28
მაისიდღის ზოგადი ასტროლოგიური პროგნოზი
გასულ კვირას ჩვენში ერთიანი ეროვნული გამოცდები დაიწყო. უმაღლეს სასწავლებლებს უამრავი აბიტურიენტი სტუმრობს, რომლებიც ფაქტია, ძალიან ღელავენ. ახალა მთავარია, თავი დაგროვილი ცოდნით გამოიჩინონ, არც იღბალმა უნდა უმტყუნოთ, რომ დასახულ მიზანს მიაღწიონ...
მას, ვისაც უმაღლეს სასწავლებელში მისაღები გამოცდები ჩაუბარებია, ცხადია, ეს საოცარი საგამოცდო ციებ-ცხელებაც საკუთარ ტყავზე გამოუცდია... "ამბები.გე" რამდენიმე ცნობილ ადამიანს სწორედ ამ თემაზე გაესაუბრა და მათ საკუთარი ცხოვრების ერთ-ერთი საეტაპო პერიოდი გაახსენა. თუმცა არც ერთს ერთიანი ეროვნული გამოცდების ჩაბარება არ მოუწია, ვინაიდან აბიტურიენტობა სხვა პერიოდში გამოსცადეს.
ნინა წკრილაშვილი, მომღერალი:
- ამ დღეებში ჩემი მისაღები გამოცდები მართლაც გამახსენდა... ძალიან მაგრად ვნერვიულობდი, თუმცა არც ერთი გამოცდის არ მეშინოდა, გარდა ქართული წერისა, რადგანაც ლექსებს ვერ ვიმახსოვრებდი. არ მინდოდა, ისეთი თემა შემხვედროდა დასაწერად, სადაც ლექსიდან ციტატა მექნებოდა მოსატანი. ამიტომ, ძალიან მეშინოდა.
- როგორც ვიცი, მისაღებ გამოცდებს ფრანგული ენისა და ლიტერატურის ფაკულტეტზე აბარებდი...
- კი და კარგად მახსოვს გამოცდა ფრანგულ ენაში. უმაღლესი ქულები ავიღე და უზომოდ კმაკოფილი წამოვედი. ისეთი გახარებული მოვრბოდი, რომ კიბიდან ჩამოვვარდი. მოკლედ, გადატყაული მუხლებით გამოვედი... საქართველოს ისტორიასა და ქართულ ენასა და ლიტერატურაში ზეპირი გამოცდაც კარგად ჩავაბარე, მშვენიერი საკითხები შემხვდა. ქართული წერა კი როგორც იტყვიან, ჩამიწყვეს... მაგრამ გამიმართლა და იქაც ჩემთვის საყვარელი საკითხი შემხვდა და რომც არ ჩაეწყოთ, ისეთი თემა იყო, რომ ჩემით გავძვრებოდი...
მაშინ შევარდანაძის პერიოდი იყო და დიდად აზრი არც ჰქონდა იმას, ჩააწყობდი, თუ თავს სწავლით მოიკლავდი... მოკლედ, ცოდნა არ იყო იმის 100%-იანი გარანტია, რომ აუცილებლად სტუდენტი გახდებოდი... დღეს მიხარია, რომ სწავლა ფასდება და გამორიცხულია, ვინმე დაუმსახურებლად სტუდენტი გახდეს.
- მაინცდამაინც ფრანგული ენისა და ლიტერატურის ფაკულტეტი რატომ აირჩიე?
- სხვათა შორის, რომ ჩავირიცხე, ძალიან კარგად ვსწავლობდი. მერე მაგისტრატურაც დავამთავრე. ხოლო თუ რატომ ავირჩიე ეს ფაკულტეტი, გეტყვით, რომ თეატრალურ ინსტიტუტში მინდოდა ჩაბარება, მაგრამ მამაჩემი ამის კატეგორიული წინააღმდეგი იყო... მაგრამ ბოლოს ისე გამოვიდა, რომ მაინც მაგ სფეროში აღმოვჩნდი. მოკლედ, რადგანაც ფრანგული ენა ბავშვობიდან მომწონდა და მიყვარდა, იქ ჩაბარებაც უეცრად გადავწყვიტე...
აბიტურიენებს, ვინც ახლა გამოცდებს აბარებს, გამძლეობას და წარმატებებს ვუსურვებ.
მაკა შალიკაშვილი, მსახიობი:
- მე მანანა და ლეილა ბერიკაშვილების მომზადებული ვიყავი და თეატრალურ ინსტიტუტში სასწაულად მაღალი ქულებით მოვხვდი.
- პირველი გამოცდა კარგად გახსოვს?
- თეატრალურ უნივერსიტეტში ჯერ შემოქმედებით ტურებზე უნდა გახვიდე, რომ გამოცდები ჩააბარო. ამიტომ, ტურებზე ლექსებს ვკითხულობდი, ვმღეროდი და ვცეკვავდი... მეტი რა მინდოდა, ჩემს საყვარელ საქმეს ვაკეთებდი... მოკლედ, გამიმართლა... თან, ძალიან!
- გაგიმართლა იმიტომ, რომ გივი ბერიკაშვილის ნათლული ხარ და მისი მეუღლე და შვილი გამზადებდნენ?
- მეც ვიმარჯვე და თუნდაც იმიტომ, რომ გივი ბერიკაშვილია ჩემი ნათლია! პირველ გამოცდაზე უკვე აღარ ვღელავდი, რადგანც მთავარი შემოქმედებითი ტურების გადალახვა იყო. იქ ისეთი მაღალი ქულები მქონდა, წერაში, ვინ ჩამჭრიდა?! თან, მკითხეს, ამირან შალიკაშვილის (საქართველოში პანტომიმის თეატრის ფუძემდებელი. - ავტ.) შვილი ხარო? - დიახ-მეთქი, - დავეთანხმე.
- მოკლედ, ცნობილი ადამიანის შვილობაც დაიბრალე?
- კი (სიცილით ამბობს).
- ჟიურის შემადგენლობაში ვინ იყვნენ, ანუ ვინ გცდიდა?
- მანანა ბერიკაშვილი, გიზო ჟორდანია, გიორგი შალუტაშვილი, ანზორ ქუთათელაძე, შალვა გაწერელია... ბოლოს ჯგუფში ბატონმა შალვამ ამიყვანა და ამაშიც გამიმართლა!
- ფრენა-ფრენით ჩაირიცხულხარ... რას უსურვებდი მათ, ვინც ახლა აბარებს მისაღებ გამოცდებს?
- ყველას იღბალს ვუსურვებ და მიზნის მიღწევას.
თამუნა მუსერიძე, ჟურნალისტი:
- 55-ე სკოლაში ვსწავლობდი, მერე ბოლო ორი წელი სახელმწიფო უნივერსიტეტის მოსამზადებელ ლიცეუმში ვსწავლობდი, სადაც უნივერსიტეტის ლექტორები გვამეცადინებდნენ. იმ სასწავლებელს თუ 10-იანებზე დაამთავრებდი, უნივერსიტერში ტესტირების შედეგად ხვდებოდი. ჟურნალისტიკის ფაკულტეტზე ყოველგვარი გამოცდის გარეშე ჩავირიცხე იმიტომ, რომ ლიცეუმში წარმატებული ვიყავი. პარალელურად, თეატრალური უნივერსიტეტის კინომცოდნეობის ფაკულტეტი, ზვიად დოლიძის ჯგუფი დავამთავრე...
- მოკლედ, იმის გამო, რომ უნივერსიტეტის ლიცეუმში სწავლობდი, მისაღები გამოცდების ციებ-ცხელება რთულად არ განგიცდია?
- დიახ, რადგანაც უნივერსიტეტში პირდაპირ შიდა გამოცდებიდან მოვხვდი... ერთხელ ამის შესახებ ერთ-ერთ ინტერვიუში ვთქვი და მერე კომემტარებში ვიღაც წერდა - იმ ლიცეუმიდან ყველა პირდაპირ მოხვდა უნივერსიტეტში, ეს რას იგონებსო? არაფერს ვიგონებ, ჩემი თანაკლასელებიც დამეთანხმებიან იმაში, რომ ტესტირების შედეგად, მხოლოდ მე და ჩემი ერთი კლასელი პირდაპირ ჩავირიცხეთ.
- რას უსურვებ იმ ადამიანებს, ვინც ახლა ერთიან ეროვნულ გამოცდებს აბარებს?
- გაძლებას, ენერგიას, ყურადღების კონცენტრაციასა და რაც მთავარია, სიმშვიდეს.
ლალი ფაცია
სპეციალურად "ამბები.გე"-სთვის
