7
ივნისიდღის ზოგადი ასტროლოგიური პროგნოზი
ბრალდებულებმა აღნიშნული მეთოდით 300 მოქალაქის პლასტიკური ბარათის მონაცემები მართლსაწინააღმდეგოდ მოიპოვეს.
ცოტა ხნის წინ, შინაგან საქმეთა სამინისტრომ კომპიუტერულ სისტემაში უნებართვო შეღწევის და პლასტიკური ბარათიდან ფულადი თანხის ფარულად დაუფლების ბრალდებით, შარდენზე მდებარე ერთ-ერთი ბარის მეპატრონე და ამავე ბარის მიმტანი დააკავა. გამოძიების თანახმად ბრალდებულები სპეციალური მოწყობილობის – ე.წ. "რიდერი"-ს საშუალებით, 2014 წლის მარტიდან მაისამდე უკანონოდ აგროვებდნენ ბარის სხვადასხვა კლიენტის საბარათე მონაცემებს და კლიენტების მიერ თანხის გადახდის დროს, ტერმინალებზე დაფიქსირებულ პინ-კოდებს იმახსოვრებდნენ. ბრალდებულებმა აღნიშნული მეთოდით 300 მოქალაქის პლასტიკური ბარათის მონაცემები მართლსაწინააღმდეგოდ მოიპოვეს. უკანონოდ მოპოვებული მონაცემების გამოყენებით, სპეციალური მოწყობილობის – ე.წ. "რაიდერი"-ს საშუალებით, ყალბ პლასტიკურ ბარათებს ამზადებდნენ და აღნიშნული ბარათების გამოყენებით სხვადასხვა ბანკომატიდან თანხებს მართლსაწინააღმდეგოდ ანაღდებდნენ.
აღსანიშნავია ის ფაქტი, რომ ბოლო პერიოდში მსგავსი ტიპის დანაშაულის სტატისტიკა მაღალი ზრდის ტემპით ხასიათდება. აქედან გამომდიანრე, ჩნდება კითხვა, რამდენად დაცულია პლასტიკური ბარათების მომხმარებლები და რა ზომები უნდა მიიღონ იმისათვის, რომ მსგავსი ფაქტის წინაშე არ აღმოჩნდნენ?
კომერციული ბანკების წარმომადგენლებმა BPN-თან საუბარში განაცხადეს, რომ მათი დაცვის სიტემა აბსოლუტურად შეესაბამება თანამედროვე სტანდარტებს და მომხმარებელი მაქსიმალურად არის დაცული.
როგორც "პროკრედიტ ბანკში" აცხადებენ, მათი პლასტიკური ბარათის დაცვის სისტემა ძალიან მაღალ დონეზეა და ამ სისტემის გამართულად მუშაობას ბანკში არსებული სპეციალური დეპარტამენტი უზრუნვეყოფს. ამიტომ პლასტიკური ბარათებიდან თანხის მოპარვისგან მომხმარებელი დაცულია, თუ თვითონ მომხმარებელი დაიცავს არსებულ უსაფრთხოების წესებს.
"საქართველოს ბანკის მომხმარებელს შეუძლია ისარგებლოს პლასტიკური ბარათის დაცვის მომსახურებით და დაიცვას საკუთარი ბარათი მესამე პირის მიერ არალეგალური გამოყენებისაგან როგორც საქართველოში, ასევე საზღვარგარეთ. მომხმარებელს შესაძლებლობა აქვს აირჩიოს 3 სხვადასხვა პაკეტიდან ერთ–ერთი, იმის და მიხედვით, რა ინტენსიურობითა და მოცულობით იყენებს პლასტიკურ ბარათს. სერვისის ღირებულებაა სულ 4, 10 და 50 ლარი წელიწადში, პაკეტის შესაბამისად. ბარათის არაავტორიზებული მომხმარებლისგან დაცვა ითვალისწინებს ბანკომატის , პოსტერმინალის და ინტერნეტის მეშვეობით განხორციელებულ არაავტორიზებულ მოხმარებას",- აცხადებენ "საქართველოს ბანკში".
"საქართველოს ბანკში" მომხმარებელს ურჩევენ დაიცვან ზოგადად, პლასტიკური ბარათის მოხმარებასთან დაკავშირებული რამდენიმე მარტივი წესი, იმისთვის რომ ბარათი უსაფრთხოდ მოიხმარონ. მათ შორის: "ინტერნეტ შოპინგის დროს არ უნდა გადაიხადოთ გადაუმოწმებელ ვებ-გვერდებზე, არ უნდა გაატანოთ თქვენი ბარათი სხვას, ასევე მომსახურების ობიექტებში უნდა სთხოვოთ პოსტერმინალის მოტანა ადგილზე, იმის ნაცვლად რომ გაატანოთ ბარათი, საზღვარგარეთ გამგზავრების წინ, გაეცნოთ კონკრეტულ ქვეყანაში ბარათის მოხმარების რჩევებს. მაგალითად, არის ქვეყნები, სადაც თანხა მხოლოდ იმ ბანკომატიდან უნდა გამოიტანოთ, რომელიც დამონტაჟებულია ბანკის ფილიალში."
