული ევროპული სახელმწიფოები. თუ ვაცხადებთ, რომ გვსურს თანამედროვე ევროპული ინსტუტების მშენებლობა, სადაც კანონის წინაშე ყველა თანაბარია, კანონის უზენაესობის პრინციპები იქნება დაცული, მაშინ არავინ უნდა იდგეს კანონზე მაღლა. ეს არის ჩვენი მთავარი ამოცანა, დაუსჯელობა ერთხელ და სამუდამოდ დავასრულოთ ქვეყანაში. ეს არის გაერო-ს ადამიანის უფლებათა კომიტეტის მთავარი მოწოდება, რომ საქართველოში დასრულდეს დაუსჯელობა და ყველა კანონის წინაშე იყოს თანასწორი. სპეკულაციები იმის თაობაზე, რომ ყოფილი პრეიზდენტი უფრო მნიშვნელოვანია, ვიდრე სახელმწიფო, არის აბსურდი. ჩვენ ვართ დემოკრატიული სახელმწიფო და ვაშენებთ რეალურ დემოკრატიას, ვერც ერთ ქვეყანასთან ჩვენს ურთიერთობას ვერ გადაწონის ყოფილი პრეზიდენტი, რომელსაც ძალიან მძიმე დანაშაულებში ედება ბრალი და ყველაფერი ჯერჯერობით წინ არის", - განაცხადა ჟურნალისტებთან საუბრისას ირაკლი ღარიბაშვილმა.

"ინტერპრესნიუსი"