ია ანთაძე - ივანიშვილისთვის საკმარისია დემოკრატიის ის ხარისხი, რაც ქვეყანაშია, ჩემთვის კი საკმარისი არ არის

მედიაექსპერტ ია ანთაძის განცხადებით, მას და ყოფილ პრემიერს ბიძინა ივანიშვილს დემოკრატია სხვადასხვანაირად ესმით. ამის შესახებ ია ანთაძემ "ინტერპრესნიუსს" არასამთავრობო ორგანიზაცია "მოქალაქის" მიერ გავრცელებული განცხადების კომენტირებისას განუცხადა. ანთაძე მიიჩნევს, რომ ივანიშვილისთვის საკმარისია დემოკრატიის ის ხარისხი, რაც დღეს ჩვენს ქვეყანაშია, მისთვის კი - არა.

მედიაექსპერტი იმ განცხადებასაც განმარტავს, რომელიც ბიძინა ივანიშვილთან დაკავშირებით ტელეკომპანია "იმედის" გადაცემაში გააკეთა.

"გადაცემის თემა იყო ის ახალი საავტორო პროგრამა, რომელიც GDS-ის ეთერში სავარაუდოდ ოქტომბრიდან გავა. ამიტომ ჩემი მთავარი სათქმელი იყო ის, რომ ასეთი გადაცემა შესაძლოა იყოს ძალიან საინტერესო და შესაძლოა, ძალიან ბევრი გულშემატკივარი და მომხრე შესძინოს გადაცემის ავტორს. მაგრამ მე ვამბობდი, რომ ვერ ვხედავ დემოკრატიული ინსტიტუტების გაძლიერებას როგორ შეუწყობს ხელს ასეთ გადაცემა. ეს იყო ასე ვთქვათ პერიფერიული ფრაზა მოყოლილი იმ კონტექსტს, როცა მე ვამბობდი, რომ დემოკრატიის დამკვიდრება დემოკრატიის ინსტიტუტების გაძლიერებას მოითხოვს. ვერ ვხედავ ამ გადაცემით როგორ უნდა მოხდეს ინსტიტუტების გაძლიერება - ეს იყო მთავარი სათქმელი. თუ მთავარი ღერძიდან შევხედავთ ამ ამბავს შეიძლება ვინმეს მოეჩვენოს რომ არის ძალიან ზერელე ნათქვამი, მაგრამ მე ძალიან მყარად ვიცი, რას ვამბობდი და იმ გადაცემის ფორმატი და შინაარსიც არ იძლეოდა საშუალებას ამ თემის გაშლის. ის ფაქტი, რომ მედია დღეს უფრო თავისუფალია, ვიდრე წლების წინ, უეჭველია. ის, რომ სასამართლო უფრო მეტად თავისუფალია, უეჭველია. ის რომ ადამიანებს აღარ ეშინიათ აზრის თქმა და ტელეფონებს არ მალავენ, ესეც უეჭველია. გასაგებია, ეს ეტაპი ჩევნ გავიარეთ და გავიარეთ იმიტომ, რომ პირადად ივანიშვილის პოლიტიკური ნება იყო ასეთი და დიდი მადლობა ამისთვის. მაგრამ, ხომ არ შეიძლება სამარადჟამოდ ამ ეტაპზე გავჩერდეთ და ვთქვათ, რომ ეს არის დემოკრატია. სააკაშვილის პრეზიდენტობის დროს მართვის ძალიან მყარად ცენტრალიზებული სისტემა აშენდა და სწორედ ეს იყო ივანიშვილის პოლიტიკური ნების მთავარი გამოწვევა, რომ ეს ცენტრალიზებული სისტემა უნდა დანგრეულიყო და დეცენტრალიზებული სისიტემები უნდა აშენებულიყო. ეს არ მოხდა სამწუხაროდ, მართვის სტრუქტურები არის ზუსტად ისეთივე ცენტრალიზებული, როგორც იყო სააკაშვილის დროს და აქ მაქვს მე პრეტენზია. ამიტომ ვამბობ, რომ ჩვენ სხვადასხვანაირად გვესმის დემოკრატია და მას არ ესმის ისე, როგორც მე მესმის. მისთვის საკმარისია დემოკრატიის ის ხარისხი, რაც დღეს არის ჩვენს ქვეყანაში, ჩემთვის კი სრულებით არ არის საკმარისი", - განაცხადა ია ანთაძემ.

ბიძინა ივანიშვილის მიერ დაფუძნებულმა არასამთავრობო ორგანიზაცია "მოქალაქემ" განცხადება გაავრცელა, რომელშიც აღნიშნულია რომ "13 ივლისს, ერთ-ერთ ტელეარხზე მიწვეულმა ცნობილმა ჟურნალისტმა და ექსპერტმა საუბრისას განაცხადა: ,,ივანიშვილმა ცუდად იცის, რა არის დემოკრატია და დემოკრატიული ინსტიტუტების გაძლიერება".

"სამწუხაროდ, გადაცემის წამყვანს არ გაუჩნდა პროფესიონალისათვის შესაფერისი ან თუნდაც ლოგიკური სურვილი, სტუმრისათვის ეთხოვა, განემარტა თავისი დასკვნა და დაეზუსტებინა, რას გულისხმობდა იგი დემოკრატიის ,,ცუდად ცოდნაში".

თავისთავად მისასალმებელია, რომ დღეს, უკვე თავისუფალ მედიაგარემოში იწყება საუბრები დემოკრატიის რაობაზე, რადგან სწორედ ამგვარი თემების პოპულარიზაცია და საზოგადოებრივი განხილვა მიაჩნია ორგანიზაცია ,,მოქალაქეს" დემოკრატიის გამყარების ერთ-ერთ უმნიშვნელოვანეს საფუძვლად.

ამასთან, არ შეიძლება კიდევ ერთხელ ყურადღება არ გავამახვილოთ ზოგიერთ ფაქტორზე, რომელიც ხელს უშლის დემოკრატიის დამკვიდრებას, - ეს არის ზედაპირულობა და არაპროფესიონალიზმი, რომელსაც ხშირად ვაწყდებით ქვეყნისათვის უმნიშვნელოვანეს საკითხებზე მსჯელობისას.

სამწუხაროდ, ამ ეთერში ჩვენ ორივეს მოწმენი გავხდით: გაკეთდა ზედაპირული განცხადება და მას არ მოჰყვა ის რეაგირება, რომელსაც ითხოვს დაინტერესებული აუდიტორიის წინაშე პასუხისმგებლობა და პროფესიონალიზმი", -ნათქვამია განცხადებაში.

ნახეთ ვიდეო

"ინტერპრესნიუსი"