10
ივნისიდღის ზოგადი ასტროლოგიური პროგნოზი
თბილისში, ჩუბინაშვილის 57 ნომერში პრემიერ-მინისტრის მხარდამჭერი არასამთავრობო ორგანიზაცია მდებარეობს. "ირაკლი ღარიბაშვილის მხარდამჭერთა ცენტრის" შექმნის იდეა დავით ხიზანიშვილს ეკუთვნის. Ambebi.ge ორგანიზაციის საქმიანობით დაინტერესდა და ბატონ დავითს ოფისში ვესტუმრეთ. აღსანიშნავია, რომ მასვე ეკუთვნის გაცნობისა და დაოჯახების ცენტრი...
-ბატონო დავით, როდის დააარსეთ ეს არასამთავრობო ორგანიზაცია?
-საქართველოს ახალი დემოკრატები და ირაკლი ღარიბაშვილის მხარდამჭერთა ცენტრი 2014 წლის 19 მაისს დაფუძნდა. ცენტრის მთავარი მიზანი ირაკლი ღარიბაშვილის მხარდამჭერების მობილიზებაა როგორც თბილისის, ისე მთელი ქვეყნის მასშტაბით. ბატონ ირაკლის ოფიციალური განცხადებით ვაცნობეთ, რომ ეს ორგანიზაცია დაარსდა. სექტემბრიდან ჟურნალ "ოცნების" გაკეთებასაც ვგეგმავთ.
-რა კრიტერიუმების მიხედვით ირჩევთ ცენტრში გაწევრიანების მსურველებს?
- ჩვენთან მოსვლა 18 წელს გადაცილებულ ნებისმიერ ადამიანს შეუძლია. მთავარია, იყოს ბატონი ირაკლის მხარდამჭერი და იზიარებდეს ჩვენს წესდებას. გარდა ამისა, სავალდებულოა საწევრო გადასახადი, თვეში 1 ლარი გადაიხადოს.
-რას ითვალისწინებს წესდება?
- წესდების მიხედვით, ჩვენი მთავარი მიზანია საქართველოში დემოკრატიული სამოქალაქო საზოგადოების შექმნა და დემოკრატიული პრინციპების დამკვიდრება. საქართველოს მოქალაქეების კონსოლიდაცია და მათი ჩაბმა ქვეყნის აღმშენებლობის პროცესში.
-თავად პრემიერ მინისტრმა თუ იცის თქვენი არასამთავრობოს შესახებ? მომავალში რაიმე ტიპის თანამშრომლობას თუ გეგმავთ მასთან?
-არასამთავრობოს საჯარო რეესტრში რეგისტრაციამდე პრემიერ-მინისტრს წერილობით მივმართეთ, სადაც ვატყობინებთ, რომ მისი მხარდამჭერი ცენტრის დაფუძნებას ვგეგმავთ. რა თქმა უნდა, ბატონი ირაკლი საქმის კურსშია. თვითმმართველობის არჩევნებამდე გვინდოდა მასთან შეხვედრა, მაგრამ გვთხოვა, თავი შეგვეკავებინა ზედმეტი აგიტაციისაგან, რომ ვინმეს გაღიზიანება არ მოჰყოლოდა. მეორე ტურის შემდეგ ვგეგმავთ მასთან შეხვედრას და სამომავლო გეგმებსაც ერთად დავსახავთ.
"ირაკლი ღარიბაშვილის მხარდამჭერთა ცენტრი" ჯერჯერობით ასამდე წევრს აერთიანებს. როგორც ორგანიზაციის დამფუძნებელმა, დავით ხიზანიშვილმა გვაცნობა, სექტემბრიდან რეგიონებშიც აპირებენ პრემიერის მხარდამჭერთა გაერთიანებას. შეიქმნება თემატური ჯგუფები და ერთობლივად დაიგეგმება სამოქმედო გეგმა.
სალომე შიხაშვილი, Ambebi.ge
