ლაშა ტუღუში - თუ მიგაჩნია, რომ შენს წინაშე 50 ქურდი ზის, რომელსაც დეპუტატის მანდატი აქვს, საერთოდ რას ელაპარაკები

თუ მიგაჩნია, რომ შენს წინაშე 50 ქურდი ზის, რომელსაც დეპუტატის მანდატი აქვს, საერთოდ რას ელაპარაკები, – ამის შესახებ "ლიბერალური აკადემია-თბილისის" დირექტორმა , "რეზონანსის" მთავარმა რედაქტორმა ლაშა ტუღუშმა დღეს გამართულ პრესკონფერენციაზე განაცხადა. ტუღუში მთავრობაში საკადრო ცვლილებებს გამოეხმაურა და განაცხადა, რომ მისთვის გაუგებარია კონკრეტულად რატომ გახდა საჭირო მინისტრების შეცვლა.

ლაშა ტუღუშმა მთავრობისა და დეპუტატების პარლამენტში გამართული შეხვედრაც შეაფასა.

"არ იყო ნათელი რატომ ხორციელდებოდა საკადრო ცვლილებები მთავრობაში, მსგავსი განცდა დღესაც მაქვს. გასაგებია არგუმენტები, ნაწილობრივ სჭირდება ახალი სისხლი, ენერგია, ახლებური მიდგომები. ჩვენ შეგვიძლია ვივარაუდოთ რაღაცეები, შეიძლება რაღაცეებს მივხვდეთ, მაგრამ მთავარ კითხვებზე პასუხი არ არის გაცემული –რატომ იცვლება მინისტრები, რა შეასრულეს და რა ვერა - ჩვენ გვჭირდება მეტი კონკრეტიკა. ეს ინფორმაცია უნდა მივიღოთ მთავრობისგან. როცა შვიდი მინისტრი იცვლება, ეს გულისხმობს მნიშვნელოვან სიახლეებს პოლიტიკაში. მე მართალი გითხრათ, ყურადღებით ვუსმენდი მათ და ვერ გავიგე რა მნიშვნელოვანი სიახლე იქნება ამ შვიდი მინისტრის მოსვლასთან ერთად, რა იცვლება პოლიტიკაში.

მეორე საკითხი, ეს არის ის ურთიერთობების ფორმა, რომელიც არ არის სწორი და მისაღები. გაუთავებელი ბრალდებები, რაც გვესმის პარლამენტში, ენა, რომელიც ზედმეტად აგრესიულია. არ შეიძლება გაუთავებლად გვესმოდეს დეპუტატების და მინისტრების ურთიერთობაში - შენ იყავი ქურდი წინა ხელისუფლებაში, დამაქცევარი, ცრუ და ა. შ. მგონია, რომ საკმაოდ გადავმწიფდით იმისთვის, რომ ზრდილობიანად ვუთხრათ ადამიანებს საკუთარი შეხედულებები ვიდრე ასეთი უხამსი ფორმებით მიმართავდენენ ერთმანეთს. თუ მიგაჩნია, რომ შენს წინაშე 50 ქურდი ზის რომელსაც აქვს დეპუტატის მანდატი, საერთოდ რას ელაპარაკები, რა მაღალ მატერიებზე ლაპარაკობ, რა ნატო-ზე, ევროკავშირზე და ა.შ. ქურდი თუ არის, უნდა იყოს ციხეში და თუ ის პარლამენტშია, ასეთი ფორმით არ უნდა მიმართო", -განაცხადა ტუღუშმა.

"ინტერპრესნიუსი"