რასმუსენი - პუტინის განცხადებები უიღბლო საფარველია ყირიმის უკანონო ანექსიისთვის

რაც უკავშირდება უსაფრთხოებას, ვითარება კარდინალურად შეიცვალა. უკრაინაში რუსეთის უკანონო ქმედებები საშიშ სიგნალად იქცა. ამან შეგვახსენა, რომ უსაფრთხოების უზრუნველყოფა თავისთავად არ ხდება. ასე რომ, რა თქმა უნდა, ახალ რეალობასთან ადაპტაცია გვესაჭიროება. ამის შესახებ ნატოს გენერალურმა მდივანმა ანდერს ფოგ რასმუსენმა "ევრონიუსთან" ექსკლუზიურ ინტერვიუში ჟურნალისტის პასუხად განაცხადა, რომელიც დაინტერესდა, როგორ შეაფასებდა ალიანსის გენერალური მდივანი ევროპაში უსაფრთხოების მდგომარეობას ბოლო თვეების განმავლობაში.

ყირიმის ანექსიასთან დაკავშირებით, გენერალურმა მდივანმა განაცხადა, რომ არავის ჰქონდა დაგეგმილი ყირიმში ნატოს ძალები განეთავსებინა და შესაბამისად, მისი თქმით, პუტინის ის განცხადება, რომ ვერ დაუშვებდნენ, ნატოს ჯარები ყირიმში შესულიყვნენ, რასმუსენის თქმით, უიღბლო საფარველია ყირიმის უკანონო ანექსიისთვის რუსეთის მხრიდან. "აქ არავითარი გამართლება არ შეიძლება იყოს. რუსეთი უხეშად არღვევს თავის ყველა საერთაშორისო ვალდებულებას და ნატო- რუსეთის ფუნდამენტურ პრინციპებს", - აცხადებს რასმუსენი.

მისივე თქმით, უეჭველია რუსეთის სიღრმისეული ჩართულობა აღმოსავლეთ უკრაინის დესტაბილიზაციაში. "ისინი უშვებენ შეიარაღებისა და ტექნიკის შესვლას, ასევე "ბოევიკების" გადასვლას საზღვარზე. მოვუწოდებთ რუსეთს, შეწყვიტოს სეპარატისტული ჯგუფების მხარდაჭერა და გაიყვანოს თავისი ჯარები საზღვრიდან. ბოლო პერიოდში კვლავ დავაფიქსირეთ რუსეთის ჯარის გაძლიერება საზღვრისპირა რაიონებში", - განაცხადა ალიანსის გენერალურმა მდივანმა.

"ინტერპრესნიუსი"