მამულიჩა: "კირკოროვი უკრაინელი კონკურსანტის პროდიუსერია და ქაჩავს, ქულებს ამიტომ გვაკლებს"

"ახალი ტალღა 2014"-ის მორიგ საკონკურსო ტურში კონკურსანტებს კოლეგები ეხმარებოდნენ, მათთან ერთად გამოდიოდნენ სცენაზე. ნუცა ბუზალაძემ სოფო ხალვაშთან ერთად იმღერა ცნობილი სიმღერა - "ყვავილების ქვეყანა". ჟიურის ორმა წევრმა, ლეონიდ აგუტინმა და ფილიპ კირკოროვმა ჟიურის სხვა წევრებისგან (ნუცა 11 ქუით შეაფასეს) განსხვავებით, 10-10 ქულა დაწერეს. მართალია ამან საბოლოო შედეგზე ვერ იმოქმედა, ჩვენი კონკურსანტი ისევ პირველ ადგილზეა, მაგრამ ის მხოლოდ ერთი ქულით უსწრებს უკრაინელ კონკურსანტს.

ვინაიდან ქართული ტურისტული ჯგუფი იურმალაში წელს ვერ ჩავიდა, ნუცას ფაქტობრივად, დარბაზიდან გულშემატკივრის შეძახილები ვერ ამხნევებს და არც ქართული დროშა ფრიალებს იქ, თუმცა ამის საკომპენსაციოდ, მაყურებელი ნიჭიერ გოგონას სითბოს არ აკლებს.

ერთადერთი ადამიანი, - გულშემატკივარიც და პროდიუსერიც კახა მამულაშვილია, მამულიჩა, რომელიც ქართულ დროშაშემოხვეული ყოველთვის კულისებში დგას და საოცრად განიცდის ნუცას ყოველ გამოსვლას. ეს ამბავი გუშინ არც ოპერატორს გამორჩა და მსხვილი პლანით სწორედ მამულიჩას დაღლილი და ჟიურის ზოგიერთი წევრის ქულებით უკმაყოფილო სახე დააფიქსირა...

ჩვენ კონცერტის შემდეგ მამულიჩას დავუკავშირდით:

- ამ კონკურსს თუ ვინმე წაგვაგებინებს, ფილიპ კირკოროვი იქნება...

- არსებობს ინფორმაცია, რომ კირკოროვი უკრაინელი კონკურსანტის, ვიქტორია პეტრიკის პროდიუსერია. მის პატარა დასთანაც დუეტში აქვს ნამღერი და საბავშვო ''ევროვიზიაზე'' იმ პატარა გოგონას პროდიუსერიც იყო...

- სხვა რაზე უნდა ვიფიქრო, რომ კირკოროვი მართლაც უკრაინელი კონკურსანტის - პეტრიკის პროდიუსერია და მას ქაჩავს? რის ხარჯზეც ჩვენ ქულებს გვაკლებს. ასეთი "ნაგლობა" არ მინახავს... ჯერჯერობით ერთი ქულით ვუსწრებთ უკრაინელს...

ნუცა აქ ყველას მოსწონს, შეუყვარდათ. გამარჯვებას უსურვებენ... თავადაც კარგად გრძნობს თავს, მხნედ და იმედიანად არის, მაგრამ მესამე ტურზე ისევ სერიოზული ბრძოლა მოუწევს და იმ მესამე სიმღერაზეც მზად ვართ.

ვნახოთ, რა იქნება, მთავარია, პირველი ადგილი შევინარჩუნოთ!

ლალი ფაცია

სპეციალურად ''ამბები.გე''-სთვის

იხილეთ ვიდეო