ბათუმში 27 წლის ქალი მშობიარობის დროს გარდაიცვალა

ბათუმის რეფერალურ საავადმყოფოში 27 წლის შორენა დევაძე მშობიარობის დროს გარდაიცვალა. გარდაცვლილის ახლობლები ექიმებს უყურადღებობაში ადანაშაულებენ და მათი პასუხისმგებლობის საკითხის დაყენებას ითხოვენ.

ოჯახის ინფორმაციით, მშობიარე ქალი საავადმყოფოში გუშინ მიიყვანეს. ბავშვის გადარჩენა ვერ მოხერხდა, რამდენიმე საათში კი დედაც დაიღუპა. როგორც გარდაცვლილის მეუღლე მინდია ზოიძე აცხადებს, საავადმყოფოში მიყვანისთანავე ოპერაციის ჩატარებას ითხოვდნენ, თუმცა ექიმებმა დაარწმუნეს, რომ ქირურგიული ჩარევა საჭირო არ იყო.

"ვუთხარი, ოპერაცია გავუკეთოთ, 8 საათი ქალი აწვალეს. ბავშვის დაბადებისას მეც ვიყავი პალატაში, ბავშვი რომ გაიყვანეს, ცოლმა დაიწყო უცნაურად სუნთქვა. ექთნები სახეში ურტყამდნენ, რა გჭირსო, ქალი ხმას ვერ იღებდა, ვერ სუნთქავდა. სუნთქვის აპარატი ვერ ნახეს, ყველა ექიმი აპარატს ეძებდა. ასე დამიღუპეს მეუღლე", - აღნიშნა მინდია ზოიძემ. მისივე თქმით, მეუღლეს თირკმლის უკმარისობა განუვითარდა, რამაც ნაყოფის დაღუპვა გამოიწვია.

გარდაცვლილის დედამთილი ირინა ზოიძე აცხადებს, რომ მშობიარე ღამის საათებში უყურადღებოდ იყო დატოვებული. "ვეხვეწებოდით, ოპერაცია გაუკეთეთ - სამი წელი შვილი არ ეყოლებაო, ბავშვი რად მინდა, შვილი გადამირჩინეთ-მეთქი, შეაგდეს რეანიმაციაში და ვინმემ აღარ შეხედა, გათენებამდე ინფორმაცია აღარ მოგვცეს", - აღნიშნა ირინა ზოიძემ.

შორენა დევაძის ოჯახის წევრებმა საავადმყოფოში შეჭრაც სცადეს. ადგილზე მობილიზებული იყო საპატრულო პოლიციის ეკიპაჟები. ოჯახის წევრები დამოუკიდებელი ექსპერტიზის დანიშნვას და საქმის გამოძიებას ითხოვენ.

"ინტერპრესნიუსი"