"რუსულმა ბომონდმა ძალიან თბილად მიმიღო" - ქართველი დიზაინერი, რომელიც კოსტუმებს დიმა ბილანისთვის ქმნის

ქეთა თოფურია, ბესარიონი, სოსო პავლიაშვილი, ირაკლი ფირცხალავა, ნანა გელოვანი, ეს იმ ქართველების მცირე ჩამონათვალია, ვინც რუსულ შოუ-ბიზნესში წარმატებით მოღვაწეობს. რუსულ ბომონდში თავის დამკვიდრების შანსი კიდევ ერთ ქართველს, პროფესიით დიზაინერს გიორგი ხაჭაპურიძეს მიეცა. მის მიერ შექმნილი ესკიზებით დიმა ბილანის იმიჯმეიკერები დაინტერესდნენ.

- პროფესიით დიზაინერი ვარ, თავდაპირველად თოიძის სასწავლებელი დავამთავრე, ვსწავლობდი სამსახტვრო აკადემიაში, გარკვეული პერიოდი საკუთარი პროფესიით ვიმუშავე საქართველოში, მაგრამ თუ ბევრი ფული არ ჩაყარე საკუთარ პიარში, ისე საქართველოში არაფრის გაკეთებას არ აქვს აზრი. ჩემს სფეროში ბევრი ფულის დახარჯვაც არ მიმაჩნია სწორად, რადგან ჩვენს ქვეყანაში არ ცხოვრობს მდიდარი სოციალური ფენა. დიდი პერსპექტივა დიზაინერს საქართველოში ნამდვილად არ აქვს. ამიტომაც გადავწყვიტე გეგმების შეცვლა, ვიფიქრე ცოტა ხნით მოსკოვში ჩავალ და ჩემს მეგობრებს ვინახულებ-მეთქი, ისინი რუსული შოუ-ბიზნესის წარმომადგენლებთან მუშაობენ, ზოგი მენეჯერია, ზოგი იმიჯმეიკერი, ზოგი პიარ-მენეჯერი. მათი მეშვეობით მოხვდა ჩემი ესკიზები დიმა ბილანის იმიჯმეიკერთან.

- უკვე შედგა თქვენს შორის მოლაპარაკება?

- ჩვენ უკვე შევხვდით. რადგან ქართველი ვარ, მათ მოსკოვში მდებარე ერთ-ერთ ოჯახურ, ქართულ რესტორანში დამინიშნეს შეხვედრა. ძალიან თბილად მიმიღეს, ეგონათ, ჩემს ქვეყანაში წარმატებული დიზაინერი ვიყავი, გაუკვირდათ, რომ საქართველოში ბევრმა არც იცის ჩემს შესახებ. ჩემს მიერ შექმნილი ესკიზებიდან სამი კოსტიუმი შეარჩიეს, რომელიც ტყავისგან და თექისგან არის შექმნილი. არაორდინალური და თითქოს დახეული სტილის სამოსია. მითხრეს გვგგონია სპეციალურად დიმასთვის შექმენი ეს ესკიზები, ეს ზუსტად მისი სტილიაო. ახლა დიმა ახალ კლიპს იღებს, სადაც სწორედ ჩემს მიერ შექმნილ კოსტიუმებს ჩაიცმევს. მოგვიანებით კი გრანდიოზული პროექტისთვის ემზადება. ისე გამეხარდა, არც ვიცოდი რა მეთქვა მათთვის. ვერც ვიფიქრებდი ასე მალე თუ მიმიღებდა რუსული ბომონდი და კარგად აეწყობოდა ჩემი კარიერა.

- რა თანხას გიხდის დიმა ბილანი თანამშრომლობაში?

- მათ მკითხეს რამდენია უნდა გადაგიხადოთ ამ კოსტიუმების შექმნაშიო, საერთოდ არ მინდოდა თანხის აღება, რადგან ვიცი, რომ ჩემთვის ეს წარმატების მომტანი იქნება. რუსულ შოუ-ბიზნესს თავისი წესები აქვს, უფასოდ არაფერს გაკეთებინებენ, ამიტომ მითხრეს, სამ კოსტიუმში 15 000 დოლარს გადაგიხდითო. უკვე დავიწყე მუშაობა, მალე პირადად დიმასაც შეხვდები. თქვენ წარმოიდგინეთ არცერთი დეტალის შეცვლა არ უთხოვიათ იმიჯმეიკერებს ჩემს ესკიზებში.

- ქართველი, რომ ხარ ეს დაბრკოლებებს არ გიქმნის რუსულ შოუ-ბიზნესში თავის დასამკვიდრებლად?

- როცა მოსკოვში მოვდიოდი შიში მქონდა, ვფიქრობდი ქართველი ვარ, ჩვენს ქვეყნებს შორის დაძაბულობაა და მე შესაძლოა არც მიმიღოს აქაურმა საზოგადოებამ-თქო, მაგრამ პირიქით მოხდა ყველაფერი. მართლა ძალიან უყვართ საქართველო, აღნიშნავენ, რომ ნიჭიერი ერი ვართ და ამის დასტურია ის არაერთი წარმატებული ქართველი, რომელიც რუსულ შოუ-ბიზნესში მოღვაწეობსო. ქუჩაში როგორ შემხვდებიან არ ვიცი ჩემი წარმომავლობის გამო, მაგრამ ბომონდის წევრებმა კარგად მიმიღეს.

თამარ ბოჭორიშვილი