კამერონ დიასი თხოვდება

იმის მიუხედავად, რომ 41 წლის მსახიობი კამერონ დიასი და 35 წლის გიტარისტი (ჯგუფი Good Charlote) ბენჯი მედენი მხოლოდ სამი თვეა, რაც ერთმანეთს ხვდებიან, მათი ურთიერთობა ახალ ეტაპზე გადავიდა. როგორც ამერიკული ჟურნალი People იტყობინება, წყვილმა დაქორწინება გადაწყვიტა.

”შეიძლება ვინმეს მოეჩვენოს, რომ ურთიერთობის ოფიციალურად გაფორმებისთვის ძალიან ცოტა დროა გასული, მაგრამ, კამერონი და ბენჯი ასე არ თვლიან. ისინი მზად არიან შესაუღლებლად, - განუცხადა ჟურნალს წყვილის ახლო მეგობარმა, - მედენი საკმაოდ ხშირად რჩება კამერონის სახლში, თითქმის მასთან ცხოვრობს. კამერონი ძალიან ბედნიერია. სიმართლე რომ გითხრათ, ასეთი ბედნიერი დიდი ხანია არ ყოფილა”.

წინა კვირას შეყვარებულებმა სამსართულიანი იახტა იქირავეს, რომელიც 633 ათასი დოლარი ღირდა და გაემგზავრნენ საფრანგეთის სანაპიროსა და იტალიაში სამოგზაუროდ. ივლისის დასაწყისში წყვილი ფლორიდაში, დიასის ნათესავების მოსანახულებლად ჩავიდა. ”თავიდან ორლანდოში ჩაფრინდნენ, შემდეგ კი კამერონის ოჯახთან გაეშურნენ სტუმრად კუნძულ ანა მარიაზე. დრო ძალიან კარგად გაატარეს”, – შეატყობინა "E! ნიუსს" წყვილის ახლო მეგობარმა.

გიტარისტამდე კამერონ დიასი ბეისბოლისტ ალექს როდრიგესს ხვდებოდა (წყვილი ერთმანეთს 2011 წელს დაშორდა). მისი პარტნიორები აგრეთვე იყვნენ ჯასტინ ტიმბერლეიკი და ჯარედ ლეტო. ბენჯი მედენი მანამდე რომანტიკულ კავშირში იმყოფებოდა პერის ჰილტონთან.